Read Kurada 1 Tesalonaika 2 Bible Online

1 Tesalonaika 2 - Kurada bible

1 Tesalonaika 2

¹Tahimaiyao, bada amhanapuiyaꞌo ebeha mwalona yama tauboꞌe alimiyai, nigele ayatauboꞌe awawa na hesi maꞌainona.

²Amnuwatuwu avivini hinage ebeha Pilipaiwone mwalona himumuga yababaegai ta hiꞌabiye hinimayaegai, na besiwa Yaubada iꞌabiye wahiyalagai, yo iꞌabiye atepatugai na wasa namwanamwana awawaloweine alimiyai, bwagana tomowa hiveꞌaveꞌalehaegai?

³Na aguguguguya alimiyai nigele oyamaena, nigele walo yababana ainaena, na hesi walomoiha ainaena.

⁴Yama paihowa teina Yaubada italam alimaiyai ebeha wasa namwanamwana awalo mahalavaei na yama walone nigele teya hava tomowa nuwanuwadi na hesi hava Yaubada nuwanuwana. Na nuwatuwuwone atemaiyai himiyamiya, Yaubada ibom ihanahanapuidi.

⁵Na amhanapuiyaꞌo mwalona alaowa alimiyai, nigele yama walo gwawawalidi yo hinage Yaubada ihanapuiyaꞌo nigele ebeha yama walo amꞌamnaena na ebeha yami ginauli avaidi.

⁶Na hinage ginauliwone apaipaihowaidine mehemiyai yo hinage vali tomowa mehediyai nigele ai ama noꞌo vehabana na hesi omiu ami hagu vehabana.

⁷Moiha, ai Besinana ana tauwalo mahalavao, howahowana avetauloina alimiyai, na hesi nigele. Yama mumuga alimiyai mayama nuwahegoya dova waihiu natunao aidiyai mayana nuwahegoya.

⁸Na nuwamai amvaiyaꞌo eeta mayama atetalam alimiyai Yaubada wasana ayewasaei na hinage ai abom atalamwegai ta aꞌawa auꞌaugelu moiha alimiyai.

⁹Ama geluwo amnuwatuwu avivini mwalona yama paihowa alimiyai ahubena yo boniyai aidiyai apaipaihowa mwalaꞌina, ta ebe abom aveꞌaigai na hinage Yaubada wasana awalo mahalavaei alimiyai, wuwuna nigele nuwanuwamai ami vitai amwauwi ama itaꞌavivini vehabana.

¹⁰Omiu Besinana ana tauyemidiwo, na yama mumuga alimiyai amhanapuiyaꞌo, yo hinage Yaubada ihanapuiyaꞌo ebeha masemaselemai yo dumwadumwalumai na namwanamwamai.

¹¹Wuwuna maudoimiu aꞌita avivinigomiu dova towaho natunao iꞌitaꞌita avivinidi,

¹²na hinage aguguyeigomiu ta aꞌabiye wahiyalagomiu na awalo alimiyai ta ammumuga namwanamwa, wuwuna Yaubada ivesinuwaigomiuꞌo iya yana abaloina yo yana wasawasa vehabana.

¹³Tahimaiyao, hauga maudoina aꞌawaꞌawa yauwedo Yaubada ainai, wuwuna Yaubada yana walo bada amohegomiuꞌo ta ainai amtalamwegomiuꞌo nigele ebeha tomowa yadi walo na hesi Yaubada ainaena. Eeta moiha, walone Yaubada ainaena amyemidiyenaꞌo ta ana wahiyala bada amlautowoiyaꞌo.

¹⁴Na hinage miya vitai amlobaiyaꞌo, dova hinage Yeisu Besinana ana tauyemidiwo Yudeya ainai, wuwuna Yaubada yana bodao miya vitai hilobalobai hiya yadi boda aidiyena.

¹⁵Ainaena Yudeya hiya mumugadiyena, ta yada Bada Yeisu hiꞌoiyemwalowoi yo hinage mwalona tauwalo mahalavao hiꞌoꞌoiyemwalowoidine eeta ai hinage hiveꞌalehaegai ainaena Yaubada nigele aidiyai iyayaliyaya wuwuna tomowa maudoidi hitaꞌwataꞌwataedi.

¹⁶Yama walomahalava tupwa maudoina tomowadiyao aidiyai hitowotowoi na hiꞌauhigai wuwuna nigele nuwadi na Yaubada ilivahigomiu, ainaena yababa iꞌoiye mwaudi ta Yaubada yana modiꞌini bada hiveꞌaloyaꞌo. Paulo nuwanuwana ebeha itauboꞌeyoidi

¹⁷Tahimaiyao, mwalona alaugabaigomiu na hauga ahuꞌahubalina nigele ayaꞌitauyoigomiu na hesi nigele ayanuwapwanopwanowegomiu na atowotowoi wahiyala ta alaowa habi itauyoigomiu.

¹⁸Yau Paulo yatowotowoi wahiyala na ebeha alaowa na atauboꞌeyegomiu, na aꞌaipate ahaya, wuwuna Tomodulele yama amwaha iguduguduidi.

¹⁹Omiu ambom anuwanuwatuwu avivinigomiu na ebe aiteya hauga yada Bada Yeisu yana mahalavama,

²⁰mata walo vetuvehae yo yaliyaya vehabamiu alobai.