Read Kurada Pilipai 4 Bible Online

Pilipai 4 - Kurada bible

Pilipai 4

¹Tauhiguwao, yagu velau alimiyai wuwuna omiu yagu abayaliyaya yo yagu abanoꞌo, eeta yagu nuwatuwu mwalaꞌina ebe yaꞌitauyoigomiu. Amtowolo wahiyala yada Bada ainai. Guguya

²Omiu waiwaihiu, Yuwodiya na Sinitiki yaꞌawanoi alimiyai ebeha amveꞌawa auꞌaugeluyo, yada Bada yana nuwatuwu teina dova.

³Hinage owa augelu moiha, yaꞌawanoi ta waiwaihiu teina uhaguidi, wuwuna mwalona hibom baidaguwao apaipaihowa toyawa wasa namwanamwana ana walomahalava vehabana, yo hinage Kalemeniti na tupwadi agu tauhaguwo baidamaiyao apaipaihowa, hiya yehadi yawahi bukina holanai leleleledi.

⁴Hauga maudoina amyaliyaliyaya yada Bada vehabana, na yawalouyo ebeha amyaliyaya taꞌi.

⁵Howahowana yo tomowa maudoidi yami alamaꞌiꞌita hihanahanapui, wuwuna mata yada Bada iwuyouyoma.

⁶Havena teya hava vehabana amꞌateꞌatehawawali, na hesi amꞌawa yauwedo ginauli maudoidi vehabadi Yaubada ainai, na ampwagopwagogo, ta yami nuwatuwuwo vehabadi amꞌawaꞌawanoi.

⁷Ta Yaubada yana nuwadaumwali ainaena iꞌabiye yaliyayagomiu. Na yana nuwadaumwaline nigele howahowana tanuwamaseleyei eeta ainaena Yeisu Besinana baidamiu atemiu yo yami nuwatuwu himiya namwanamwa.

⁸Tahiguwao, teina yagu walo ana higa, neta ginauli moihadi vehabadi amnuwanuwatuwu: Ginauli namwanamwadi, yo dumwadumwaludi, yo masemaseledi, yo adi oleya namwanamwadi, yo venuwavaivaidi, ta hava ebe namwanamwa aidiyai, vehabadi amwalo vetuvehai.

⁹Omiu amveꞌaoꞌaonaegau, yagu paihowaone amꞌiꞌitadine aidiyena, yo yagu walowone aidiyena na yagu veꞌitaone ambebenaledine ta amhanapuidiꞌo. Ainaena Yaubada mayana nuwadaumwali baidamiu ammiyamiya. Taumiya Pilipai yadi velau Paulo ainai

¹⁰Yada Bada iveyaliyayagauꞌo wuwuna teina hauga amꞌatemuyamuyaegauꞌo. Mwalona nuwanuwamiu amhaguigau, na hesi nigele teya amwaha.

¹¹Ta havena yaꞌuluꞌulumiyai yagu miya vitai mwalona vehabana, wuwuna bada yahanapuiyaꞌo ta howahowagu yagu miyamiya maudoina aidiyai yayaliyaliyaya taꞌi:

¹²Hauga miyavitai bo yaliyaya; hauga mahuli bo vahali; hauga vewasawasa bo vewewelohe.

¹³Howahowagu miya maudoidi aidiyai ebeha yayaliyaya, wuwuna Besinana ibom baidagu ta ainaena iꞌabiꞌabiye wahiyalagau.

¹⁴Na yagu miyavitai teina bada amꞌabiye malamalaiyaꞌo yami haguwena, ta vehabana yaꞌawa yauwedo mwalaꞌina alimiyai.

¹⁵Omiu taumiya Pilipai amhanapuiyaꞌo wasa namwanamwana ana walomahalavao mugai alimiyai, na haugana Masedoniya yalaugabaei, nigele teya Yaubada yana bodao tobwatobwa yo aiꞌai ainaena hiyahaguhaguigau, na omiu hesi taumiya Pilipai ambom amhahaguigaune.

¹⁶Hauga mugai Tesalonaika ainai yamiyamiya amhaguigauꞌo na mulitai hinage amhahaguyoigaune.

¹⁷Yagu walo teina nigele ebeha nuwanuwagu aiyauya awawa ammohemohegau, na hesi ebeha yami aiyauya ainona alimiyai imwalaꞌi ami hagu moiha vehabana.

¹⁸Na yami velauwa Epapilodaito ivavaiyamawa maudoina yalobaiyaꞌo ta imwalaꞌi alili bada dova yami pwaoliwo Yaubada ainai amgabudiꞌo ta panena namwanamwana ibenalediꞌo ta vehabana iyaliyaya.

¹⁹Eeta yagu Yaubada yami venuwao maudoidi imohemohegomiu, neta ibom yana wasawasa ibagibagili alili Yeisu Besinana yana paihowa aidiyena.

²⁰Ainaena Tamada Yaubada tanoꞌowei ta nigele yana abaꞌovi. Moiha.

²¹Yagu awayauwedo Yeisu Besinana yana Yaubada yana bodaone maudoidi aidiyai, yo tahiguwone teinai baidaguwao amiyamiyane hinage yadi awayauwedo alimiyai,

²²yo Yaubada yana bodaone Sisa yana vadai hipaipaihowane, yo hinage Yaubada yana bodao maudoidi yadi awayauwedo alimiyai.

²³Yada Bada Yeisu Besinana yana veꞌiꞌilaena aluꞌaluwamiu himiya namwanamwa.