Read Kurada 2 Tesalonaika 3 Bible Online

2 Tesalonaika 3 - Kurada bible

2 Tesalonaika 3

¹Tahimaiyao, ehebo ginauli hinage vehabana amnuwanuwatuwu na amꞌawaꞌawanoi Yaubada ainai, ta ebe Bada wasana yama guguyaena idabalala yo iwahiyala tomowa aidiyai, dova mugai alimiyai.

²Na hinage amꞌawaꞌawanoi ta tauyababao aidiyena Yaubada ihaguigai, wuwuna Bada ana tauuvalao bagibagilidi himiyamiya.

³Na hesi Bada yana abiꞌiliꞌilimaniyena howahowana iꞌabiye wahiyalagomiu, yo iꞌita avivinigomiu Tomodulele yana towoi ainaena.

⁴Eeta Bada ayemidiyei ebeha yama veꞌitao alimiyai mata ammulitaedi,

⁵na hinage iꞌabiye nuwamaselegomiu, yana velau vehabana, yo hinage yami alamaꞌiꞌita Besinana ainai vehabana. Havena abitauꞌwata

⁶Tahimaiyao, aloinaegomiu yada Bada Yeisu Besinana yehanaena ebeha tupwadi ada geluwo abiꞌabitauꞌwatadi havena aidiyai amꞌitaꞌitalau, wuwuna abitauꞌwata ai nigele ayaveꞌitagomiu.

⁷Ainaena bada amhanapuiyaꞌo ebeha howahowana ai amveꞌaoꞌaonaegai. Wuwuna mwalona omiu baidamaiyao tamiyamiya, nigele teya hauga ayaꞌabitauꞌwata paihowa ainai.

⁸Dova hinage ai abom amaiyena aiꞌai. Na boniyai yo ahubena aidiyai apaipaihowa, wuwuna nigele nuwanuwamai ami vitai amwauwi amai vehabana.

⁹Na hesi loina imiyamiya ebeha omiu amveꞌaigai, na besiwa ai abom amai vehabana apaihowa, eeta omiu yama paihowane amveꞌaoꞌaonaedi.

¹⁰Hinage mwalona tamiyamiya, aloinaegomiu neta ebe yaiya nigele iyapaihowa havena iꞌaiꞌai.

¹¹Wasamiu bada abenalenaꞌo ebeha tupwadi alimiyena hiꞌabitauꞌwata, ta nigele hiyamiya alahai na hiyapaihowa.

¹²Eeta ada geluwone nuwadiyai amwauwi, na yada Bada Yeisu Besinana yehanaena aloinaedi, na yadi paihowa hibom hipaihowaidi, na himiya alahai ta ebe aiꞌai hilobai.

¹³Tahimaiyao, paihowa namwanamwana vehabana havena amtapitapiya.

¹⁴Ebe yaiya veꞌita teina yami leta holanai nigele iyaꞌawa abiyei, havena towahonane ainai amꞌitaꞌitalau, na ainaena yana paihowane vehabana ihinimaya.

¹⁵Amtowoi ta havena amveꞌaveꞌalehaei, wuwuna iya tahida, eeta veꞌita aꞌava ammohei.

¹⁶Yada Bada iya nuwadaumwali wuwuna, ainaena iꞌabiye nuwadaumwaligomiu, yo iꞌabiye yaliyayagomiu hauga maudoina na baidamiu ammiya vateyai.

¹⁷Leta teina yana abaꞌovi yau nimaguwena yaleleyawa, dova yagu leta tupwadi aidiyai.

¹⁸Yada Bada Yeisu Besinana yana veꞌiꞌila maudoimiu alimiyai.