Read Kpelle Samia Maa-ŋuŋ 3 Bible Online

Samia Maa-ŋuŋ 3 - Kpelle bible

Samia Maa-ŋuŋ 3

¹Ŋ̀ele-ŋai tí ma Yâwɛɛ fa kâa lòno nɔ́ tí núu da pɔ́ kpaa máŋ é kúla núu da ŋɛ́i seêi pere. Tãi tí ma Samia è kɛ̀ tíi kɛ̂i Yâwɛɛmì Ilai yée mu.

²Maa tãi tí, Ilai è kɛ̀ bɔlɔɔ ŋ̀ɛ́i fa ŋɔ́nɔ kwaa kâa a ǹɛ́lɛɛ. Kpíni tɔnɔ da Ilai è kɛ̀ lâani ŋɔgbìŋ ŋá gɛ́ nyìi.

³Samia ǹyaa máŋ è kɛ̀ lâani Yâwɛɛ ŋɔpɛ́rɛi mu Gbanaŋ-woo-kɛɛ gãlai kɔlɛ gɛ́ nyìi. Ɣele é kɛ́ɛ a pá pâi ƃɔi kɛ́lɛ ŋ̀ɔŋ kɛ́ niî soŋ

⁴Yâwɛɛ è Samia tòli ǹyɛɛ m̀ai, “Samia! Samia!” Samia ǹyɛ m̀ai, “Ńyãa ká ŋí.”

⁵Samia è lì Ilai pɔ́-naa a kîrɛ ǹyɛɛ m̀ai, “Ńyãa ká ŋí. Yɛ̂ ŋá lé kɛ́?” Kɛ́lɛ Ilai è mò ma ǹyɛɛi, “Fé ítoli ní. Lí í láa.” Nya ƃe Samia è lì pôlu é láa.

⁶Yâwɛɛ è ŋɔ́nɔ Samia tòli. Samia è mù sìɣe é lí Ilai pɔ́-naa ǹyɛɛ m̀ai, “Ńyãa ká ŋí í ńdôli.” Ilai ǹyɛɛ m̀ai, “Fé ítoli ní ńoŋ. Lí í láa.”

⁷Samia fé kɛ́ ní niî a Yâwɛɛ kɔ́lɔŋɔɔ, kpɛ́ni fêi, Yâwɛɛ fé niî kɛ̀ lóno ní bɔ́ a bɔlɔ.

⁸Yâwɛɛ è Samia tòli ŋɔ́nɔ a tãi zaaƃa-ɣelei. È mù sìɣe é lí Ilai pɔ́-naa ǹyɛɛ m̀ai, “Ńyãa ká ŋí í ńdôli.” Ilai è nâa gɔ̀lɔŋ a gɛ́ɛ Yâwɛɛ ƃé kɛ̀ lônoi Samia pɔ́.

⁹Nya ƃe è mò Samia ma ǹyɛɛi, “Lí í láa. À kɛ̀ a ŋɔ́nɔ ítoli, m̀ó ma yɛ̂i, ‘Lóno, Yâwɛɛ, íyee mu-nuui a íwoo mɛnii.’ ” Samia è lì pôlu é láa.

¹⁰Yâwɛɛ è Samia tòli a ǹáaŋ ɣelei ǹyɛɛ m̀ai, “Samia! Samia!” Samia ǹyɛɛ m̀ai, “Lóno, íyee mu-nuui a íwoo mɛnii.”

¹¹Yâwɛɛ ǹyɛɛ m̀ai, “Gáa, ŋa pâi mɛni da kɛ̂i Eezuɛ lɔii su nyíi ǹúui kélee pâi mɛnii a pâi kpɛ̃lînii.

¹²Maa ɣelei tí ŋa pâi Ilai kula maa kɛ̂i da ŋɔpɛ́rɛi mu-ƃelai yɛ̂ɛ berei ŋá mò la m̀ai é kúla gɔ́ɔ pîlanii é tóo gbɛɛ ŋái ma.

¹³Ŋa môi m̀a a gɛ́ɛ ŋa pâi gula maa kɛ̂i da ŋɔpɛ́rɛi mu-ƃelai wɔ́lɔ-wɔlɔ da wɔlɔ-wɔlɔ. Vé ǹônii ŋáa kɔ̀ŋ ní a ǹɛ́lɛɛ. Dí mɛni nyɔ́mɔɔ támaa kɛ̀ a Ńyãa.

¹⁴Mɛni ma, ŋa ŋ́gono tée a gɛ́ɛ ŋá gula maa kɛ́ da ŋɔpɛ́rɛi mu-ƃelai. Sâla kuláa da sama-sɛŋ tɛɛ fé pâi díkula maa kɛ́-mɛnii kperâi.”

¹⁵Samia è làa é lɛ́ɛ la zu ɣele é ƃɔ́. È mù sìɣe é ŋ̀âla-pɛrɛ kɛ́tɛi lá ƃó a ŋ̀ele-walai. È kɛ̀ yaôi a gɛ́ɛ é zĩai su-wooi ƃó Ilai ma.

¹⁶Kɛ́lɛ Ilai è Samia tòli ǹyɛɛ m̀ai, “Ńoŋ Samia,” Samia ǹyɛɛ m̀ai, “Ńyãa ká ŋí.”

¹⁷Ilai ǹyɛɛ m̀ai, “È kɛ̀ yâ lé? Ífe ǹoo ḿâ. Yà gɛ̀ tí, Ɣâla a pâi íkula maa kɛ̂i a ŋ̀ánaa.”

¹⁸Nya ƃe Samia è m̀ɛnii kélee ƃò mà. È mò mà ǹyɛɛi, “Ǹyaa ƃa Yâwɛɛ. Tɔɔ é m̀ɛnii kɛ́ zãâi ŋ̀ɛ́i.”

¹⁹Samia è ƃɔ̀lɔ Yâwɛɛ kɛ́ ƃò gɔlɛ ma. Vé wɔ́lɔ ǹɛɛ ní naa Samia wóo é tóo kpɛ́ni-kpɛni.

²⁰Eezuɛ-ƃelai kélee dí gɔ̀lɔŋ a gɛ́ɛ Samia è kɛ̀ a Yâwɛɛ ŋɔlóno kɛ́-nuu kpîŋ, é kúla ǹɔii m̀éla dɔnɔ ma é tóo gbéli ma.

²¹Yâwɛɛ è kùla Samia ŋɛ́i Silo a tãi tɛi-tɛi é m̀ɛni-ŋai ƃó mà maa nɛ̃ɛ̂i kɛ̀ é m̀oi. M̀ɛni-ŋai Yâwɛɛ è m̀o Samia mai Samia è gélee ƃo Eezuɛ-ŋai dîa. Ǹyaŋ dí díwoli tɔ̀ɔ ma.