Read Kpelle Samia Maa-ŋuŋ 21 Bible Online

Samia Maa-ŋuŋ 21 - Kpelle bible

Samia Maa-ŋuŋ 21

¹Deeƃé è lì zâla-laa soŋ-nuui Aimelɛ pɔ́-naa Nobi taai su. Aimelɛ kɛ́ɛ a Deeƃé káa pâi è pɛ̀lɛ kpɛ̃lînii ǹyɛɛ m̀ai, “Lé ƃé kɛ̀ yá tɔnɔ ya pâi núu da kélee fé ípôlui?”

²Deeƃé ǹyɛɛ m̀ai, “Gâloŋ Sɔ̂ɔ è ńdɛ̀ɛ mɛni da ma. È mò ḿâ a gɛ́ɛ ḿve m̀ɛnii kpîŋ ƃò núu da kélee ma, zɛŋ ƃé ŋá ŋákɔ-kuluƃa-ŋai lɛ̀ɛ la kwa da ma.

³Mii-sɛŋ káa ƃɛ́ íyêei a gɛ́ɛ í da tɛɛ ḿbɔ? Ya pɔri kpólo kane lɔ́ɔlu tɛɛ̂i ḿbɔ?”

⁴Zâla láa-soŋ-nuui ǹyɛɛ Deeƃé mai, “Gbóloi nɔ́ ƃɛ́ ǹyaa ƃa gbóloi maa-waai. Ya pɔri nɔ́ da sɔlɔ ƃôi à kɛ̀ íkɔ-kuluƃa-ŋai da fé ní sâa nyìi ní nɛnî da.”

⁵Deeƃé ǹyɛɛ m̀ai, “Owoei, kúta fé nyíi ní a nɛnî da. Fa fàa ma ŋákɔ-kuluƃa-ŋai da é nyíi a nɛnî da kwà kɛ̀ liî mɛni kpanaŋ da ma. Gáa a sɛŋ díkɛ a díkpɛtɛɛ Ɣâla fɛli mɛni ma a ɣele kélee kpɔ́ tãi kwà kɛ̀ liî mɛni da mai, ǹyaŋ sâa káa kpɔ́ a da kpɛ́ni, kpɛ́ni fêi, ziai nyíŋi káa a mɛni kpânaŋ sia.”

⁶Gbóloi nɔ́ kɛ̀ zâla-laa soŋ-nuui láa-soŋ-nuui yêei nya ƃe kɛ̀ a gbólo maa-waai nyíi è gùla Ŋ̀âla fɛli kwaai mai. Kpɛni fêi è maa fáleŋ a nina-ŋa. Nya ƃe è dɛ̀ɛ Deeƃé pɔ́-naa.

⁷Ǹyaŋ maa tãi tɔnɔi tí, Sɔ̂ɔ ŋɔtíi kɛ́-nuu kɛ́tɛi dɔnɔ è kɛ̀ naa gɛ́ Yâwɛɛ fɛli. Naloŋ kpîŋ láa ƃé kɛ̀ a Doɛɛ. È kɛ̀ a Idɔŋ nuu suu sui. È kɛ̀ a Sɔ̂ɔ ŋɔƃála mɛi káa nuu kɛ́tɛi.

⁸Nya ƃe Deeƃé è Aimelɛ marê kɛ̀ ǹyɛɛi, “Kpála da kpɛ́ni, kpaa máŋ ƃóa-sɔ̂kpɔ da kpɛ́ni káa íyêei ƃɛ́? Ŋá kùla a kîrɛ Gâloŋ ŋɔmɛnii ŋ̀aa-see kɛ́ mɛni ma ḿve pɔri ní ŋá ƃóa-sɔkpɔi siɣêi kpaa máŋ kɔli-sɛŋ da kpɛ́ni.”

⁹Zâla láa-soŋ-nuui è ŋ̀óo su tòo ǹyɛɛi, “M̀óa-sɔkpɔi nɔ́ gáa ƃɛ́i ƃa nyíi kɛ̀ Felesia-nuui Golaya yêei nyíi í bàa kɛ̀ Ila kpotoloi sui. Mɛni ma ya pɔri ziɣêi a kɛ̀ ya ŋ̀wɛ̂lii. Seɣe kpíniŋɔɔ̂i la gɛ́ ƃò tɔɔni bɔkɔɔ̂ŋ pôlu.” Deeƃé ǹyɛɛ m̀ai, “Gáa a ƃóa-sɔ̂kpɔ lɛ́lɛɛ. Ŋa pâi ziɣêi!”

¹⁰Deeƃé è pù a maa ɣelei tí é lí Âke kaloŋ pɔ́-naa Gâa.

¹¹Gâloŋ Âke ŋɔtíi kɛ́-ƃela kpaya-kpayai díkɛ̀ naa máŋ. Dí Âke marê kɛ̀ dîyɛɛ m̀ai, “Deeƃé fé ŋí nyii gáa a gâloŋ ǹɔii ŋí mɛi? Eezuɛ-ƃelai dífe kɛ́ ní mãlâi dí kɛ́ ŋ̀ulei tôo, ‘Sɔ̂ɔ a ŋɔkpɔara-ƃelai wála tɔnɔ pàa. Deeƃé a ŋɔkpɔara-ƃelai wála puu páa?’ ”

¹²Deeƃé è gíli ŋá sìa a m̀ɛnii dí kɛ̀ m̀ôi. È yào kpɔ́ Gâa kaloŋ Âke ma a ŋ̀ánaa.

¹³È lɛɛ tɔɔni naa é pɛ́lɛ tûai yɛ̂ ƃoo-nuu. È kɛ̀ nɔ́ tûai wúlee, gɛ́ daai galai lá ŋɔkpoŋ maa wɔ̂rɔi. È pɛ̀lɛ ǹá ya kɛ́ yèŋ a ǹɛɣɛ̂ŋ ǹá-leɣa su.

¹⁴Âke ǹyɛɛ ŋɔtíi kɛ́-ƃelai dîai, “Ka gáa! Ǹalôŋ ŋí a ƃoo. Ka pâi la ḿbɔ-naai lé mɛni ma?

¹⁵Ƃoo-nuu támaa káa ƃɛ́ à gɛɛ ká pá ŋɔ́nɔ a da. Ka gula ŋákâloŋ pɛrɛi lá!”