Read Kurada 2 Tesalonaika 2 Bible Online

2 Tesalonaika 2 - Kurada bible

2 Tesalonaika 2

¹Tahimaiyao, nuwanuwamai ebeha amhanapui Bada Yeisu Besinana yana mahalavawuyoma na yada miyatoyawa ainai vehabana,

²ta ebe havena amꞌateꞌatehawawali, ebe tomowa hiwalo, ‘Besinana yana hauga bada imahalavaꞌo’, havena amyemiyemidiyedi. Nuwana yadi walo hanapu aidiyena bo guguya hibebenaleine ainaena, bo nuwana yau yadi leta yalelelene aidiyai ainaena.

³Havena hinage teya oyama amyemiyemidiyei, na hesi amnuwatuwu avivini ebeha mugai howola abo tomowa bagibagilidi Yaubada hiveꞌalehaei, mata towaho yababana imahalava na abo mulitai Yeisu iwuyoma. Moiha, towahone yababanane neta guguyou towahona,

⁴iya Yaubada ana aleha na hinage tauyemidiwo maudoidi adi aleha, howahowana iya iꞌabihiniuyoi ta Yaubada yana vada tapwalolo ainai imiya na ivetauloina dova Yaubada.

⁵Amnuwatuwu avivini neta mwalona omiu baidaguwao tamiyamiya na ginaulidine vehabadi bada yawaloꞌo alimiyai.

⁶Ebeha yana hauga moihana ainai imahalavama na hesi hava iꞌauꞌauhi bada amhanapuiyaꞌo.

⁷Moiha teina taꞌi towahone yababanane yana paihowao himahamahalava dawani baleꞌuwai, na hesi towaho vagana paihowane yababadine iꞌauꞌauhidi ana higa tauꞌauhine itowolowahi

⁸abo tauyababane imahalavama. Na hesi tuluhanaena yada Bada Yeisu ilalaoma na yana wahiyala awanaena yo manina pigapigabunaena towahone iꞌabiye yababa.

⁹Na towahone yababanane ilaolaomane, neta Tomodulele yana wahiyalaena veꞌiveꞌilala yo vedevedede mata ipaihowaidi tomowa habi oyamaedi.

¹⁰Wuwuna hiya wasa moihana hitaꞌwataꞌwataei ta yadi tupwa neta dalava alaꞌalahina, ainaena Yaubada italamwediꞌo ta Tomodulele yana oyama maudoina hiyemidiyei, na abo lauvetala hilobai, wuwuna veꞌita moihana hitaꞌwataꞌwataenaꞌo,

¹²Eeta mumuga yababa ana paihowa nuwadi ivaiyaꞌo. Ebe mugai wasa namwanamwana hiyemidiyei, Yaubada mata ihaguidi na teina nigele. Yaubada yana vesinuwao

¹³Tahimaiyao, yada Bada ivelauwegomiu, wuwuna mwalona ivesinuwanegomiu ta ebeha Aluꞌaluwa Veꞌahihi ainaena iꞌabiye maselegomiu, na wasa namwanamwana amyemidiyei ami hagu vehabana, eeta howahowana hauga maudoina vehabamiu aꞌawa yauwedo Yaubada ainai.

¹⁴Mwalona Yaubada yana nuwatuwu dova na wasanane aguguyaei alimiyai ta amyemidiyei, neta ainaena yada Bada Yeisu Besinana yana wasawasa imohegomiuꞌo.

¹⁵Tahimaiyao, amtowolo wahiyala, yama veꞌitaone yo yama walowone aidiyai neta yama aubabada yo yama leta aidiyena.

¹⁶Tamada Yaubada ivelau moiha alidai, eeta hauga maudoina iꞌabiꞌabiye yaliyayagita, ta hinage tanuwatuwu avivini mata ginaulidine howola yana veꞌiꞌilaena abo vehabada ipaihowaidi.

¹⁷Yaubada yo yada Bada Yeisu Besinana hiꞌabiye yaliyayagomiu, yo hiꞌabiye wahiyalagomiu, yami paihowao aidiyai, ta hauga maudoina yami walowo hinamwanamwa.