Read Kurada Galetiya 1 Bible Online

Galetiya 1 - Kurada bible

Galetiya 1

¹Yau Paulo, Yeisu Besinana yana tauyewasa teya, nigele tomowa yadi vesinuwaena, na hesi Yeisu yana vesinuwaena, yo hinage Tamada Yaubada. Ibom Yeisu mwalowoiyena iꞌabiye towolouyoi.

²Na tahidao baidaguwao yami leta avetamalenawa omiu tautapwalolo, boda ehebo ehebo tupwa Galetiya holanai ammiyamiya.

³Tamada Yaubada yo yada Bada Yeisu Besinana yadi veꞌiꞌilaena ammiya namwanamwa.

⁴Wuwuna Tamada Yaubada yana nuwatuwu teina dova, ainaena Yeisu ibom italam ta imwalowoi yada pwanoli vehabadi, eeta ihaguigita teina baleꞌu yababana yana wahiyalaena,

⁵teina vehabana Yaubada ainai tawalowalo vetuvehae, nigele yana abaꞌovi. Moiha. Wasa namwanamwana ehebo taꞌi

⁶Abanuwapwanopwano teina aliguwai, wuwuna Yaubada mugai ivesinuwaigomiu ta ebe Besinana ainaena veꞌiꞌila amlobai, yo wasana namwanamwana amyemidiyei. Na mwayamwayauwena teina hauga amtaꞌwataꞌwataenaꞌo, na wasa vagana amyemidiyeine.

⁷Wasa namwanamwana ehebo taꞌi, na nigele teya hinage wasa iyamiyamiya, na hesi tupwadi tomowa bada hivelau pwanopwanogomiuꞌo, wuwuna nuwanuwadi yo Besinana wasana himwau gwaipile ta ainaena hiꞌoyaꞌoyamaegomiu.

⁸Besinana wasana mugai ambenaleine neta moihana, eeta havena teya yaiya vali wasa imohemohegomiu. Ai yo tausagenawasa galewaena nigele howahowana wasa vagana ayamohegomiu. Na ebe yaiya wasa namwanamwana imwau gwaipile ta vali wasa iyemahalava, vitai mata ilobai Yaubada ainaena.

⁹Bada mugai awalo mahalavaꞌo alimiyai, na teina hinage yawalo mahalavauyo neta ebe yaiya vali wasa imohegomiu, yababana mata ilobai Yaubada ainaena.

¹⁰Vedova, tomowadine adi walo vetuvehae vehabana yanuwanuwatuwu, bo nuwana Yaubada ana walo vetuvehae? Wuwuna ebe tomowa yadi nuwatuwu yapaipaihowai, nigele howahowagu ta Besinana vehabana yavetaupaihowa. Paulo yana nuwabui

¹¹Tahiguwao, amnuwatuwu avivini neta wasa namwanamwana yawalowalo mahalavae, nigele tomowa aidiyena.

¹²Wasane nigele tomowa yadi walomahalavao yo yadi veꞌitao aidiyena, na hesi Yeisu Besinana yana veꞌitao aliguwai ainaena.

¹³Na yagu mumuga mugamugaina, haugana taumiya Yudeya yadi boda holanai yamiyamiya, neta ambenalenaꞌo, ebeha Yaubada yana bodao yaꞌabiꞌabiye muyadi na nuwanuwagu yo yamutudi.

¹⁴Ainaena agu yasowone taumiya Yudeya holanai yawahiyala gabaedi, wuwuna tubudao yadi mumuga vehabana yaꞌaiꞌaipate wahiyala na agu yasoyasowowa yadi aipate tupwana taꞌi.

¹⁵Haugana nigele hiyalabahigau, na mugai Yaubada yana veꞌiꞌilaena bada ivesinuwagauꞌo,

¹⁶ta ibom yana nuwatuwena natuna aliguwai iveꞌitaei, ta yavetauyewasa vehabana nigele Yudeya aidiyai. Ainaena nigele yayalaulau tomowa aidiyai habi panivila wasa teina vehabana.

¹⁷Nigele yayalau Yelusalem Besinana ana tauyewasa mugai aidiyai, na hesi yalau Alebiya, ta nemai yamiyamiya ana higa yalau gwaipilema Damasiko.

¹⁸Mulitai bolimai tonuga tuluhadiyai yahae Yelusalem, Pita yatau boꞌeyei, na nemai baidagu ahubena 15 amiyamiya.

¹⁹Na Yeisu ana tauyewasa bahudi nigele yayaꞌitadi. Neta bada Yemesa, ibom yada Bada tahina.

²⁰Yagu walo teina Tamada mehenai yalelediwa nigele teya hinage oyama.

²¹Iꞌovi na Yelusalem yalaugabaei ta yalau Siliya yo Silisiya yadi tupwa ainai.

²²Na haugana yamiyamiya aidiyai Besinana yana bodao Yudeya tupwanao aidiyai nigele agu oleya hiyahanapui.

²³Bada wasagu hibenalenaꞌo ebeha ‘Ibom mugai iyeyemuyagitawa, na hesi bada inuwabuiꞌo, ta wasa namwanamwana mugai ilaulaugagayoweiwa hauga teina iguguguyaei.’

²⁴Ainaena Yaubada hiwalo vetuvehaeyei yagu nuwabui vehabana.