Read Kurada 1 Kolinita 15 Bible Online

1 Kolinita 15 - Kurada bible

1 Kolinita 15

¹Tahiguwao, wasa namwanamwana bada yawalo mahalavaenaꞌo alimiyai, amnuwatuwu avivini ebeha mwalona atemiu amtalamwei wasanane ainai, na iꞌabiye wahiyalagomiu na ainaena ami hagu amlobai, ebe wasanane amꞌabi avivini. Na ebe nigele amyaꞌabi avivini, yami yemidine ginauli awaꞌawawa.

³Wasa teina yaꞌita lobai ainaena yawalo mahalava alimiyai na nuwatuwu mwalaꞌina neta Besinana yada yababao vehabadi imwalowoi, dova Buki Veꞌahihi yana walo mahalava.

⁴Ta himwauwi magaiyai na ahubena tonugana ainai itowolouyo, dova Buki Veꞌahihi iwalo mahalava.

⁵Itowolouyo na Pita ainai iꞌabiye mahalavauyoi na hinage tauyewasao hitau 12 aidiyai iꞌabiye mahalavauyoi.

⁶Ehebo hauga ainai ada geluwo hitau 500 aidiyai iꞌabiye mahalavauyoi. Boda neta tupwadi bada himwalowoiꞌo na hibagibagili alili mayawahidi.

⁷Yemesa ainai iꞌabiye mahalavauyoi, na hinage Besinana ana tauyewasao maudoidi aidiyai iꞌabiye mahalavauyoi.

⁸Na yana abaꞌovi yau aliguwai iꞌabiye mahalavauyoi, na hesi yagu hauga tubuiyo ainai yamataimeyameya.

⁹Na yau yehane tauyewasa nigele iyalowoinanegau wuwuna Yaubada yana bodao yaꞌabiye muyamuyadi ainaena Besinana ana taumulitao maudoidi hinamwanamwa gabaegau.

¹⁰Na hesi Yaubada iveꞌiꞌilaegau na ilivahigau. Ainaena nigele iyalivahi awawaigau, wuwuna bada yayemidiꞌo moiha na tauyewasao maudoidi yadi paihowa yalaugabaei, nigele yau yagu wahiyalaena, na Yaubada yana veꞌiꞌilaena.

¹¹Eeta tauyemidiwone alimiyai bada higuguyaꞌo, na yau hinage bada alimiyai yaguguyaꞌo, ainaena Besinana amyemidiyenaꞌo. Towolouyo vehabana

¹²Yama guguya alimiyai awalo mahalava ebeha Besinana mwalowoiyena itowolouyoꞌo, na amyemidiyei. Eena hava vehabana ta tupwamiu amwalo, “Ebeha tomowa nigele howahowana na mwalowoiyena hitowolouyo?”.

¹³Wuwuna ebe tomowa nigele mwalowoiyena hiyatowotowolouyo, Besinana hinage nigele mwalowoiyena iyatowolouyo.

¹⁴Ainaena yama guguyaone nigele ainona ta omiu hinage yami yemidine Besinana vehabana nigele ainona.

¹⁵Na hinage ai Yaubada ana tauyewasao dova aꞌoyaꞌoyamaegomiu yama walowone aidiyena, wuwuna awalo, “Yaubada Besinana mwalowoiyena iꞌabiye towolouyoi”. Na tupwamiu amwalo, “Nigele taumwalomwalowoi hiyatowotowolouyo”.

¹⁶Yami nuwatuwu vedova? Besinana hinage nigele iyatowolouyo, bo?

¹⁷Ebe Besinana nigele iyatowolouyo neta yami yemidine Besinana ainai nigele habuluna ainona ta mata yami yababa ainai ammiyamiya.

¹⁸Na yami nuwanuwatuwu amwalo hiya mwalona Besinana hiyemidiyei ta himwamwalowoiwa mata nigele hiyanamwanamwa, bo?

¹⁹Na hinage ita Besinana ana taumulitao atemuyamuyada, ebe Besinana yana hagu alidai teina hauga baleꞌuwai vehabana, na nigele hauga ilalaoma vehabana yada mwalowoi tuluhanai.

²⁰Na ana dumwalu neta Besinana mwalowoiyena itowolo mugai, na mulitai abo taumwalomwalowoi maudoidi hitowolouyo.

²¹Wuwuna towaho ehebo taꞌi ainaena mwalowoi imahalava baleꞌuwai, neta Adam, na hinage dova towaho ehebo yana paihowa ainaena towolouyo iꞌabiye mahalava.

²²Ainaena bada tahanapuiyaꞌo ebeha Adam yana yababa ainaena maudoida mwalowoi alidai imamahalavane, na moiha Besinana ainaena yawahi vateyai talolobaine.

²³Na yawahi vateyai yana lau teina dova, mugai Besinana itowolouyo na howola ilau gwaipileuyoma ita yaiyadiwo yana bodao, hinage tatowolouyo.

²⁴Na mulitai Besinananane tauloinao maudoidi iwahiyala gabaedi na Tomodulele yo tauloinao yababadi maudoidi iwahiyala gabaedi, yo hauga yana abaꞌovi ainai Besinana yana loina imohegeyoꞌawahei Tamana ainai.

²⁵Wuwuna Besinana mata mayana wahiyala iloiloina ana higa ana alehao maudoidi iwahiyala gabaedi.

²⁶Na aleha mwalaꞌina yana abaꞌovi ainai mata Besinana mwalowoi iwahiyala gabaei, na igwaipile ta namwanamwa.

²⁷Wuwuna Yaubada loina maudoina Besinana imoheinaꞌo. Na hesi Tauꞌaiyauyane nigele howahowana Besinana iloinaei.

²⁸Ainaena howola hauganane ainai Besinana ginauli maudoidi iloinaedi, iya italam Tamana yana loina ainai, wuwuna Tamanane Besinana yana loina maudoina ana taumohe, eeta Yaubadanane ihae alili.

²⁹Na ebe taumwalowoi havena hitowotowolouyo, hava wuwuna omiu tupwamiu bapitaiso amvaivai hiya taumwalomwalowoi vehabadi?

³⁰Na hinage vedova yau? Ebe nigele howahowana na mwalowoiyena yayatowolouyo, hava vehabana abasilahe ainai hauga maudoina yapaipaihowa Besinana vehabana?

³¹Moiha taꞌi, ahubena ehebo ehebo aidiyai dova yamwalomwalowoi, na hesi mayagu yaliyaya omiu yami towolo wahiyala vehabana, yada Bada Yeisu Besinana ainai.

³²Na hinage mwalona Epeso ainai tomowa manimaninidi dova maheya nuꞌula hiꞌalehaigau, na hesi alehanane nigele ana namwanamwa aliguwai ebe nigele mwalowoiyena yayatowolouyo. Ainaena hiwalo:“Ebeha ilowoinanegita na hauga baleꞌuwai tayaliyaya yada ai yo yada numa aidiyena”, wuwuna mwalowoi ana hauga nigele howahowana teya hava talobai.

³³Na hesi walodine neta oyama, neta ainaena havena aidiyena hiꞌoyaꞌoyamaegomiu, mata yadi mumuga yababana amveꞌaoꞌaonaedi.

³⁴Yo tupwamiu Yaubada amnuwapwanopwanowei. Teina abahinimaya alimiyai, ainaena ilowoinanegomiu na amhanapui, yo ainaena yami mumuga yababana amlaumwauwidi. Tau vauvauna vehabana

³⁵Na tupwamiu nigele amyanuwatuwu masele towolouyo vehabana, ainaena amwalo, “Tau mwalowoiwone aiteya tau ana ita mata ainaena hitowolouyo?”.

³⁶Na ilowoinanegomiu amhanapui ebeha dova patu taꞌumai na iꞌini howola mata patunane ipwaha.

³⁷Amhanahanapui ebe pegapega bo ehebo patu taꞌumai, taunane ainaena iꞌini, nigele patu mugamugaina ana ita dova, na hesi vagana.

³⁸Wuwuna tauloina iya Yaubada, na aiwa yo awahi ehebo ehebo adi ita yana nuwatuwu dova, na imwauwidi.

³⁹Na tauda hinage yana nuwatuwuwena iyemasele. Tomowa tauda ana ita vagana na lagulagu taudi adi ita vagadi na lowolowo taudi adi ita vagana, na yama taudi adi ita vagana.

⁴⁰Galewa ginaulidi himiyamiya yo hinage baleꞌu ginaulidi himiyamiya na adi ita namwanamwa vagana yo vagana.

⁴¹Na hinage mahana ana ita vagana, na waiꞌena ana ita vagana, na utui ana ita vagana, na utui ehebo ehebo adi ita vagadi yo vagadi.

⁴²Dova hinage yada towolouyo ana ita, ginauli mwalomwalowoina ta hamui na ginauli nigele iyamwalomwalowoi mata itowolouyo.

⁴³Moiha taꞌi, taudao amaꞌamagogoidi hihamuidi na tatowolouyo manamwanamwada. Tauda tapitapiyadi hihamuidi na tatowolouyo mayadi wahiyala.

⁴⁴Wuwuna tau baleꞌuwena himagamagaiyedi na tau galewaena hitowotowolouyo, wuwuna tau baleꞌuwena vagana na tau galewaena vagana.

⁴⁵Buki Veꞌahihi yana walomahalava hinage dova iwalo, “Towaho mugamugaina, Adam, tauna mayawahina”, na towaho bwauna, Yeisu, aluꞌaluwana ainaena tomowa yawahida imohegita.

⁴⁶Towaho aluꞌaluwana nigele iyamahalava mugai, na hesi tauna imahalava mugai na aluꞌaluwana mulitai.

⁴⁷Wuwuna towaho mugamugaina Yaubada ipaihowai baleꞌu ainaena, na towaho bwauna galewaena idodobimane.

⁴⁸Adam baleꞌu muꞌamuꞌalinaena imahalavama, eeta ita hinage baleꞌu muꞌamuꞌalinaena tamamahalavane, na hesi Besinana iya galewaena idodobimane eeta ita mata dova Besinana ta yemala tomowa galewaena.

⁴⁹Ainaena ada ita dova tomowa baleꞌuwena na hesi ada itane mata igwaipile ta dova Besinana iya tomowa galewaena.

⁵⁰Tahiguwao amnuwatuwu avivini ebeha tauda baleꞌu nigele howahowana na Yaubada yana Abaloina ainai hiluwu, wuwuna tau baleꞌuwena pwahapwahana na tau galewaena mata nigele iyapwaha.

⁵¹Na hinage hanapu vauvauna yaveꞌitagomiu ebeha havena ita Besinana yana boda maudoida tamwalomwalowoi, na hesi ita howola mayawahida tamiyamiya na Yaubada tauda imwau buidi.

⁵²Wuwuna hauga yana abaꞌovi ainai yoguli hiyuvi mwalaꞌina na Yaubada tauda iꞌabibui mwayamwayauwedi, yo hinage taumwalowoi mataudi vauvauna hitowolouyo, na ita mayawahida tauda hinage iꞌabibuidi.

⁵³Wuwuna Yaubada howahowana tauda pwahapwahadi na mwalomwalowoidi iꞌabibuidi, na hivauvau na miyamiya vateyaidi.

⁵⁴Yo howola hauga tenem ainai Buki Veꞌahihi ana awamoiha imahalava, neta iwalo:“Mata mwalowoi iꞌoiye sawali na ita tamiya alili”.

⁵⁵“Mwalowoi, havaidova yam wahiyala? Iꞌoviꞌo. Mwalowoi, havaidova yam muya? Iꞌoviꞌo.”

⁵⁶Mwalowoi yana wahiyala imahalavama mumuga yababana ainaena, na mumuga yababana Mosese yana loina aidiyena tahanahanapui.

⁵⁷Na yada Bada Yeisu Besinana ihaguigita ta mwalowoi tawahiyala gaebei, ainaena Yaubada ainai taꞌawa yauwedo mwalaꞌina.

⁵⁸Na hinage tahiguwao yaꞌawa yauwedo mwalaꞌina alimiyai, na yaguguyeigomiu na amtowolo wahiyala, ta hauga maudoina amꞌatepatu Bada yana paihowa ainai, wuwuna howola Bada yana paihowa ainaena ainona talobai.