Read Kurada Pilipai 1 Bible Online

Pilipai 1 - Kurada bible

Pilipai 1

¹Yau Paulo na Timoti baidagu apaipaihowa Taulivahi Yeisu vehabana, yami leta aleleyawa omiu taumiya Pilipai Yeisu Besinana yana Yaubada yana bodao yo hinage yami taumugaiwo na Besinana yana taupaihowao maudoimiu alimiyai.

²Aꞌawanoi Tamada Yaubada na yada Bada Yeisu Besinana yadi veꞌiꞌila yo yadi nuwadaumwali imiyamiya alimiyai. Paulo yana awanoi taumiya Pilipai vehabadi

³Hauga teina Yaubada ainai yaꞌawa yauwedo, hauganane yanuwatuwuigomiu.

⁴Na yayaliyaya vehabamiu yagu awanoiwo aidiyai.

⁵Yo Yaubada ainai yaꞌawa yauwedo ama haguwo alimiyena alobalobaidi, wasa namwanamwana ana walomahalava abavetuwuni ainai ta wau.

⁶Yo hinage yahanapui ebeha Yaubada yana paihowa namwanamwadi bada alimiyai ivetuwuniyaꞌo ta ibom mata iveꞌovi Yeisu Besinana yana ahubena mwalaꞌina ainai.

⁷Yagu yaliyaya vehabamiu idumwalu wuwuna omiu nuwagu amvaiyaꞌo, ta omiu baidaguwao Yaubada ihaguhaguigita teina hauga vada paipaiyai yamiyamiya, yo ihaguhaguigita hinage wasa namwanamwana ana loꞌaleha, yo yana abawahiyala aidiyai.

⁸Yaubada ihanahanapuigau neta Yeisu Besinana yana velauwena nuwanuwagu yavelauweomiu.

⁹Na yaꞌawa awanoi vehabamiu ta yami velau namwanamwa imwalaꞌi, mayami hanapu yo nuwamasele maudoina.

¹⁰Ta ainaena ginauli namwanamwadi amvesinuwaidi, eeta Besinana yana ahubena ainai mata mumugamiu dumwadumwaludi yo masemaseledi,

¹¹na yami paihowa namwanamwadi Yeisu Besinana yana wahiyalaena vehabamiu tomowa Yaubada hiwalo vetuvehaeyei yo hiꞌawa wasawasaei. Paulo yana talam Besinana ainai

¹²Tauhiguwao, nuwanuwagu yo amhanapui ebeha vitaiwone teina bada yalobaidiꞌo ta aidiyena wasa namwanamwana iꞌaiyauya tomowa bagibagilidi aidiyai.

¹³Ainaena dalava teina Sisa yana tauꞌalehao yo tomowa maudoidi bada hibenalenaꞌo ebeha Besinana vehabana himwamwauwigaune vada paipaiyai.

¹⁴Yo hinage tahidao bodadi yagu miya vada paipaiyai hiꞌitayaꞌo, ta hinuwamotu yada Bada yana paihowa ainai, yo Yaubada yana walo hiwalowalo mahalava mayadi atepatu.

¹⁵Tupwadi tauguguyao alomagigiliyena higuguguguya Besinana vehabana, na tupwadi neta nuwatuwu namwanamwa ainaena higuguguguya,

¹⁶ta hiya hivelauwegau yo hihanapuigau neta vada paipaiyai yamiyamiya wasa namwanamwana ana veꞌita vehabana,

¹⁷Na hesi tauꞌalomagigiliwone nuwanuwadi ta hiꞌabiye nuwavitaiyegau hauga teina vada paipaiyai yamiyamiya, eeta oyamaena Besinana wasana higuguguguyaei hibom yadi boda vehabana.

¹⁸Besiwa, na Besinana wasana ana guguya mwalaꞌina vehabana yayaliyaliyaya, nuwana oyamaena bo walomoihaena.

¹⁹Yo hinage yayaliyaya, wuwuna yahanahanapui neta Yeisu Besinana Aluꞌaluwana yana hagu ainaena, yo yami awanoi aidiyena, ebe hilivahigau teina miya vitai ainaena.

²⁰Hinage mayagu nuwatuwuhae ta nuwanuwagu mwalaꞌina ebeha havena yahinihinimaya, na hesi mayagu atepatu teina taꞌi ta hauga maudoina Besinana yehana yaꞌabiꞌabiye mwalaꞌi, nuwana yagu miya baleꞌuwai mayawahigu, bo nuwana yagu mwalowoi ainaena.

²¹Moiha taꞌi, yagu miya baleꞌuwai neta Besinana baidagu, na hesi yagu mwalowoi ainai lauhepoi Besinana ainaena mata yalobai.

²²Ebe baleꞌuwai yamiyamiya yagu paihowao namwanamwadi Besinana vehabana himahamahalava, eeta nigele yayahanapui hava mata nuwanuwagu yavesinuwaeine.

²³Na ginauli bwau aidiyena adi vesinuwa aliguwai hivitai alili. Nuwanuwagu yo baleꞌu teina yalaugabaei ta Besinana baidagu amiyamiya, neta abayaliyaya mwalaꞌina.

²⁴Na hesi ilowoinanegau ta baleꞌuwai yamiyamiya yo ebe yahaguhaguigomiu.

²⁵Eena yahanapui moiha mata omiu baidaguwao tamiyamiya na yahaguigomiu ta amyaliyaya yami yemidi Besinana ainai vehabana,

²⁶yo hinage yagu laugwaipilewa alimiyai vehabana amyaliyaya mwalaꞌina, wuwuna Yeisu Besinana yana hagu alidai.

²⁷Amꞌita avivinigomiu ebeha yami paihowaena tomowa Besinana wasana hiꞌawa namwanamawaei, eeta yatau boꞌeyegomiu, bo nuwana ebe yamiyauyo, bada taꞌi wasamiu namwanamwana yabenabenalei ebeha mayami atetalam amtowotowolo wahiyala, na yami nuwatuwu ehebo ta amꞌaiꞌaipate wasa namwanamwana ana yemidi vehabana.

²⁸Havena hinage ammehemeheuhi ami alehao aidiyai. Teina wuwuna hibom hihanapui moiha ebe hisilahe, omiu mata livahi amlobai Yaubada ainaena.

²⁹Wuwuna Yaubada bada italamꞌo alimiyai ta Besinana ainai amyemiyemidi ta ibom hinage vehabana muyao mata amlobaidi.

³⁰Dova yagu loꞌaleha Besinana vehabana yo agu muyao amꞌitadiꞌo, na teina hauga ambenabenaledi, ta omiu hinage yami loꞌaleha yo ami muyao dova amlobalobaidi.