Read Kurada 1 Kolinita 2 Bible Online

1 Kolinita 2 - Kurada bible

1 Kolinita 2

¹Tahiguwao, amnuwatuwu avivini hauganane mwalona Yaubada wasana yavaiyama na yawalowei alimiyai, nigele ebeha yau tauhanapu mwalaꞌina.

²Na hesi nuwanuwagu na Besinana iya vehabana yaguguya alimiyai, iya hiꞌoiye mwalowoi aiwa lagalagana ainai.

³Eena yagu mahalava alimiyai dova tautapitapiya, na mayagu batutuli yo mayagu atehawawali.

⁴Na hinage yagu guguya alimiyai nigele walo wahiwahiyalana yo nuwamasele aidiyena, na hesi Aluꞌaluwa Veꞌahihi yana wahiyalaena.

⁵Ainaena yagu guguya ambenalenaꞌo na amyemidiyei ebeha nigele tomowa yadi nuwamasele ainaena, na hesi Yaubada yana wahiyalaena. Nuwamasele moiha

⁶Nuwamasele moiha Yaubada ainaena yawalowalo mahalava omiu yami nuwatuwu hunadi alimiyai, na hesi baleꞌu teina ana taunuwamaselewo yo tauloinao yadi nuwamasele mata sawasawalidi.

⁷Na nuwamasele Yaubada ainaena mwalona dawadawanina, na teina hauga bada iꞌabiye mahalavayaꞌo. Wuwuna mulitai na baleꞌu iyemasele, mugai nuwanuwana na ada awanamwanamwa imohegita.

⁸Na baleꞌu teina ana tauloinao nuwamasele nigele hiyahanapui, na bada ebe hihanapu mugaiyei, nigele howahowana yada Bada galewaena hiꞌoiye mwalowoi aiwa lagalagana ainai.

⁹Teina vehabana na Yaubada yana Buki Veꞌahihi iwalo mahalava iwalo:“Nigele teya tomowa iyaꞌita bo iyabenalei, yo nigele teya iyanuwatuwui mata imahalava, neta bada Yaubada iꞌabinonovaidiꞌo yaiyadiwo hivevelauweine”.

¹⁰Na hesi Aluꞌaluwa Veꞌahihi ainaena Yaubada nuwamasele bada iꞌabiye mahalavayaꞌo alidai. Wuwuna Yaubada Aluꞌaluwana ginauli maudoidi ihanapuidi, eena Yaubada yana nuwatuwu dawadawanina hinage ihanahanapuidi.

¹¹Ta amnuwatuwu avivini ita tomowa, wuwuna ebe yaiya towaho mayana nuwatuwudawani, towahonane iya aluꞌaluwana ihanahanapui dova hinage Yaubada Aluꞌaluwana ibom yana nuwatuwu ihanahanapui.

¹²Yaubada Aluꞌaluwana nigele taumiya baleꞌu aluꞌaluwadi dova, na hesi Yaubada Aluꞌaluwana imohegita, ainaena tanuwamasele yana velauwone alidai vehabadi.

¹³Ainaena yada walo nuwana yada veꞌita, nigele taumiya baleꞌu yadi nuwamasele ainaena, na hesi Yaubada Aluꞌaluwanaena. Eeta ebe yaiyadiwo Aluꞌaluwanane aidiyai imiyamiya, howahowana walonane hihanapui.

¹⁴Na ebe nigele, nigele howahowana hihanapui, wuwuna aidiyai ebeha ginauli yauyauledi taꞌi. Eena nigele howahowadi ginaulidine hihanapuidi, wuwuna Yaubada Aluꞌaluwana nigele howahowana iꞌabiye maseledi.

¹⁵Ita hesi ginauli maudoidi taveꞌaha iliꞌilimanidi Yaubada Aluꞌaluwanaena ta nigele teya yaiya ebeha iyalauvetalaegita.

¹⁶Dova Yaubada yana Buki iwawaloweiwa iwalo:‘Moiha taꞌi, nigele ehebo yaiya Yaubada yana nuwatuwu iyahanapui yo eheha iveꞌitaei’. Na ita hesi Besinana yana nuwatuwu ainaena tanuwanuwatuwu.