Read Kurada 1 Kolinita 11 Bible Online

1 Kolinita 11 - Kurada bible

1 Kolinita 11

¹Ilowoinanegomiu na yagu mumuga teina amveꞌaoꞌaonaei, dova yau Besinana mumugana yaveꞌaoꞌaonaeine. Waiwaihiu yadi pasa tapwalolo ainai

²Yauwedo tahiguwao, wuwuna veꞌitaone yamomohegomiune bada amnuwatuwu avivinidi na amꞌabi avivinidi.

³Na nuwanuwagu amhanapui ebeha Besinana towatowaho yada Bada, na hesi waiwaihiu yadi bada neta mwanediyao, na Besinana yana Bada Yaubada.

⁴Ebe towaho maꞌana pwaopwaomi iꞌawaꞌawanoi yo iwalo mahalava neta abahinimaya yana Bada Besinana ainai.

⁵Na ebe waihiu vahu aꞌavana iꞌawaꞌawanoi yo iwalo mahalava, neta hinage abahinimaya yana bada, iya mwanena, ainai. Moiha taꞌi, ana ita yababana ebe vahuna maudoina ꞌwahiꞌwahina.

⁶Wuwuna ebe waihiu nigele vahuna iyaꞌoiꞌoihamui, vahuna itom na ihinimaya vahuna ꞌwahiꞌwahina vehabana, ainaena iꞌoihamui na ana ita inamwanamwa tapwalolo ainai.

⁷Tapwalolo holanai towaho nigele howahowana na vahuna iꞌoi hamui, wuwuna towaho ana ita Yaubada dova, na hinage ana walo vetuvehae Yaubada ana walo vetuvehae dova, na waihiu ana walo vetuvehae towaho ana walo vetuvehae dova.

⁸Wuwuna nigele towaho mugamugaina waihiu ainaena iyamahalavama, na hesi waihiu towaho ainaena imamahalavamane.

⁹Na hinage Yaubada towaho nigele waihiu vehabana ipapaihowaine, na hesi waihiu towaho vehabana ipapaihowaine.

¹⁰Ainaena waiwaihiu ilowoinanedi na vahudi hiꞌoihamuidi tapwalolo ana hauga ainai, na waiwaihiuwone yadi awaꞌabi mwanediyao aidiyai tausagenawasao hiꞌitadi.

¹¹Na hesi ebe yada Bada yana amwaha tamulitaei nigele howahowana na waihiu ibom iloinaei bo towaho ibom iloiloina.

¹²Wuwuna waihiu towaho ainaena imahalava na towaho waihiu ainaena itubui, na maudoida Yaubada ainaena ta mahalava.

¹³Eena amnuwatuwu avivini, ebe waihiu vahu aꞌavana na iꞌawaꞌawanoi Yaubada ainai, vedova ana ita, namwanamwana bo nuwana iyababa.

¹⁴Maudoida baleꞌuwai tamiyamiya, ebe towaho taꞌita vahuna daodaona, na ana ita dova waihiu, neta abahinimaya.

¹⁵Na ebe waiwaihiu vahudi daodaodi neta adi abawalo vetuvehae, yo hinage vahudi ana abaꞌoihamu.

¹⁶Ada loina teina dova, na nigele hinage teya loina Yaubada yana boda maudoida alidai, ainaena havena ehebo yaiya loina teina vehabana iwalowalo gwaipile. Bada yana ai

¹⁷Ehebo hinage mumugamiu vehabana nigele yayaliyaya, neta nigele iyanamwanamwa.

¹⁸Wuwuna tupwana tomowa hiwalo aliguwai ebeha yami miya dalava aidiyai amwahewaheuyoigomiu ta vehau vehau yana boda, eeta neta nuwana moihana.

¹⁹Na yami waheine ainai ana namwanamwa neta ebeha yaiyadiwo hiya Yaubada iꞌawa dumwaluwedi moiha tahanapuidi.

²⁰Na hinage yami miya dalava aidiyai ebe yada Bada yana ai veꞌaveꞌahihina amꞌai, neta ana ita nigele iyanamwanamwa.

²¹Wuwuna omiu tupwana amiu amꞌaiꞌai, na ami geluwo tupwadi maꞌadi vahali, na hinage omiu amꞌaiꞌai yo hinage amnumanuma mwalaꞌina ainaena ambuwabuwa.

²²Eeta ilowoinanegomiu na ambom yami vada aidiyai amꞌai yo amnuma, na havena Yaubada yana tapwalolo amꞌabiꞌabiye yababa, na hiya wewelohedi amꞌabiꞌabiye hinimayadi. Teina vehabana nigele yayawalo vetuvehaeyegomiu.

²³Yada Bada Yeisu yana ai ana nuwamasele bada hiveꞌitagauꞌo na yau yaveꞌitagomiuꞌo, neta boniyainane Yudasa Yeisu iꞌalomagigiliyei, mulitai Yeisunane beledi ivai,

²⁴na iꞌawa yauwedo Yaubada ainai na itomwahi, na iwalo, ‘Teina taugu omiu ami hagu vehabana. Ta teina dova ampaihowai agu abanuwatuwu avivini vehabana.’

²⁵Eeta hiꞌai iꞌovi, na hinage Yeisu vedi ivai, na iwalo, ‘Vedi teina waloyemidi vauvauna vehabana, na waloyemidine vauvaunane ꞌwahinagu yaꞌabiye mahalava. Ebe aiteya hauga ainai amnuma amnuwatuwu avivinigau.’

²⁶Na beledine ana ai yo vedine ana numa aidiyena yada Bada yana mwalowoi vehabana taveꞌitaei hauga maudoina, yo ana higa ilau gwaipilema.

²⁷Na hesi ebe yaiya aiꞌainane iꞌai awaꞌawawai yo yada Bada ana vedine ainaena inuma yabayababa, towahonane neta yana pwanoli, wuwuna yada Bada tauna yo ꞌwahinana aidiyena ipaihowa yabayababa.

²⁸Na ebe nuwanuwada na yada Bada yana ai taꞌai, mugai mumugada vehabana tanuwanuwatuwu, yo hinage taꞌabiye dumwalugita, na mulitai aiꞌainane taꞌai, na hinage vedinane ainaena tanuma.

²⁹Wuwuna ebe yaiya iꞌai awaꞌawawa yo inuma awaꞌawawa, na nigele iyanuwanuwatuwu Besinana tauna vehabana, howola mata ana loina ilobai.

³⁰Teina wuwuna ami lovalao yo yami tapiyaone tupwana bagibagilidi himahamahalava alimiyai, na hinage tupwana ami bodao bada hiꞌwadaleleꞌo.

³¹Eeta ilowoinanegita na yada mumuga taꞌabiye dumwaludi, na ebe Yaubada havena iloiloinaegita.

³²Na ebe hauga teina ainai Bada ilauvetalaegita, neta iꞌabiye dumwalugita, ta ebe hauga mehedai mata nigele taumiya baleꞌu baidadi iyalauvetala eheboigita.

³³Tahiguwao, ebe hauganane yada Bada yana ai amꞌai, ami geluwo amhaꞌwaidi na am ai toyawa.

³⁴Na ebe yaiya ivahali, yana vadai nemai iꞌai mugai, na ainaena havena iꞌai alaꞌalabili tapwalolo ainai, mata dova Yaubada imanini yami tapwalolo ana ita yababana vehabana. Neta ibom loina teina vehabana. Na hesi tupwana ami loina hinage himiyamiya, ainaena ebe hauganane yalaowa alimiyai, loinanane yaꞌabiye dumwaludi alimiyai.