Read Kpelle Samia Maa-ŋuŋ 16 Bible Online

Samia Maa-ŋuŋ 16 - Kpelle bible

Samia Maa-ŋuŋ 16

¹Malôŋ è tòo Ǹuu-namui ma a gɛ́ɛ è Sɔ̂ɔ sìɣe a kâloŋ Eezuɛ mɛni ma. Ɣele tɔnɔ ta è mò ǹyɛɛ, “Samia, ŋaâ nâa ńyee kúla Sɔ̂ɔ mu. Fé fáa ní ma a gɛ́ɛ é kɛ́ ŋɔ́nɔ a kâloŋ. Ífe ŋɔ́nɔ m̀alôŋ sèe. Ye wúlɔ pú sɛŋ-folo loŋ su í lí í naloŋ tɔnɔ naa káa nyíi da dòli a Zɛsei. Zeɛ́ɛ káa Bɛpeleɣɛ̃ɛ. Ŋaâ ǹóŋ dɔnɔ siɣe zu a gɛ́ɛ é kɛ́ a ŋákâloŋ.”

²Samia ǹyɛɛ m̀ai, “Ŋá máŋ gɛ́ tí, Sɔ̂ɔ a mɛ̀ni a pâi ḿbaâi.” Yâwɛɛ è mò ma ǹyɛɛi, “Ye niŋa-loŋ tɔnɔ siɣe, í m̀ó ǹûai dîa a gɛ́ɛ í pà sâla kulâi ḿî.

³À kɛ̀ tí, í Zɛse tóli zâla-laa soŋ-nuui kuláai su. Ŋa pâi ǹóŋ dɔnɔ lɛ̂i yâ nyíi ŋa zìɣe zui. À kɛ̀ tí, gɛ̀ ní ye Ɔle wulɔi pú ŋûa.”

⁴Samia è lì Bɛpeleɣɛ̃ɛ yɛ̂ɛ berei Yâwɛɛ è mò la ma é gɛi. Daai láa túɛ-ƃelai dí lì berei tɔɔ̂i. Kɛ́lɛ dí kɛ̀ yaôi. Dí m̀arê kɛ̀ dîyɛɛ m̀ai, “Lawoi-laa naa kâa ƃe kpaa lé?”

⁵Samia ǹyɛɛi, “Owoei, gáa a lawoi-laa naa-kaa ká ŋí. Ŋá pà a gɛ́ɛ ŋá sâla kula Yâwɛɛ ma. Ka kákpîŋ kpɛtɛ ká pá kwaa zâla-laa soŋ-nuuii kúla. Ka pá kwáa lí.” Samia è ƃɛlɛ tôli ƃò a Zɛse máŋ ǹônii-sinaai a gɛ́ɛ dí pá dí zâla-laa soŋ-nuuii kúla.

⁶Zɛse da ǹônii dí pà lai. Samia ŋɛ́i pɔɔ è lɛ̀ɛ Zɛse ǹóŋ-surɔŋ kɛ́tɛi Ilia ma. Samia è kɛ̀ m̀ôi ǹíi su pere ǹyɛɛi, “Ǹúui ƃé ŋí Yâwɛɛ a zìɣe zui?”

⁷Yâwɛɛ ǹyɛɛ m̀ai, “Samia, íkili fé kɛ̀ Ilai ma, kpɛ́ni fêi, ǹɛ̂lɛɛi, mu siɣeɛ́ɛi. Ǹyaa fêi. Nûa da núu ŋɔmɛni ŋá tèe berei ma da gàa lai, kɛ́lɛ ŋa nûa dímɛnii ŋá tèe yɛ̂ɛ berei dílii káa lai.”

⁸Zɛse è mò ŋɔlolôŋ Aƃi-na-da ma a gɛ́ɛ é lí é tɛ́ɛ Samia ŋɛ́i túɛ, kɛ́lɛ Samia è mò ma ǹyɛɛi, “Kpao, ǹyaa fêi.”

⁹Ǹaa pôlu ma, Zɛse è Saama tɛ̀ɛ bɔ́-naa, kɛ́lɛ Samia è mò ma ǹyɛɛi, “Yâwɛɛ fé máŋ ziɣe ní.”

¹⁰Zɛse è gɛ̀ ǹônii-sinaa lɔ́ɔlu-mɛi feerɛi dí tɛ̀ɛ Samia ŋɛ́i. Ǹaa kɛ́ɛ tíi, Samia è mò ma ǹyɛɛi, “Zɛse, Yâwɛɛ fé nii ǹyaŋkpa-ŋai ŋí da siɣe ní.

¹¹Ílônii-sinaai da káa niî pôlu?” Zɛse ǹyɛɛ m̀ai, “Owoei, ńoŋ-surɔŋ guro-tei Deeƃé káa m̀ála-ŋai mɛi kâai.” Samia è mò ma ǹyɛɛi, “Núu da tɛɛ berêi. Kúfe pâi díi kɔ́ɔ pîlanii fɛ̂ɛ nɔ́ é kɛ́ ƃɛ́.”

¹²Zɛse è Deeƃé worɛ̂ tɛ̀ɛ. Deeƃé è kɛ̀ a surɔŋ-loo kɔlɔi ponoɔɔ. È kɛ̀ kpɔ́ a ǹɛ́lɛɛ ŋ̀ɛ́i-gao maa waa. Deeƃé páai, Yâwɛɛ è mò Samia ma ǹyɛɛi, “Ǹyaa ƃé ŋa fâai ma. Ímu-siɣe í ɔle wulɔ pú ŋ̀ûa.”

¹³Nya ƃe Samia è ɔle wulɔi pù Deeƃé ŋûa ǹîa-ni díkɛ naa kàa. Yâwɛɛ ŋɔmɔ̂leŋ è pà Deeƃé kponôi é síɣe ŋ̀elei tí ma é lí tuɛ pere. Samia ǹyaŋ è pene pôlu é lí bɔ́-naa Lama.

¹⁴Yâwɛɛ ŋɔmɔ̂leŋ è kùla Sɔ̂ɔ pôlu nyînaŋ nyɔ́mɔɔ é pìlaŋ bôlu gɛ́ m̀ɔ̃lɛ.

¹⁵Nya ƃe Sɔ̂ɔ ŋɔtíi-kɛ-ƃela kpaya-kpayai dí mò ma dîyɛɛi, “Ɣâla ƃé ǹyînaŋ nyɔ́mɔɔi ŋí pìlaŋ ípôlu. Ǹyaa ká ŋí ímɔ̃lɛi a zaŋ kɛ́ɛ ŋí.

¹⁶Kúnuu-namui, tɔɔ kú núu da kɔ́ri nyíi a gɔnîŋ ɣale a ǹɛ́lɛɛi. Ǹyînaŋ nyɔ́mɔɔi a lɛ̀ɣɛ a pâi gɔnîŋ ɣâlei yâ a ímɔ̃lɛ, a pɔri íŋaa nɛnɛ̂i a gɔnîŋ wooi.”

¹⁷Sɔ̂ɔ ǹyɛɛ dîai, “Ńyee káa m̀u. Ka maa nuui da kɔ́ri ḿî.”

¹⁸Ŋɔtíi kɛ́-nuu kɛ́tɛi dɔnɔ è mò ma ǹyɛɛi, “Bɛpeleɣɛ̃ɛ nalôŋ tɔnɔ da káa naa da kɛ̀ Zɛse. Ǹóŋ-surɔŋ dɔnɔ a kɔnîŋ ɣale kpɔ́ a ǹɛ́lɛɛ. Gáa a kɔ-kuluƃa líi kpeliɛɛ, ǹɛ́lɛɛ kpɔ́ a ŋ̀ánaa. A lòno nûa pɔ́ a ǹɛ́lɛɛ. Yâwɛɛ káa bôlu.”

¹⁹Sɔ̂ɔ è kéla tɛ̀ɛ Zɛse pɔ́-naa ǹyɛɛ m̀ai, “M̀ó íloŋ Deeƃé ma nyíi gáa íƃala-ŋai mɛi kâai é pá ḿî.”

²⁰Zɛse è kpólo sìɣe é ŋwã̂ai pú sua-kɔlɔ konoŋ su é zee ŋ̀wɛlɛ-sôoi mɛi é bɛlɛ ƃoli-loŋ tɔnɔ ma é dɛ́ɛ Deeƃé pɔ́ a gɛ́ɛ é lí la Sɔ̂ɔ pɔ́-naa.

²¹Deeƃé è lì Sɔ̂ɔ pɔ́-naa é pɛ́lɛ tíi kɛ̂i mì. Sɔ̂ɔ è Deeƃé wɛ̀li kpɔ́ a ŋ̀ánaa. Deeƃé kɛ̀ a ŋɔkɔ́ kɔ́-sãai siɣe-nuu.

²²Ǹaa kɛ́ɛ tíi, Sɔ̂ɔ è kéla tɛ̀ɛ Zɛse pɔ́-naa ǹyɛɛ m̀ai, “Tɔ̃yâ ma Deeƃé lɛ̂lɛɛi a ńîa. Kpera yɛ̂ ǹɛɛ naa é kɛ́ ńyee ŋá.”

²³Ɣâla a kâa ǹyînaŋ nyɔ́mɔɔi tɛ̀ɛ a gɛ́ɛ é pîlaŋ Sɔ̂ɔ pôlu é mɔ̃lɛ, Deeƃé a kâa kɛ̀ ŋɔkɔnîŋ ɣâlei Sɔ̂ɔ ma. À kɛ̀ tí, nyînaŋ nyɔ́mɔɔi a kâa sìɣe bôlu é lí. Gɛ̀ ní a kâa tòo gbonôi ŋ̀ɛ́i é séɣeŋ é víi tɔ́ɔ.