Read Kpelle Samia Maa-ŋuŋ 28 Bible Online

Samia Maa-ŋuŋ 28 - Kpelle bible

Samia Maa-ŋuŋ 28

¹Ɣele tɔnɔ da, Felesia-ŋai dí díkɔ-kuluƃa-ŋai ŋáa tɛ̀ gîe ma a gɛ́ɛ dí kɔ́ pɛ́lɛ Eezuɛ-ŋai dîa. Âke è mò Deeƃé ma ǹyɛɛi, “Kɛ́rɛei í gɔ́lɔŋ a gɛ́ɛ fɛ̂ɛ ka íkɔ-kuluƃa-ŋai ká kɔ́ Felesia kɔ-kuluƃa-ŋai ƃéla ma pere.”

²Deeƃé ǹyɛɛ m̀ai, “Tɔ̃yâ ƃe. Ya pâi gâai berei kwa kɔ̀ la a ǹɛ́lɛɛi!” Âke ǹyɛɛ m̀ai, “À kɛ̀ tí, gɛ̀ ní mɛni lɛ́lɛɛ ká tí, ka íkɔ-kuluƃa-ŋai ka pâi kɛ̂i a ḿɛi káa-ƃela tãi nɔ́ ŋ́gaa la ɣele mai.”

³Samia kɛ́ɛ a saai, nûa dí kùla Eezuɛ m̀éla kélee ma dí lí zaa kûu kɛ̂i bɔ́-taai Lama. Sɔ̂ɔ káa wɔ́lɔ kɔ̂i a gɛ́ɛ diai da lòno zaa-ƃelai dímɔ̂leŋ pɔ́ da dɛli-kpɛ-ƃelai kpɛ́ ǹɔii tí ma.

⁴Felesia-ŋai dí lì Suŋ-nɛŋ dí díƃûui pú naa. Sɔ̂ɔ è Eezuɛ kɔ-kuluƃa-ŋai ŋáa tɛ̀ gîe ma dí díƃûui pú Giboa.

⁵Sɔ̂ɔ è ŋɔ́nɔ Felesia-ŋai díkɔ-kuluƃa-ŋai kàa é pɛ́lɛ yaôi gɛ́ kpɛ̃liŋ.

⁶È Yâwɛɛ marê kɛ̀ m̀ɛnii ma a pɔri gɛ̂i. Kɛ́lɛ Yâwɛɛ fé ŋ̀óo su too ní a see-woo su kpaa máŋ a Uliŋ da Tumiŋ, kpaa máŋ a Ɣâla ŋɔlóno kɛ́-nuu da.

⁷Sɔ̂ɔ è mò ńyee mu-ƃelai dîa ǹyɛɛi, “Ka nɛnî da kɔ́ri mî nyíi a lono saa nûu mɔleŋ pɔ́ a gɛ́ɛ ŋá m̀arê kɛ́ é kili ŋa pono tɛɛ ḿbɔ m̀ɛni-ŋai kɛ̂i m̀ɛni ma.” Dîyɛɛ m̀ai, “Nɛnî tɔnɔ káa Ɛɛdɔ taai su.”

⁸Nya ƃe Sɔ̂ɔ è ŋɔkâloŋ seɣe-ŋai kùla ma é seɣe da kpɛ́ni tóo gɔŋ ma. Da kpakolo feerɛ dí lì ǹɛnîi kpîŋ pɔ́-naa a gbínii. È mò ǹɛnii ma ǹyɛɛi, “Ye lóno mî m̀ɔlêŋ pɔ́ nyíi ŋa pâi ǹáa tôlii, í ǹɛɛ naa ŋá lóno bɔ́.”

⁹Ǹɛnîi ǹyɛɛ m̀ai, “Í gɔ́lɔŋ kpɔ́ a ǹɛ́lɛɛ a gɛ́ɛ Gâloŋ Sɔ̂ɔ aâ diai kélee da lòno saa mɔleŋ-ŋa pɔ́ da dɛli-kpɛ-ƃelai kpɛ́ Eezuɛ lɔii ŋí ma. Gɛ̀ ní léŋ ŋaŋ ƃé ya ƃáre tɛ̂i la ḿberêi a gɛ́ɛ ŋ́uŋ lá é píli kpɛ́nii?”

¹⁰Kɛ́lɛ Sɔ̂ɔ è vòo ǹɛnîi yêei Yâwɛɛ ŋɛ́i ǹyɛɛ m̀ai, “É folôŋ kpɔ́ yâ. Yâwɛɛ káa ɣele ma a tɔ̃yâ. Núu da kélee fé pâi mɛni da kɛ̂i a yá nyíŋi mɛni ma.”

¹¹Ǹɛnîi ǹyɛɛ m̀ai, “Gbɛ̂ɛ ƃé ya ŋ̀wɛ̂lii ŋá dóli é pá í lóno bɔ́i?” È ǹyɛɛ mai, “Samia ƃe.”

¹²Ǹɛnîi kɛ́ɛ a Samia káai, è làɣi kpɔ́ a ŋ̀óo su kɛ́tɛ Ǹɛnîi ǹyɛɛ mai, “Sɔ̂ɔ, lé mɛni ƃé ya ḿbɛlɛ̂i lai? Yá ƃa Sɔ̂ɔ.”

¹³Gâloŋ ǹyɛɛ m̀ai, “Ífe yao. Kɛ́lɛ lé ƃé í gâai?” Ǹɛnîi ǹyɛɛ m̀ai, “Ŋa mɔleŋ kâai gɛ́ kùla ǹɔii mu.”

¹⁴Sɔ̂ɔ ǹyɛɛ m̀ai, “Gɛ́ pere kɛɛ̂i léŋ?” Ǹɛnîi ǹyɛɛ m̀ai, “Gáa a siɛ-pɔlɔ, yokpo kɛ́ ƃò gɔŋ ma. A mu siɣêi.” Sɔ̂ɔ è gɔ̀lɔŋ a gɛ́ɛ Samia ƃé kɛ̀ la. È làa kpɔ́ ǹɔii ma ŋ̀ɛ́i túɛ é ŋuŋ ma pîlaŋ.

¹⁵Samia è mò Sɔ̂ɔ ma ǹyɛɛi, “Lé mɛni ƃé íkaa nɔ́ la ḿbôlu íkɛ gɛ̀ ŋ́gɛ mu siɣei?” Sɔ̂ɔ ǹyɛɛ m̀ai, “Ŋ́gaa mɛni kpɔ̂lu su. Felesia-ŋai da kɔ̂i ḿbɔ. Ɣâla aâ bôlu tɔ̀ɔ ḿâ. Vé ŋ́oo su toôi a dɔnɔ kpîŋ. Vé kpîŋ ŋ́oo su toôi Ɣâla ŋɔlóno kɛ́-ƃelai da sarâi kpaa máŋ see-woo su. Mɛni ma ŋa ítòli a gɛ́ɛ í m̀ɛnii lɛ́ ḿâ ŋa pɔri gɛ̂i.”

¹⁶Samia ǹyɛɛ m̀ai, “Lé mɛni ƃé ya marê kɛ̂i la, íkɛ gàa Yâwɛɛ aâ bôlu tɔɔ yâ a kɛ́ a íkpɔara-nuui?

¹⁷Yâwɛɛ a m̀ɛnii kɛ̂i nyíi è mò yâ ńzarâi naa túɛi. Yâwɛɛ a gâloŋ-laai kúla íyêei a dɛɛ íkɔlɛ ma-nuui Deeƃé pɔ́.

¹⁸A gɛ́ tí, kpɛni fêi, ífe íwoli tɔɔni ma í mɛni-ŋai kɛ́ è mò yâ a gɛ́ɛ í gɛ́ a Amalɛka-ŋai. M̀ɛni ƃé a sâa mɛni-ŋai ŋí kɛ̂i la a yá.

¹⁹Yâwɛɛ a pâi ítɛɛ̂i Felesia-ŋai pɔ́ ka Eezuɛ-ŋai. Ka ílônii-sinaai ka pâi pâi ḿbɔ naa saa táa ƃɛ́. A pâi máŋ Eezuɛ kɔ-kuluƃa-ŋai tɛɛ̂i máŋ Felesia-ŋai pɔ́-naa.”

²⁰Sɔ̂ɔ kɛ́ɛ a Samia wóoi ŋí mɛ́nii, è tòo ǹɔii ma a m̀aa félaa é sã́a gɛ́ kpɛ̃liŋ, kpɛni fêi, è kɛ̀ kpɔ́ yaôi a ŋ̀ánaa. È kɛ̀ foâi, kpɛ́ni fêi, vé niî kɛ̀ mii-sɛŋ da mii ní a kpínii da maa ɣelei tí.

²¹Ǹɛnîi è páai, è Sɔ̂ɔ kàa gɛ́ ƃò lâani gɛ́ kpɛ̃liŋ ǹyɛɛ m̀ai, “Ye gáa berei íyee-mu nɛnii è íwoo mɛni lai. Ŋa ŋáfulu-laai sèe a sɛ́ɣɛ a gɛ́ɛ m̀ɛni í mò ḿâi ŋá ŋ̀aa-see kɛ́.

²²M̀ɛni ma, ye íwoli tɔ́ɔ m̀ɛnii a ńyãai íyee mu-nɛnii ŋa pâi m̀ôi yâi. Tɔɔ ŋá mii-sɛŋ loŋ kpɛtɛ í mii íkponôi é kpanaŋ a da-loŋ í lí ípɔ-naa.”

²³Kɛ́lɛ Sɔ̂ɔ fê fáa ní ma a dɔnɔ kpîŋ. Ǹyɛɛ ǹɛnîi mai, “Ḿve pâi sɛŋ da kélee wɛ̂lii.” Ǹyée-mu-ƃelai dia máŋ dí lòno bɔ́. È ŋ̀óli tɔ̀ɔ dîa. È mù sìɣe ǹɔii ma é sée gbìŋ ŋá.

²⁴Niŋa-loŋ ƃɔlɔɔ tɔnɔ è kɛ̀ nɛniî yêei ŋɔpɛ́rɛi lá. È bàa a m̀aa félaa é zu tée-tèe. È felaƃa sìɣe é ǹyɔ́ɔŋ é gbɛtɛ a kpólo. Kɛ́lɛ vé tɛ́-sɛŋ da pú ní zui.

²⁵È zèe Sɔ̂ɔ da ǹyée mu-ƃelai ŋɛ́i dí mìi. Dí lì pôlu a maa kpinii tí.