Read Kpelle Samia Maa-ŋuŋ 27 Bible Online

Samia Maa-ŋuŋ 27 - Kpelle bible

Samia Maa-ŋuŋ 27

¹Kɛ́lɛ Deeƃé è lòno goi-pere ǹyɛɛi, “Sɔ̂ɔ a pɔri ḿbâai a ŋ̀ele-ŋai ŋí da. Berei nɔ́ ŋa pɔri pûi la ǹyêei ƃa ŋá lí Felesia. Gɛ̀ ní ŋa pâi kulâi Eezuɛ, ǹyaŋ gɛ̀ ní víi a pâi kpɛɛ̂i a gɛ́ɛ é kɔ́ é ńzoŋ.”

²Nya ƃe Deeƃé da kpakolo ŋuŋ lɔ́ɔlu-mɛi da dí lì dí goyɛŋ-perei maa tíyeŋ dí lí Gâa díkɛ ƃò naa Gâloŋ Âke kɔ́ɔ mɛi.

³Âke è kɛ̀ Maɔɔ ǹóŋ. Ŋɔnûai dí pà a díwɔ̂ ǹûai. Deeƃé máŋ è pà a ŋɔnɛnîi Aionaŋ bɔ́-taai. Aionaŋ è kɛ̀ a Zariɛɛ nuu. È ŋɔ́nɔ pà a ŋɔnɛnîi Aƃigee nyíi da Neeba dí wɔ́lɔ kɛ̀ tûai. Aƃigee ǹyaŋ è kula Kamɛɛ.

⁴Sɔ̂ɔ kɛ́ɛ a gɔ́lɔŋ a gɛ́ɛ Deeƃé a pú a lí Gâai, è sìɣe bôlu.

⁵Ɣele È tɔnɔ da, Deeƃé da Âke dí kɛ̀ lônoi, Deeƃé ǹyɛɛ m̀ai, “À kɛ̀ ílii lâai a gɛ́ɛ kúkɛ ƃɛ́ kwa yá, gɛ̀ ní ǹɛɛ naa ŋá lí daa-ŋai dɔnɔ su ŋ́gɛ ƃò naa. Ḿaa fé nɛ̃ɛ ní a gɛ́ɛ ŋá kɛ́ gâloŋ taa-leei su.”

⁶Nya ƃe Âke è Zíkila taai tɛ̀ɛ Deeƃé pɔ́ a maa ɣele tɔnɔi tí. É síɣe ŋ̀elei tí ma Zíkila a wɔ́lɔ kɛ́ a Zuda kaloŋ-ŋai pɔ́ɔ.

⁷Deeƃé è wɔ́lɔ kɛ̀ Felesia a kóraŋ tɔnɔ da ɣáloŋ náaŋ.

⁸Tãi támaa Deeƃé da ŋɔnûai da kâa kɔ́ pɛ̀lɛ Gɛɛsu, Gɛzai, da Amɛlɛka suui su-ƃelai dîa. Ǹûai ŋí díkɛ̀ a Tɛlaŋ da Suɔɔ lɔii-kpiniŋ su-ƃela a tãi su kôyaa é tóo máŋ Ize lɔiii ma.

⁹Deeƃé da ŋɔkɔ́-kuluƃa-ŋai da kâa kɔ́ pɛ̀lɛ ǹûai ŋí dítaa-ŋai dîa, da kâa díƃala-ŋai, ǹiŋa-ŋai, ŋ̀wɛlɛ-sôo-ŋai, zoo-faleŋ-ŋai da díseɣe-ŋai kélee sìɣe diai da kâa kɛ̀ naai dí díkelee páa. Deeƃé a kâa kùla kpɔ́ nɔ́ too-maa kɛ̂i, a lì a gɛ́ɛ é Âke káa.

¹⁰À kɛ̀ tí, Âke a m̀arê kɛ̀ ǹyɛɛ m̀ai, “Mí ƃé í sâa lì naa gɔ́i mai?” Deeƃé ǹyɛɛ m̀ai, “Kú sâa lì Zuda taa-ŋai vɛ̃ɛ-kpâlaŋ sui dɔnɔ su.” Deeƃé a kâa mò ma a gɛɛ Zɛramiɛɛ-ƃelai dítaa-ŋai vɛ̃ɛ-kpâlaŋ sui dɔnɔ ƃé è lì zu. Kpaa máŋ, taa tɔ̂nɔ da káa vɛ̃ɛ-kpâlaŋ su ƃɛ́i Kena-ŋai díkaa naai.

¹¹Deeƃé fé surɔ̂ŋ kpaa nɛnî da ŋɛ́i malôŋ káa ní a dɔnɔ kpîŋ. À kâa mò ǹyɛɛi, “À kɛ̀ ŋà núu da lɛ̀ɛ a vúlu ɣele da, a pâi liî Gâa a m̀ɛnii gɛi duŋ.” Deeƃé a kâa too-ma kɛ̀ kpɔ́ a tãi kélee Felesia.

¹²Kɛ́lɛ Âke è kɛ̀ kpɔ́ a ǹáa a Deeƃé gɛ̀ mò ǹyɛɛi, “Gɛ̂ɛi yɛ̂ɛ sɛŋ ƃé Deeƃé ŋɔnûai Eezuɛ-ŋai líi ŋ̀wânai kpɔ́ ma a ŋ̀ánaa. É síɣe sâa ma a pâi tíi kɛ̂i ḿî.”