Read Kurada 1 Kolinita 5 Bible Online

1 Kolinita 5 - Kurada bible

1 Kolinita 5

¹Yami yababa yabenalei wuwuna ehebo tomowa alimiyena tamana mwanena baidana hipwanoli. Pwanoli neta iyababa alili. Hiya nigele Yudeya tupwa maudoidi aidiyai nigele dova yadi mumuga.

²Eena havena amnuwahaehae, na hesi mumuga teina vehabana amdou, yo towahonane yababana yami boda ainaena amvai vehulu.

³Teina hauga yau yamiya amwaha daodaowai, na hesi yagu nuwatuwu alimiyai imiyamiya, dova yau baidamiu, ainaena yababanane ana loina alimiyai yawalo mahalavaenawa, neta yada Bada Yeisu yehanaena.

⁴Ana loinane teina dova, ammiya ahaigomiu, yada Bada Yeisu yana wahiyalaena,

⁵tauyababane ammohe gabaei Tomodulele ainai na ebe tauna iꞌabiye yababa, na ainaena howola yada Bada yana ahubena ainai tomowanane aluꞌaluwana ihagui.

⁶Havena amnuwahaehae, na hesi amnuwatuwu avivini ebe yababana habuluna alimiyai imiyamiya, mata maudoimiu iveyababagomiu.

⁷Eeta yababanane alimiyena amvaivehulu na amveboda ehebo namwanamwana, wuwuna Besinana yana mwalowoiyena iꞌabiye maselegomiu, na Besinananane iya dova yada buidiꞌwa guyauna puhomana, wuwuna bada vehabada hiꞌoiye mwalowoiyaꞌo.

⁸Na yada guyaune tapaihowaidi, nigele mayada mumuga yababa aidiyena, na hesi mayada mumuga masemaseledi yo dumwaluna aidiyena.

⁹Mwalona yami leta ehebo ainai yawalo mahalava ebeha havena taumeheꞌayowo baidamiyao amꞌawaꞌawa auꞌaugelu.

¹⁰Na hesi nigele yayaloiloina na ebeha taumeheꞌayo yo tobwatobwa nuwanuwadi yo tauꞌaivavaliwo yo tauꞌoba amsosomanaedi, wuwuna baleꞌu teina ainai hiya, hibagibagili alili, ainaena nigele howahowana talaugabaidi.

¹¹Na hesi yagu loina alimiyai teina hauga ebe yaiya tauyemidi imeheꞌayo, bo tobwatobwa nuwanuwana bo iꞌobaꞌoba, yo imanimanini, yo weꞌaha wahiwahiyalana inumanuma, yo iꞌaivavali, havena amꞌawaꞌawa auꞌaugeluwei yo baidamiu amꞌaiꞌai.

¹²Na hesi yau yagu abaloinao tauyemidiwo aidiyai, na havena vali bodao aidiyai.

¹³Wuwuna hiya howola abo Yaubada iloinaedi, na hesi taupwanoline ehebo yami boda, ainaena ilowoinanei na amloinaei, yo alimiyena amheusili.