Read Kurada Maki 15 Bible Online

Maki 15 - Kurada bible

Maki 15

¹Iꞌahuꞌahubena na taupwaoliwo mwalaꞌidi yo tauꞌulewahiwo yo loina adi tauveꞌitao yo tauloinao maudoidi hitauꞌahaiyama ta hiloiloina Yeisu vehabana, na nimana hipaidi ta hilalaweine tauloinane Pailato ainai, ta ebeha Pailato iya iloina.

²Na Pailato Yeisu ipanivilaei, iwalo, ‘Uwalo mahalava owa Yudeya yadi tauwasawasa?’ Na Yeisu iwalo ‘Neta bada uwaloꞌo’.

³Ta taupwaoli mwalaꞌidiwa ginauli bagibagilidi vehabadi Yeisu hiveveꞌewaine.

⁴Eeta Pailato Yeisu ipanivilauyoi, iwalo, ‘Vedova ta nigele yam maihane? Walo mahalava teina, am veꞌewa vehabana ubenalenaꞌo?’

⁵Na Yeisu nigele teya hinage yana walo. Ainaena Pailato nuwana ipwanopwano mwalaꞌina. Hiloina ebe Yeisu hiꞌoiye mwalowoi

⁶Bolimai ehebo ehebo, Buidiꞌwa guyauna ana hauga ainai, loina himwauwi neta vada paipaiyena ehebo tomowa ilivahi vehabadi na imahalava, ebe iya boda hivesinuwaei.

⁷Hauga tenem ainai tupwadi Loma adi tauꞌalehao vada paipaiyai himiyamiya, wuwuna nigele nuwadi Loma yadi loina, ta hiꞌalehaidi, na ehebo yehana Balabasi alehane holanai tomowa iꞌoiye mwalowoidi. Eeta Lomaone Balabasi maꞌana geluwo hiꞌabi avivinidi ta vada paipaiyai himwamwauwidine.

⁸Ta boda hitauꞌahaiyama, na hiꞌawanoi Pailato ainai, hiwalo, ‘Howahowana yo ehebo towaho ulivahi vahabamai, dova yama awanoi upaipaihowai bolimai ehebo ehebo aidiyai?’

⁹Na Pailato iwalo aulidi, ‘Nuwanuwamiu ebe Yudeyaone yami tauwasawasa yalivahi vehabamiu, awa?’

¹⁰Wuwuna Pailato ihanapuiyaꞌo ebeha taupwaoli mwalaꞌidi yadi alomagigiliyena Yeisu hilauvaiyama habi oiyemwalowoina.

¹¹Na hesi taupwaoli mwalaꞌidi bada tomowa nuwatuwu yababadi hivenuwamwauwediꞌo aidiyai, ainaena Yeisu hitaꞌwataꞌwataei na Balabasi hesi yehana hiꞌataꞌatai na ebe ilivahi vehabadi.

¹²Na Pailato iwalo aulidi iwalo, ‘Hava nuwanuwamiu ebeha omiu Yudeya yami tauwasawasa ainai yapaihowai?’

¹³Na hilohagali, hiwalo, ‘Aiwa lagalagana ainai tatutuye patu!’

¹⁴Na Pailato iwalo, ‘Hava yede yana pwanoli ta ebe mwalowo ilobai?’ Na hiyoga mwalamwalaꞌi, hiwalo, ‘Aiwa lagalagana ainai tatutuye patu’.

¹⁵Eeta Pailato nuwanuwana yo boda iꞌabiye yaliyayadi ta Balabasi ilivahi, na yana tauꞌalehao iloinaedi yo Yeisu balavaiyena hisapi na mulitai abo hitutuye patu aiwa lagalagana ainai. Tauꞌaleha Yeisu hiꞌabitalawahiyei

¹⁶Pailato yana tauꞌalehao Yeisu hisapi na hilauvai ta yana vadai hiluluwuweine, neta tauꞌalehao yadi tupwa mwalaꞌina vada holanai, na tauꞌalehao yadi boda maudoidi hiyoga ahaidima.

¹⁷Na wasawasao adi aleꞌo hawahawawalina ainaena Yeisu hiveveliꞌwane na ana pwaopwaomi talitali ainaena hiꞌabilawei ta uluꞌulunai himwamwauwine.

¹⁸Na hiꞌabiꞌabitalawahiyei hiwalo, ‘Yauwedo, owa Yudeya yadi tauwasawasa!’

¹⁹Na hinage digona ainaena Yeisu vahunai higoha, na hihowahowai, na talawahiyena mehenai hipwagogo.

²⁰Na yadi talawahi iꞌovi, ta aleꞌo wasawasa ainaena hilivahi, na ibom ana aleꞌowa hiveliꞌwauyoi, na himahalavaei habi tutuye patuna. Yeisu hitutuye patu aiwa lagalagana ainai

²¹Dalava mwalaꞌina ainaena himahalava, ta ehebo Sailini towahona nuꞌulaena ilaolaoma hilobai, ta hiloinaei na Yeisu ana aiwa lagalagana iꞌavalai, towahonane yehana Saimoni, na iya Alekisana yo Luposi tamadi.

²²Yeisu hilalaweine tupwa Goligota ainai (Goligota ana hanapu neta Uluꞌulu dalavana).

²³Na mulamula himomoheine, neta waini mulo baidana yo ebe havena muya ilaulautowoi mwalaꞌina, na Yeisu itaꞌwataꞌwataei.

²⁴Eeta aiwa lagalagana baleꞌuwai himwauwi na Yeisu ainai hitutuye patune, na maꞌana aiwa lagalagana hivetowolone. Mulitai tauꞌalehaowa Yeisu ana aleꞌo hivaidi, ta hiveguyauwedi hibom aidiyai, na yadi veguyau dova kati ana aiꞌopiꞌopi ainaena, ta ebe yaiya imugai ana aleꞌo ehebo ivai.

²⁵Haugana Yeisu hitutuye patu neta malatomtom ana ahiꞌahipu ainai.

²⁶Na ana aiwa lagalagana ainai hilelelene, ‘Yudeya yadi tauwasawasa’. Neta yana mwalowoi wuwuna.

²⁷Na hinage tauꞌaivavali bwau hitutuye patudi adi aiwa lagalagao aidiyai ehebo Yeisu nimatautuwanaena na ehebo nimaꞌehaꞌehanaena.

²⁹Na tomowa tupwadi amwahaena Yeisu aiwa lagalagana ainai hiꞌabitalawahiyei, na himalumaluwei hiwalo, ‘Aha! Uwalo ebeha howahowam vada tapwalolo uloꞌe, na ahubena tonuga aidiyai uꞌabiuyoi.

³⁰Hola uhaguiyoigo na aiwa lagalaganaena uꞌaituluma.’

³¹Na hinage taupwaoli mwalaꞌidi yo loina ana tauveꞌitao hibom aidiyai hiwalowalo gagasa, na Yeisu hitalawahiyei hiwalo, ‘Vali tomowa ihaguidi, na iya nigele!

³²Ibom ebeha Besinana na Isileli ana tauwasawasa, hola aiwa lagalagaena iꞌaituluma na taꞌita yo tayemidiyei.’ Na tauꞌaivavaliwowa Yeisu baidadi hitutuye patudiwa hinage yadi aiwa lagalagaena hiyogalau na Yeisu hiwalo yagai. Yeisu imwalowoi

³³Mahana alaꞌalapwahiyai, tupwa maudoina iguguyou ta ana higa lavilaviyai.

³⁴Na lavilaviyai Yeisu alinana mwalaꞌina ainaena iyoga, na iwalo, ‘Eloi, eloi lama sabakitani’, na ana bui neta, ‘Yagu Yaubada, yagu Yaubada, hava vehabana ulaugabaigaune?’

³⁵Na tupwadi tomowa vahalinai hitowotowolo yana yoga hibenalei, ta hiwalo, ‘Ambenalei Elaitiya iyogayogaeine’.

³⁶Eena ehebo aidiyena isagena, ta balou ivai, na waini abeꞌabelena ainai ivedaꞌwa, na ehebo aiwa mehenai iwomali, ta iveleleihini Yeisu awanai, ta imalaꞌuꞌuine. Na towahonane iwalo, ‘Hola tahaꞌwahaꞌwa, nuwana mata Elaitiya ilaoma na aiwa lagalagaena ihagui’.

³⁷Na Yeisu iyoga mwalaꞌina, ta yawahina iꞌoꞌovine.

³⁸Na aleꞌowa vada tapwalolo ana biliwutuhi ilotapulihi bwau, ewanaena ta idobi duyanai.

³⁹Na tauꞌaleha adi taumugai aiwa lagalagana mehenai itowotowolo Yeisu yana mwalowoi ana ita teina dova iꞌiꞌitane, ta iwalo, ‘Moiha towaho teina Yaubada Natuna’.

⁴⁰Tupwadi waiwaihiu amwaha daodaowena hivinuvinunu, neta Meli Magidalaena mayana waligeha, iya Yosa yo tahina alomauna Yemesa hinadi, yo Salome hinage.

⁴¹Hiya mwalona Yeisu himulitaei na ana hipapaihowaine yana taꞌiꞌili Galili ainai, na tupwadi waiwaihiu hinage Galiliyena Yeisu baidanao hihaema Yelusalem ainai, maudoidi hivinuvinunui. Yeisu ana mwau magaiyai

⁴²Bada lavilaviꞌo na hiꞌatububuni vali ahubena vehabana, neta Yudeyao yadi Tapwalolo.

⁴³Eeta ehebo towaho Alimatiyaena, yehana Yosepa ilaoma, iya ehebo Yudeyaone yadi taumugai mayana yemidi, na ihaꞌwahaꞌwa aiteya hauga Yaubada baleꞌuwai ivetauloina. Yosepawa ilaoma na mayana atepatu iluwu Pailato mehenai, na Yeisu tauna mwalomwalowoina iꞌawanoiyei yo ebe imwauwi magaiyai.

⁴⁴Pailato iꞌaluwagavai, iwalo, ‘Ae! Yeisu bada imwalowoiꞌo?’

⁴⁵Na towahonane iwalo, ‘Oo, bada imwalowoiꞌo’. Eeta Pailato italam yo Yosepa Yeisu tauna mwalomwalowoina ivavaine.

⁴⁶Na Yosepa aleꞌo hewahewana igimwalai, na ivai, ta mayana taumulitao Yeisu tauna mwalomwalowoina aiwa lagalagana ainaena hivaiꞌaituluwenama, na aleꞌonane ainaena hihuhumane, na mulitai abo magai ainai himwamwauwine. Na magainane dova duluva gaima holana yatuyatu nonovaina, na gaima mwalaꞌina na poꞌupoꞌuwana ainaena magai awana himwauꞌauhine.

⁴⁷Na Meli Magidalaena yo mayana waligeha, iya Yosa hinana, baidana hiꞌitaꞌita sipwaidi, na magaine ainai tauna mwalomwalowoina himwauwine hiꞌiꞌitane.