Read Kpelle Samia Maa-ŋuŋ 8 Bible Online

Samia Maa-ŋuŋ 8 - Kpelle bible

Samia Maa-ŋuŋ 8

¹Samia kɛ́ɛ a pɔlɔi, è ǹônii sinaai kɛ̀ a Eezuɛ-ŋai láa-tuɛ-ƃela.

²Ǹóŋ surɔŋ duɛ-tuɛi láa ƃé kɛ̀ a Zoɛɛ. Ǹêɣe láa kɛ́ ƃò a Abiza. Díkɛ a mɛni-sâa ƃó-ƃela Bɛɛsiba mɛni ma.

³Kɛ́lɛ dítûa pere fé kɛ́ ní yɛ̂ɛ dínâŋ. Dífe kɛ́ ní a teniŋ-ƃo-ƃela. Da kâa yee-pɛlɛ ǹá-sɛŋ sòŋ, nyíi gɛ̀ dífa kâa mɛni-saa ŋá tèe a tɔ̃yâ perei.

⁴Nya ƃe Eezuɛ láa-tuɛ-ƃelai kélee dí díŋaa tɛ̀ ma dí pá Samia pɔ́-naa Lama.

⁵Dí mò ma dîyɛɛi, “Gáa, ƃa nâa kɛ́ pɔlɔ̂i, ǹyaŋ ílônii dífe tûai yɛ̂ɛ yá. M̀ɛni ma, ye kâloŋ da lɛ́ kûa é kɛ́ kúmɛi yɛ̂ɛ berei kúkɔlɛ ma lɔii kpiniŋ-ŋai díkaa lai. Ye kâloŋ lɛ́ kúmaa mɛni ma.”

⁶Samia kɛ̂ɛ a díwooi ŋí mɛnii, nìí è tòo kpɔ́ pôlu a ŋ̀ánaa. Nya ƃe è Ǹuu-namui fɛ̀li mɛnii ŋí ma.

⁷Ǹuu-namui è ŋ̀óo su tòo ǹyɛɛ m̀ai, “Samia, ye mɛnii kélee kɛ́ da pâi m̀ôi yâi. Ńyãa kpîŋ ká ŋí da díyee kúla mu a díkâloŋ.

⁸É síɣe ŋ̀elei ma ŋa ŋánûai kùla la Ize-lɔii sui, da wɔ́lɔ kula ḿbôlu da tínaŋ ɣâla da kpɛ́ni pɔ́-naa pere. Ǹyaŋ díkaa nâa kulâi ípôlu.

⁹Ye mɛni-ŋai kélee kɛ́ da pâi m̀ôi yâ a gɛ́ɛ í gɛ́i. Kɛ́lɛ ye dília-wôo ƃó, í tela ǹɛ́ dîa berei gâloŋ a pâi tûai la a diai.”

¹⁰M̀ɛnii Ǹuu-namui è mò Samia mai, Samia è mò ǹûai dîa nyíi-ŋai kɛ̀ marê kɛ̂i.

¹¹“À kɛ̀ ka kâloŋ siɣe, bere ƃé a pâi tuai la a káa. A pâi kálônii siɣêi é díkɛ a ŋɔkɔ́ kɔ́-ƃela. Da-ni da pâi kɛ̂i a ŋɔkɔ́ kɔ́-keleŋ sia-ƃela. A pâi kɛ̂i seêni soo mɛi da-ni díkɛ kîrɛ siɣe la, gbeli-ŋai díkɛ kîrɛ siɣe ŋɔkɔ́ kɔ́-keleŋ-ŋai túɛ pere.

¹²Díta-ni da pâi kɛ̂i a núu kpaya-kpaya-ŋa kɔ́ kɔ́-ƃela wála tɛi-tɛi mai. Díta ni-ŋaa da pâi kɛ̂i kɔ́ kɔ́-ƃela buu lɔ́ɔlu mɛi. Dí-ni da pâi kɛ̂i máŋ gâloŋ ŋɔkpâlaŋ ŋá díkɛ ŋɔmii-sãai ŋáa tɛ̀ gîe ma. Da-ni da pâi kɛ̂i ŋɔkɔ́ kɔ́-sãai kpɛtɛ̂i da ŋɔkɔ́ kɔ́-keleŋ-ŋai.

¹³Kálônii-nɛyãai da-ŋa da pâi kɛ̂i wúru-ya kúŋ nɛ̃ɛ-ŋa kpɛtɛ̂i mì, da-ŋa díkɛ mii-sãa kpɛtɛ da-ŋa díkɛ ŋɔkpóloi kpɛ̀tɛ.

¹⁴Gâloŋ kpîŋ a pâi kátii kɛ́ kwaa lɛ́lɛɛ-ŋai siɣei, kákpɔmɔ-ƃa kpalaŋ-ŋai da káwulɔ-wuru kpalaŋ-ŋai é dítɛɛ ŋɔtíi mɛi-ƃelai pɔ́.

¹⁵A pâi kámii-sãai buu ɣelei siɣei da kákpɔmɔ ƃai é dɛ́ɛ ŋɔtíi kɛ́-ƃelai da dímɛi-ƃela pɔ́.

¹⁶A pâi káluɛ-ŋai siɣei da ká ǹyaŋkpa lɛ́lɛɛ-ŋai é pɛ́lɛ kásoo-fáleŋ-ŋai a gɛ́ɛ díkɛ tíi kɛ̀ mì.

¹⁷A pâi máŋ káƃála-ŋai da káƃoli-ŋai buu ɣelei siɣei mì. Ka pâi kɛ̂i a ŋɔluɛ-ŋa.

¹⁸À kɛ̀ tí, ka pâi wɔ̂lɔi Ǹuu-namui ma a gɛ́ɛ é kákula ǹyêei. Kɛ́lɛ vé pâi káwoo su too, kpɛ́ni fêi, ǹyaa ƃé ká kɛ̀ ŋ̀wɛ̂lii.”

¹⁹Kɛ́lɛ dífe díwoli tɔ̀ɔ ní Samia ma a dɔnɔ kpîŋ. Dîyɛɛ m̀ai, “Kpao, Kwa wɛ̂lii kú kɛ́ yɛ̂ɛ ǹɔii kpiniŋ-ŋai díkaa kúkɔlɛ mai. Kwa kâloŋ wɛ̂lii nyíi pâi tɔɔ̂i kútuɛ é lí a kúa kɔ́ kɔ́-ɣene ŋái.”

²⁰Samia è ŋ̀óli tɔ̀ɔ kpɔ́ dîa a ǹɛ́lɛɛ. M̀ɛnii kélee dí mò m̀ai, è ǹáa seri kpɔ́ Ǹuu-namui ma yɛ̂ɛ berei nɔ́ dí mò la m̀ai.

²¹Samia è ŋ̀óli tɔ̀ɔ m̀ɛni-ŋai kélee ma ǹûai dí mòi é lí é m̀ó Ɣâla Yâwɛɛ ma.

²²Ɣâla Yâwɛɛ ǹyɛɛ m̀ai, “M̀ɛnii kélee da mò yâi, ye gɛ́. Kâloŋ tɛɛ dípɔ.” Samia è nâa mò ǹûai dîa a gɛ́ɛ dí lí pôlu dípɛrɛ-ŋai lá.