Read Kurada 1 Kolinita 10 Bible Online

1 Kolinita 10 - Kurada bible

1 Kolinita 10

¹Tahiguwao tubudao amnuwatuwu avivinidi ebeha mwalona hauganane ainai balabala awawai hilaulau, yaloyalovi ainaena Yaubada imugamugaiyedi, na hinage niꞌu holanaena yadi amwaha ipaihowai na ainaena higeyoꞌawa vali tupwai.

²Eena yaloyalovi yo niꞌu aidiyena yadi bapitaiso hilobai ebeha Mosese ana taumulitao.

³Na hinage adiwa yo adi bwahi maudoina galewaena hilobaidi aluꞌaluwadi vehabadi

⁴Na adi bwahi hivaivaidi gaima ehebo ainaena, na gaimanane galewaena baidadi hilaulau, yehana Besinana.

⁵Na hesi Yaubada nigele iyayaliyaya tubudaone vehabadi, ainaena nuꞌulai himwalowoi, na wagawagadi nemai hilaugabaidine.

⁶Hiya abaꞌita alidai na havena pwanoli vehabana tanuwanuwatuwu.

⁷Na hinage havena tapwalolo vagana adi abayemidi aidiyai, dova hiya nuꞌula awawai hipapaihowaine. Buki Veꞌahihi ainai hiya vehabadi iwalo mahalava, iwalo, “Tomowaone himiya na hiꞌaiꞌai na hinumanuma, na mulitai hitowolo na hipaihowa awaꞌawawa”.

⁸Na hinage hipwanopwanoli, ainaena ahubena ehebo ainai hitau 23,000 aidiyena Yaubada iꞌoiye mwalowoidine. Teina abaꞌita alidai yo ebeha havena tapwanopwanoli.

⁹Na hinage Yaubada ana tauꞌwataꞌwata himwauwi na weso ainaena iꞌoiye mwalowoidine. Teina iveꞌitagita ebeha havena hinage ita tapaipaihowai dova.

¹⁰Na hinage Yaubada hiꞌulumiyanei, na ehebo tausagenawasa ivetamalenama na iꞌabiye yababadi yadi ulumiyaine vehabadi. Abaꞌita teina alidai na ebeha havena taꞌuluꞌulumiyai.

¹¹Abaꞌitane teina maudoina Buki Veꞌahihi ainai hileledi na ebeha teina taꞌi ita yaso mulimulitada maihane vitaidine alidai tanuwatuwu avivini, na havena lauhapuline tapaipaihowaidi.

¹²Eeta ebe yaiya owa unuwanuwatuwui ebeha mayam wahiyala utowotowolo, uꞌita avivinigo na havena utapitapiya,

¹³wuwuna abatowoine aidiyena Tomodulele itowotowoigomiu, maudoida itowotowoigita dova, na hesi Yaubada yana loina imwauwi na havena Tomodulele itowotowoi alaꞌalabiliyegita, na ebe taꞌalamaꞌiꞌita howola abo amwaha namwanamwana iveꞌitagita na ainaena abatowoine tawahiyala gabaedi.

¹⁴Augeluwo, nuwanuwagu na vali abayemidi amtaꞌwataꞌwataedi.

¹⁵Omiu mayami nuwamasele, ainaena yagu walo teina vehabana amnuwanuwatuwu mwalaꞌina.

¹⁶Wuwuna ebe numa masemaselena vehabana taꞌawa yauwedo Yaubada ainai na tanuma, neta Besinana ꞌwahinana iꞌabiye namwanamwagita na Besinana baidada tavetoyatoyawa. Dova beledi, ebe taꞌabi tomwahi na taꞌai, beledinane ainai Besinana baidada talau eheboꞌo, wuwuna iya tauna taꞌaꞌaine.

¹⁷Beledine ehebo ainaena maudoida taꞌai, ainaena Besinana tauna ainai taveboda ehebo.

¹⁸Dova Isileli maudoidi yadi pwaoliwo hiwunuidi Yaubada vehabana na hiꞌaidi, eena Yaubada baidadi hiveboda ehebo.

¹⁹Moiha taꞌi, aiꞌaine hiya taumiya ganamuli himomohedine vali abayemidi aidiyena, na hinage yadi abayemidiwone, aiwa yo gaima, yo ginauli awaꞌawawa aidiyai, na hesi nigele yadi wahiyala.

²⁰Na hinage paihowadine hiya taumiya ganamuli ginaulidine vehabadi hipaipaihowa, nigele Yaubada vehabana hiyanuwanuwatuwu, na hesi Tomodulele maꞌana geluwo vehabadi. Ainaena nigele nuwagu na vali abayemidiwo vehabadi ampaipaihowa, ta mata Tomodulele ana geluwo baidamiyao amveboda ehebo.

²¹Nigele ana ita namwanamwana ebe yada Bada ana vedi ainaena amnumanuma na yana abaꞌai ainaena amꞌaiꞌai, na Tomodulele yana paihowa ampaipaihowaidi,

²²wuwuna yada Bada atena amꞌabiye doyedou. Yada Bada tauwahiyala ibom, ainaena havena taꞌabiꞌabiye modiꞌini, mata dova ta iꞌoyesawaligita. Aiꞌai vali abayemidiwo vehabadi

²³Ginauli maudoidi howahowada na tapaihowaidi, na tupwana paihowa nigele howahowana hihaguigita.

²⁴Nigele ebeha tabom vehabada tanuwanuwatuwuyoigita na ebeha ada geluwo tupwadi hinage ta haguidi.

²⁵Ainaena ebe lagulagu bunumadi vali tomowa aidiyena amgimwala, havena ampanipanivila bunumanane vehabana, na hesi amꞌai bada, na havena amnuwanuwatuwu yababana hava mwalona aiꞌainane ainai hipapaihowaine.

²⁶Wuwuna baleꞌu maudoina ta hinage ginauli maudoina baleꞌuwai Yaubada yana Abaloinao.

²⁷Na hesi ebe taumiya dalava ehebo iyogaego na ulaulau yana vadai na am imwauwi vehabam, bada taꞌi uꞌai, na havena upanipanivila hava mwalona ipaihowai aiꞌainane ainai, na ainaena havena unuwanuwatuwu vitai vehabana.

²⁸Na hesi ebe yaiya iwalo mahalava aiꞌainane vehabana na alimiyai iwalo, “Hiya yadi paihowa Tomodulele vehabana aiꞌai neta hipaihowai ainaena”. Havena aiꞌainane uꞌaiꞌai, mata tauwalo mahalavane inuwayababa, yo imeheuhi, ainaena owa hinage unuwayababa.

²⁹Nigele owa yam meheuhi ainaena, wuwuna owa nigele Tomodulele uyamehemeheuhei, na hesi tauwalo mahalavane yana meheuhiyena. Na nuwana tomowa teya iwalo, “Paulo, hava vehabana na mata tautapitapiya vehabadi loina yaveꞌalo?

³⁰Hava vehabana na tautapitapiya hiꞌulumiyanegau? Bada agu vehabana yaꞌawa yauwedoꞌo Yaubada ainai ta nigele yababa teya aliguwai iyamiyamiya.”

³¹Hiya yadi walo ana maiha teina, ebeha ilowoinanegita na yada paihowa maudoina, yo yada ai, yo yada numa, yo hava hinage, aidiyena Yaubada yehana taꞌabiye mwalaꞌi.

³²Eeta havena vali tomowa amꞌabiꞌabiye nuwayababadi, nuwana Yudeya, yo taumiya ganamuli, yo Yaubada yana boda.

³³Dova yau yatowotowoi na ebeha havena yagu nuwanuwatuwuwena yapaipaihowa, na hesi hava tomowa yadi nuwatuwu dova yapaihowai, na hiyaliyaya, na ainaena adi hagu hilobai Yaubada ainaena.