Read Kurada 1 Kolinita 3 Bible Online

1 Kolinita 3 - Kurada bible

1 Kolinita 3

¹Tahiguwao, nigele howahowana na nuwamasele moiha yawalo mahalavaei alimiyai, wuwuna aluꞌaluwamiu nigele hiyahuna, na yami nuwanuwatuwu howola baleꞌu yana nuwanuwatuwu dova. Wuwuna omiu amvetuwuni Besinana ana yemidi ainai, dova hedaheda habuludi.

²Ainaena nigele howahowana na aiꞌai yamohegomiu, na hesi huhu aꞌava ainaena yaveꞌaigomiu, wuwuna mwalona ainaena ta ana higa wau nigele howahowamiu aiꞌai amꞌai.

³Moiha, yami mumuga howola taumiya baleꞌu dova, wuwuna howola amꞌawaꞌawa paꞌipaꞌiꞌi yo amꞌaloꞌalo magigili.

⁴Na tupwamiu amwalo, ‘Ai Paulo yana boda’. Na tupwamiu hinage amwalo, ‘Ai Apolosa yana boda’. Yami walone dova taumiya baleꞌu yadi walo, bo?

⁵Vedova ta yau na Apolosa vehabamai amꞌawa paꞌipaꞌiꞌine? Ai taupaihowa yada Bada vehabana. Yama paihowa bada ivaiyama vagana yo vagana apaipaihowaidi, na ainaena omiu Besinana amyemidiyei.

⁶Yau yagu paihowa tauꞌuma bada, na Apolosa tauꞌita avivini, na Yaubada iya yana wahiyalaena aiꞌai imwalamwalaꞌi.

⁷Ainaena Yaubada iya tawalo vetuvehaeyei, na ai mata nigele. Wuwuna ai aꞌumai yo aꞌita avivini na Yaubada ainona tauꞌabiye mwaliꞌina.

⁸Tauꞌuma na tauꞌita avivini howahowamai mata ama maiha alobai yama aipate wahiwahiyala ana mwalaꞌi neta dova.

⁹Teina hauga Yaubada baidamai yana tanovi apaipaihowai, na yana tanovine neta omiu tomowa. Na hinage omiu Yaubada yana vada.

¹⁰Wuwuna Yaubada iꞌatemuyamuyaegau, na ivesinuwaigau ebeha yana tauꞌabi vada, ainaena logidi yamwauwi iliꞌilimanidi na ebe tupwadi hinage taupaihowao logidine aidiyena hilauꞌabi na hiꞌita aviviniuyoidi ta hilauꞌabi iliꞌilimani.

¹¹Yada logidi wahiwahiyalana imiyamiya, iya Yeisu Besinana, ainaena nigele howahowana na vali logidi tavetowolo.

¹²Na hesi logidinane ewanai yada ginaginauli tamwauwidi. Tupwana tomowa yadi ginaginauli namwanamwadi hivaidima, dova hiꞌahiꞌa yo ulabwa yo pauli, na tupwadi yadi ginaginauli tapitapiyadi hivaidimane, dova keipoke yo malaꞌwa yo mulumulu.

¹³Ainaena howola lauvetala ana ahubena ainai, yada Bada ehebo ehebo yada paihowao iꞌitadi na itowoidi, hiwahiyala bo hitapiya.

¹⁴Ebe yaiyadiwo logidine ewanai hivadaꞌabi iliꞌilimani mata maiha hivai.

¹⁵Na hiya tauvadaꞌabi yababadi mata yadi vada igohayasawalidi, na tomowadine mata hagu hiveꞌalo na yadi tobwatobwa mata nigele teya iyamiyamiya.

¹⁶Ainaena amnuwatuwu avivini ebeha ita Yaubada yana vada haehaena, wuwuna Yaubada Aluꞌaluwana alidai imiyamiya.

¹⁷Ebe yaiyadiwo Yaubada yana vada hiꞌabiye yababa, hinage Yaubada iꞌabiye yababadi, wuwuna yana vada masemaselena hiya hiveyababa, na yana vadane neta ita.

¹⁸Havena yaiya owa ubom uꞌoyaꞌoyamaego ebeha owa ehebo tauhanapu, wuwuna ebe baleꞌu teina ana hanapu aꞌava uhanapui, ilowoinanego na hanapunane utaꞌwataꞌwataei, na nuwamasele moiha Yaubada ainaena uvai.

¹⁹Wuwuna hanapu teina baleꞌu ainaena dova hanapu buwabuwana Yaubada mehenai. Na Buki Veꞌahihi ainai yana walomahalava teina dova iwalo:“Yaubada tauhanapuwo iꞌonadiꞌo na hisilaheꞌo hibom yadi hipwahipwaena”.

²⁰Na hinage iwalo:“Bada tauhanapuwone ihanapuidiꞌo neta hinuwanuwatuwu pwano”.

²¹Na havena amwalowalo gagasa yami taumugaiwone baleꞌuwai vehabana, wuwuna Besinana ginauli maudoidi bada imohegomiuꞌo.

²²Dova yau yo Apolosa na Pita imwauwigai, ami tauhaguwo, na baleꞌu maudoina imohegomiu, na hinage yawahimiu yo yami mwalowoi, na hinage ginauli maudoina hauga teina ainai yo hauga hilalaoma aidiyai imohegomiu.

²³Wuwuna omiu Besinana yana tomowao, na Besinananane Yaubada ainaena.