Read Kurada 1 Tesalonaika 3 Bible Online

1 Tesalonaika 3 - Kurada bible

1 Tesalonaika 3

¹Haugana Atenisi ainai amiyamiya aꞌateꞌatehawawali vehabamiu eeta yaloina yawalo, ‘Timoti, ulau Tesalonaika na ataubwau teinai amiyamiya’.

²Eeta tahidane Timoti avetamalenawa, wuwuna iya teya ama boda Yaubada yana paihowa Besinana wasana vehabana, tahidane avetamalenawa ta ebeha iꞌabiye wahiyalagomiu na Besinana ainai amyemidi moiha,

³ta ebe havena yami muyamuya aidiyena amtapitapiya, wuwuna bada miya vitaiwone amhanapuidiꞌo ebeha maudoida talobalobaidi.

⁴Mugai ai baidamiu tamiyamiya, bada awaloꞌo alimiyai mata miya vitaiwone alimiyai himahalava, eeta teina himahamahalavane.

⁵Neta vehabana yanuwanuwatuwu mwalaꞌina ta Timoti yavetamalenawa na yami yemidi iꞌita ta wasamiu ivaiyama aliguwai, wuwuna aꞌatehawawali Tomodulele ainai, mata dova ta abatowoi mwalaꞌina imohegomiu na amtapiya ta yama paihowa mwalona alimiyai iꞌabiye yababa.

⁶Ainaena Timoti ilaowa na wasamiu ivaiyama iwalo, ‘Tesalonaika Besinana ainai hiyemidi moiha na velau wuwudi na hinage hauga maudoina yada tauboꞌe mugamugaina hinuwatuwu avivini mayadi yaliyaya, na nuwanuwadi ta hiꞌitauyoigita’. Ai hinage dova nuwanuwamai na aꞌitauyoigomiu.

⁷Tahimaiyao, bwagana mayama muyamuya yo mayama miyavitai na hesi yami yemidi wasana bada abenalenaꞌo ta iꞌabiye yaliyayagaiꞌo.

⁸Ainaena yami towolo wahiyala Bada vehabana ama lautowoi inamwanamwa.

⁹Eeta yama awayauwedo Yaubada ainai nigele howahowana alaumwauwi, wuwuna Yaubada ainai yama yaliyaya vehabamiu imwalaꞌi alili.

¹⁰Na boniyai yo ahubena aidiyai aꞌawaꞌawanoi wahiyala ebeha manimiu aꞌitauyoidi yo hinage viha ababeꞌu alimiyai himiyamiya aidiyena aꞌabiye wahiyalagomiu.

¹¹Ainaena yagu nuwatuwu bwau teina: Mugai Tamada Yaubada yo yada Bada Yeisu yama amwaha hiloinaei na ainaena alaowa alimiyai.

¹²Bwauna ebeha Bada yana velauwena iꞌoiye mwaugomiu na ambom amvelauyoigomiu, yo hinage vali tomowa amvelauwedi, dova ai avelavelauwegomiune.

¹³Na ebe haugana yada Bada Yeisu maꞌana tauyemidiwo himahalavama omiu mayami wahiyala yo nuwamiu masemaseledi Tamada Yaubada mehenai amtowolo.