Read Kurada 1 Tesalonaika 5 Bible Online

1 Tesalonaika 5 - Kurada bible

1 Tesalonaika 5

¹Tahimaiyao, nigele howahowana na yami letane teina ainaena awalo alimiyai aiteya hauga ainai Yeisu mata iwuyoma,

²wuwuna bada amhanapuiyaꞌo ebeha nigele tayahanapui, na hesi yana laomane dova tauꞌaivavali yana laoma boniyaiyena,

³na ebe tomowa hiwalo, ‘Yadi miya maudoina namwanamwana’, na mulitai hisilahe hiya mata iveꞌaluwagavaidi dova waihiu yana abivelolo yana hauga labalaba ainai. Ainaena teina dova silahene nigele howahowana hidena gabaei.

⁴Eeta tahimaiyao, omiu nigele tupwa guguyouna ainai amyamiyamiya, ainaena silahe haugana mata nigele iveꞌaluwagavaigomiu dova tauꞌaivavali.

⁵Wuwuna omiu masele ainai ammiyamiyane, eeta maseleyena talaulau na havena guguyou yana amwahaena.

⁶Ainaena havena taꞌenoꞌeno, dova tomowa maudoidi hiꞌenoꞌenone, na hesi Yeisu tahaꞌwahaꞌwai mayada nuwadumwalu.

⁷Havena ita dova hiya taumeheꞌenoꞌeno, yo bwahi wahiwahiyalana aadina taunumao, hiya guguyou yadi abapaihowa.

⁸Na hesi ita masemaseleda, eeta ita tabom taꞌita avivinigita, yo aluꞌaluwada tawutuꞌauꞌauhi Yaubada ana yemidi yo ana velau aidiyena, na hinage mayada nuwatuwu avivini ada livahi howola abo talobai ainaena.

⁹Wuwuna Yaubada nigele ebeha iloinaegita na yana modiꞌini ana tupwa ainai tamahalava, na hesi nuwanuwana yada Bada Yeisu Besinana yana paihowa ainaena lavihi tavai.

¹⁰Eeta Besinana vehabada imwalowoi ta ebe mayawahida bo mwalomwalowoida na iwuyoma, ilauvaigita ta baidada tamiya vateyai.

¹¹Ainaena howahowana ambom amꞌabiye wahiyalagomiu yo amvehaguhaguyoigomiu, neta paihowane dova teina hauga ampaipaihowaidine. Abaꞌovi

¹²Tahimaiyao, aꞌawanoi alimiyai ebeha ami taumugaiwone aidiyai amveꞌahihi, yo amvelau iliꞌilimanidi, wuwuna Bada yana paihowa hipaipaihowai, neta hiꞌitaꞌita avivinigomiu yo higuguguguya alimiyai. Na ehebo ginauli hinage havena awapaꞌipaꞌiꞌi, na hesi nuwadaumwaliyena ammiyamiya.

¹⁴Tahimaiyao, howahowana hinage tautuluhayaiyai amguguyeidi, yo tauꞌatehawawali amꞌabiye atepatudi yo tautapiya amhaguidi, teina ginauliwone alamaꞌiꞌitaena ampaipaihowaidi.

¹⁵Amꞌita avivinigomiu, havena teya alimiyena yababana iyemayemaiha yababana ainaena, na hesi hauga maudoina amvelauyoigomiu, na amvehaguhagu, yo vali tomowa hinage amhaguidi.

¹⁶Hauga maudoina amyaliyaliyaya.

¹⁷Hinage hauga maudoina Yaubada ainai amꞌawaꞌawanoi.

¹⁸Yo hauga maudoina amꞌawaꞌawa yauwedo Yaubada ainai yami miya namwanamwadi yo yababadi vehabadi. Neta Yaubada yana nuwatuwu, ita Yeisu Besinana yana bodao vehabada.

¹⁹Havena Aluꞌaluwa Veꞌahihi yana paihowa amꞌauꞌauhi,

²⁰Eeta ebe tauguguya teya iwalo mahalava, havena yana walomahalavane amtaꞌwataꞌwataei,

²¹na hesi walonane amtowoi na ebe namwanamwana amꞌabi avivini,

²²na ebe yababana neta maudoina amtaꞌwataꞌwataei.

²³Yaubada iya miya daumwali wuwuna, eeta aluꞌaluwamiu yo nuwamiu yo taumiu iꞌabiye masele moiha ta himasele ta ebe ammumuga namwanamwa na ammiyamiya ana higa Yeisu Besinana iwuyoma.

²⁴Yaubada ivesinuwaigomiu, iya Taudumwalu eeta hava bada iwalowediꞌo mata ipaihowaidi.

²⁵Tahimaiyao, amꞌawanoi vehabamai Yaubada ainai.

²⁶Na hinage Yaubada yana bodao maudoimiu velauwena amꞌatuhapwaliuyoigomiu.

²⁷Na yaloinaegomiu Yaubada yehanaena na leta teina tahidao mehediyai amvahili.

²⁸Yada Bada Yeisu Besinana yana veꞌiꞌila alimiyai.