Read Kurada Galetiya 3 Bible Online

Galetiya 3 - Kurada bible

Galetiya 3

¹Omiu Galetiyao yauyaulemiu! Yaiya ivevenayaigomiune ta nuwamiune hipwanopwanone? Mugai aveꞌitagomiu ta nuwamiune himasele moiha Yeisu Besinana vehabana, ebeha aiwa lagalagana ainai imwalowoi na hesi amnuwagabaenaꞌo! Ainaena yami nuwatuwu ebeha Mosese yana loina ana yemidiyena livahi amlobai?

²Ehebo panivila yapanivilaegomiu: Aiteya amwaha ainaena Aluꞌaluwa Veꞌahihi amvavaine? Mosese yana loina ana paihowa ainaena, bo Besinana wasana ambenalei ta ana yemidi ainaena?

³Yauyaulemiu! Yami tapwalolo yana vetuwuni amhanapuiyaꞌo ebeha Aluꞌaluwa Veꞌahihi ainaena, eeta havena amtowotowoi ta ebeha yami tapwalolo amveꞌovi ambom yami paihowa aidiyena.

⁴Vedova ta ami lautowoi maudoina amyepaipaihiyei, na Besinana ana yemidi ainai amꞌaipate ahaya?

⁵Ehebo hinage panivila: Yaubada ibom Aluꞌaluwa Veꞌahihi imohemohe alimiyai, na yana wahiyalaena yami paihowa wahiwahiyaladi ampaipaihowaidi. Vedova yana aiyauyao alimiyai, Mosese yana loinao adi awaꞌabi, bo Besinana wasana ana yemidi ainaena?

⁶Amnuwatuwu avivini Abelaham neta ibom Yaubada iyemidiyei, ainaena Yaubada iꞌawa dumwaluwei,

⁷yo amhanapui neta Yaubada ana tauyemidiwo hibom Abelaham natunao.

⁸Mwalona Yaubada Abelaham iwalo auli, iwalo,‘Owa alimwena mulitai vali dalava yadi awanamwanamwa hilobai.’Na Yaubada yana walo teina Buki Veꞌahihi holanai iwalo mahalava mugai, neta dalava bagibagilidi adi abiye dumwalu Yaubada ana yemidi ibom ainaena.

⁹Eeta tahanahanapui neta tauyemidiwone maudoidi adi awanamwanamwa hilobai, hiya Abelaham baidanao.

¹⁰Na yaiyadiwo yadi nuwatuwu neta ebeha Mosese yana loina ana awaꞌabi ainaena hinamwanamwa, mata awayababa aꞌava hilobai, wuwuna Buki Veꞌahihi iwalo,‘Loina maudoina buki teina holanai ebe yaiya nigeleiyamulitaei moiha, awayababa abo ilobai.’

¹¹Nigele howahowana Yaubada iꞌawa dumwaluwegita ebe Mosese yana loina aꞌava taꞌawaꞌabiyei. Wuwuna Buki Veꞌahihi dova iwalo,‘Taudumwalu yadi yemidiyena yawahi namwanamwana mata hilobai.’

¹²Mosese yana loina ana amwaha vagana, na yemidi ana amwaha vagana. Loina ana amwaha Buki Veꞌahihi ainai teina dova hileleyaꞌo, iwalo,‘Ebe yaiya loina maudoina iꞌawa abiyedi, yawahi namwanamwana ilobai.’

¹³Na nigele howahowana na loina maudoina tamulitaedi, eeta Besinana iveꞌaivelahegita ta ihaguigita teina loinane ana vitai ainaena. Loina ana vitai teina ebe nigele tayamulitaei mata tamwalowoi, eeta Besinana ita vehabada imwalowoi dova tauyababa mwalaꞌidi adi oiyemwalowoi aiwa lagalagana ainai. Buki Veꞌahihi mugai yana walo teina dova iwalo,‘Ebe yaiyadiwo aiwa lagalagana ainai himwauwidi ta himwalowoi,hiya awayababa hilobai Yaubada ainaena.’ Ta Besinana ita vehabada vitainane iꞌaꞌavalaine.

¹⁴Ta Yeisu Besinana ainaena nigele Yudeya yaliyaya hilobai, dova yaliyayawa Yaubada iwalo yemidiyeiwa Abelaham ainai, ebeha maudoida yada yemidiyena mata Aluꞌaluwa Veꞌahihi iwawalo yemidiyeiwa imohegita. Waloyemidi vehabana

¹⁵Tahiguwao, ehebo abaꞌita yada mumuga ainaena yamohegomiu, teina dova: Ebe towaho iwalo yemidi yana heda ainai, yana waloyemidine nigele teya yaiya howahowana yo imwau gwaipiledi.

¹⁶Dova hinage Yaubada yana waloyemidi Abelaham yana huhu imohei. Nigele ebeha Buki Veꞌahihi iyawalo, ‘Huhuwo aidiyai’ na hesi yana huhu ehebo taꞌi ainai, neta Besinana.

¹⁷Ana hanapu neta Yaubada yana ulewahi ivenuwamwau mugaiyei Abelaham ainai, eeta bolimai 430 tuluhanai Mosese yana loina imahalava. Na nigele howahowana waloyemidine ihoꞌe, bo imwau gwaipilei loinanane ainaena, na hesi mayana wahiyala howola imiyamiya.

¹⁸Amnuwanuwatuwu avivini, ebe ada awanamwanamwa talobai Mosese yana loina ainaena, neta mata nigele Yaubada yana walo yemidi tayalobai. Na hesi mugai Yaubada awanamwanamwa iwalo yemidiyei Abelaham ainai.

¹⁹Na hava vehabana loina imamahalavane? Loinane iꞌaꞌabiye mahalavane alidai yada yababao vehabadi ta alidai imiyamiya ana higa Abelaham yana huhuwa Yaubada iwalo yemidiyeiwa imamahalavamane. Na loinane tausagenawasa aidiyena Mosese ivai, ta tomowa imohedi.

²⁰Na Yaubada yana waloyemidi ana mohene vagana, wuwuna Yaubada imohe dumwalu Abelaham ainai. Yada yemidiyena Yaubada iꞌawa natunaegita

²¹Havena amnuwanuwatuwu ebeha Mosese yana loina Yaubada yana waloyemidi iveveꞌalehaei? Wuwuna nigele hinage teya loina howahowana yo yawahida imohegita bo yada mumuga iꞌabiye dumwaludi. Nigele.

²²Na hesi Buki Veꞌahihi maudoida iꞌawa yababaegita, eeta Yeisu Besinana ana tauyemidiwo hibom Yaubada yana waloyemidi hilobalobai.

²³Mugai haugana nigele yemidi tayahanapui, ita Mosese yana loina iꞌabi avivinigita na tamiya vitai, ana higa Yaubada yemidi iꞌabiye mahalava alidai.

²⁴Ta loinanane iꞌitaꞌita avivinigita ana higa Besinana imahalava, na ebe tayemidi ainai mata Yaubada iꞌawa namwanamwaegita.

²⁵Teina hauga Besinana bada ilaomaꞌo, eeta loina yana ita avivini alidai iꞌoviꞌo,

²⁶na hesi yada yemidiyena Yaubada howahowana iꞌawa natuguwegita, Yeisu Besinana baidada.

²⁷Wuwuna yaiyadiwo omiu ambapitaisoꞌo Yeisu Besinana yehanaena bada Besinana ibom baidamiu ammiya ehebo.

²⁸Na hinage maudoida Besinana baidada, na nigele teya wahei holadai iyamiyamiya. Ainaena taumiya Yudeya yo vali bodao ita ehebo, na taubadao yo yana taupaihowao hiya boda ehebo, yo hinage towatowaho na waiwaihiu hiya boda ehebo, ta maudoida Yeisu Besinana ainaena taveboda eheboꞌo,

²⁹ta maudoida Abelaham yana huhu, wuwuna maudoida Besinana yana bodao, eeta Yaubada yana waloyemidi Abelaham ainai bada tavaiyaꞌo.