Read Kurada 1 Kolinita 4 Bible Online

1 Kolinita 4 - Kurada bible

1 Kolinita 4

¹Ai Besinana yana taupaihowao, wuwuna wasanane Yaubada ainaena mwalona dawadawanina, na teina hauga awalowalo mahalava alimiyai.

²Yama paihowane ainaena ilowoinanei na apaihowa iliꞌilimani.

³Yagu paihowa teina vehabana, mata amlauvetalaegau bo tomowa tupwadi hilauvetalaegau neta nigele ginauli mwalaꞌina wuwuna nigele yayalauvetalauyowegau.

⁴Na hinage yau yagu nuwatuwu ebeha yagu paihowa namwanamwana, na hesi nigele yayahanapui moiha, namwanamwana bo yababana. Yaubada ibom ihanapuiyaꞌo ta abo imwauveꞌaha.

⁵Ainaena teina haugane havena teya yaiya ana gelu ainai iꞌainimavelele. Hesi Bada yana laoma vehabana amhaꞌwahaꞌwa, wuwuna yana hauga laoma ainai mata imwau veꞌaveꞌahagita. Yana veꞌahane hidumwalu wuwuna yada nuwatuwu yababadi atedai Yaubada mata imwau yemahalavadi na yada nuwatuwu namwanamwadi mata hinage imwau yemahalavadi ta vehabadi iꞌawa namwanamwaegita.

⁶Abaꞌita teina yau yo Apolosa alimaiyena amꞌita, eena ainaena amwaꞌamwaha namwanamwana havena amlaulaugabaei, na havena amwalowalo haehae yami taumugai vehabadi.

⁷Na havena amnuwahaehae ebeha ami geluwone amnamwanamwa gabaedi, wuwuna hava namwanamwana alimiyai himiyamiya, maudoina Yaubada ainaena amlobalobai, ainaena havena amwalowalo gagasa.

⁸Bada amꞌita lobaiyaꞌo, bo? Bada amvewasawasaꞌo, bo? Bada amyemidiꞌo na hiya howola, bo? Bada ebe amyemala wasawasa ta omiu na ai taloina toyawa.

⁹Na hesi teina hauga ana ita dova Yaubada yana tauyewasao ai miya vitai imohegai, dova hiya paipaidi habi oiyemwalowoidi, na ainaena tausagenawasa yo tomowa yo ginauli maudoidi mehediyai.

¹⁰Na ama ita dova yauyaulemai Besinana vehabana, na omiu ami ita dova Besinana ana tauhanapuwo, wuwuna ai tapitapiyamai na omiu wahiwahiyalamiu, yo mayami veꞌahihi, na ai mayama hinimaya.

¹¹Hauga maudoina maꞌama vahali yo maꞌama gadomaguni, yo nigele ama aleꞌo, yo nigele yama vadao, ainaena ama ita dova amiya wewelohe.

¹²Abom nimamaiyena apaipaihowa, na ebe yaiyadiwo hiꞌawa yabayababaegai walovelauwena ayemaihadi, na hinage ebe hiꞌabiye muyaegai aꞌalamaꞌiꞌita.

¹³Na hinage ebe himodiꞌiniyegai mayama namwanamwa aꞌawa auꞌaugeluwedi. Moiha, ai dova mohomoho, ainaena tomowa hitaꞌwataꞌwataegai.

¹⁴Walo teina yaleleyawa nigele habi abiye hinimayagomiu, na hesi habi abiye dumwalugomiu dova natuguwao moiha omiu.

¹⁵Walo moiha yami tauveꞌitao hibagibagili alili, Besinana yana amwaha vehabana, na yabom bada tamamiu, wuwuna wasana namwanamwana ana guguya ainaena yalauvaigomiuma Yeisu Besinana ainai.

¹⁶Eeta natuguwao, yaꞌawanoi alimiyai na amveꞌaoꞌaonaegau.

¹⁷Na natugu Timoti yavetamalenawa yo yagu mumuga Besinana ainai vehabana iwalo mahalavaei alimiyai, dova tauyemidiwo yaveꞌitadi dalava maudoidi aidiyai, yo ainaena havena amnuwanuwapwanopwanowei. Timoti yavelauwei na yayemidiyei mwalaꞌina, wuwuna Bada yana paihowa ainai imwalaꞌi alili, na teina hauga ilalaowa alimiyai.

¹⁸Na hesi tupwadi alimiyena hinuwatuwui ebeha yau havena yalaolaowa, ainaena hinuwanuwahaehae yo higagagagasa.

¹⁹Nigele! Na hesi ebe yada Bada italam, howola abo yalau mwayamwayauwa alimiyai, na taugagasaone yatowoidi, nigele ebeha yadi walowone aidiyena, na yadi paihowao hesi yaꞌitadi, wahiwahiyaladi nuwana tapitapiyadi.

²⁰Wuwuna Yaubada yana Abaloina holanai yana tomowao nigele hiyawalowalo mohili, na hesi yana wahiyalaena hipaipaihowa.

²¹Na vedova yami nuwatuwu? Mayagu loina wahiyala nuwana mayagu velau yo yagu mumuga hegoyana yalaowa? Omiu amloina.