Read Kurada Galetiya 6 Bible Online

Galetiya 6 - Kurada bible

Galetiya 6

¹Tahiguwao, ebe tahida ehebo yana lauhapuli ainaena ibeꞌu, omiu aluꞌaluwamiu wahiwahiyaladi amtowoi ta tahidane amvedumwalu, nuwahegoyaena, na hesi amꞌitaꞌitayoigomiu, ta ebe havena hinage yana aba beꞌune ainai ambeꞌubeꞌu.

²Ami avaꞌavalao vitavitaidi aidiyai amvehaguhaguyoigomiu, wuwuna teina ada loina Besinana ainaena.

³Ebe yaiya iꞌabihiniuyoi ebeha iya tauwasawasa, neta iꞌoꞌoyamauyowei.

⁴Eeta howahowana ehebo ehebo ibom yana mumuga iꞌita, aiteya paihowa namwanamwana na aiteya yababana. Na ebe namwanamwana, anawalo vetuvehaei yana nuwatuwuwena ibom ilautowoi na havena ana geluwo yadi walo ainaena.

⁵Na ada avaꞌavala tabom ehebo ehebo taꞌavalaidi.

⁶Tapwalolo ana tauveꞌitao, ebe hanapu hiveꞌitagita, howahowana ginauli tamohedi, ebe teya hava aidiyai iꞌubwa.

⁷Havena ubom uꞌoyaꞌoyamauyoigo, wuwuna nigele howahowana Yaubada taꞌoyamaei. Havaidova towaho itudai, ainaena ilauꞌeli.

⁸Ebe yada nuwalelewo ainaena iꞌuma, lauꞌeline ainai yababana ilobai, na ebe Aluꞌaluwa Veꞌahihi ainaena iꞌuma, mata yawahi miyamiya vateyaina iꞌeli.

⁹Havena yada paihowa namwanamwadi aidiyena tatapitapiya, wuwuna ebe havena tatapitapiya, mata laulauꞌeli ana hauga lauꞌeli namwanamwana talobai.

¹⁰Ainaena howahowada hauga maudoina tomowa maudoidi tahaguhaguidi, na hesi Yaubada ana tauyemidiwo tahaguidi mwalaꞌina. Walo yana abaꞌovi

¹¹Lele teina mehena mwalaꞌina yau nimaguwena yaleleyawa.

¹²Yudeya yadi hapi ana tauvaiwo nigele nuwadi yagu guguyane teina dova: ada abiyedumwalu talobai Besinana yana mwalowoi aꞌava ainaena, na nigele hapi ainaena. Eeta hiveꞌiveꞌiꞌimanegomiu ta ebeha yadi hapine amvai, ta hiꞌawa namwanamwaegomiu.

¹³Na amnuwatuwu avivini ebeha hapi ana tauvaiwo ilowoinanedi yo Mosese yana loinao maudoidi himulitaedi, na hesi nigele hiyamulimulitaedi. Neta taꞌi nuwanuwadi hapi amvai, ta tenem yadi abagagasa yami luwu adi boda holanai vehabana.

¹⁴Na yau havena yawalo haehae, na hesi yada Bada Yeisu Besinana ana aiwa lagalagana vehabana yawalo haehae, wuwuna mumuga baleꞌu iꞌoiye mwalowoiyaꞌo ta yana loinane aliguwai iꞌoviꞌo, na hinage hibom mumuga baleꞌu ana taumulitao hitaꞌwataꞌwataegau dova yau taumwalowoi.

¹⁵Moiha taꞌi, hapi nigele ginauli mwalaꞌina, na hinage ebe hapi nigele tayavai teina nigele ginauli mwalaꞌina. Ginauli mwalaꞌinane ehebo taꞌi, neta ebeha Yaubada Aluꞌaluwana iꞌabiye vauvaugita.

¹⁶Ebe iꞌabiye vauvaugita mata Yaubada yana nuwadaumwali yo yana atemuyamuya imiya vahaligita ta dova Isileliwo moiha.

¹⁷Teina hauga yo hauga ilalaoma aidiyai havena teya yaiya iꞌabiꞌabiye tauꞌwataꞌwatagau, wuwuna ꞌwapiguwai Yeisu yana veꞌiveꞌilala himiyamiya, teina ꞌweyadine yalobaidi yana paihowa vehabana.

¹⁸Tahiguwao, yada Bada Yeisu Besinana yana veꞌiꞌila namwanamwana aluꞌaluwamiu aidiyai. Moiha.