Read Kurada Pilimoni 1 Bible Online

Pilimoni 1 - Kurada bible

Pilimoni 1

¹Yau Paulo, Yeisu Besinana yehana vehabana hipaigau. Tahida Timoti baidagu amiyamiya. Owa tahimai Pilimoni yam leta yaleleyawa ta owa na ai tapaihowa toyawa.

²Na nuhudane Apiya na tahidane Akiposi taupaihowa haguigita ta Besinana yana boda na Pilimoni yam vada alonai hauga maudoina himiyamiya ahai avelauwedi.

³Yada Bada Yeisu Besinana yo hinage Tamada Yaubada yadi veꞌiꞌilaena na yadi nuwadaumwali himiya vahaligo. Pilimoni yana mumuga namwanamwana.

⁴Wasam bada yabenalenaꞌo neta yada Bada Yeisu uyemidiyenaꞌo na ana tauyemidiwo maudoidi uvelauwedi moiha, ainaena hauga maudoina yagu awanoi ainai yaꞌawa yauwedo Yaubada ainai vehabam.

⁶Na yagu awanoi yada awaheliheliyam Besinana ainaena iꞌabiye wahiyalago, na hinage ginauli bagibagilidi namwanamwadi Besinana ainaena himahamahalavama ebeha uhanapuidi.

⁷Tahigu, yam velau ainaena taumaselewo uhaguhaguidi na adi lautowoi uꞌabiye namwanamwadiꞌo, na wasam yo mumugam namwanamwana vehabam yabenalenaꞌo, eeta yayaliyaya mwalaꞌina. Paulo nuwanuwana na Pilimoni italamwei Onesimo ainai.

⁸Howahowana na Besinana yehanaena yaloinaego.

⁹Nigele neta dova na yaꞌawanoi hiyahiyau alimwai velau vehabana. Yau Paulo Bada yayemala tautaubadaꞌo, na teina haugane yau paipaigau Yeisu Besinana vehabana.

¹⁰Ta yaꞌawanoi alimwai natugu Onesimo vehabana, iya yama miya vada abapaiyai ainaena yaꞌawa natuguwei yana yemidi Besinana ainai vehabana.

¹¹Mwalona Onesimo yana paihowa alimwai nigele iyanamwanamwa, na teina hauga bada inuwabuiꞌo, na yana paihowane inamwanamwa aliguwai, na hinage yahanapuiyaꞌo yana mumuga alimwai mata inamwanamwa.

¹²Ainaena Onesimo yavevetamaleuyoiyawa mayagu nuwayababa.

¹³Eeta vada abapaiyai yamiyamiya wasa namwanamwana vehabana ainaena nuwanuwagu Onesimo yanuwavi aivelahem na ebe ihaguigau.

¹⁴Na hesi nigele mata yayanuwavi, wuwuna owa ana tauloina. Na hinage nuwanuwagu yam talam aliguwai velauwena upaihowai, na havena yagu veꞌiꞌima ainaena.

¹⁵Nuwana teina wuwuna eeta Onesimo ilaugabaigo hauga ubwaꞌubwana taꞌi na ebe ilau gwaipilewa baidam ammiya vateyai.

¹⁶Mwalona iya yam taupaihowa mohili, na teina haugane nigele ebeha ivetaupaihowa mohili na hesi ebe taꞌawa tahiguwei Yeisu Besinana ainaena. Yau bada yaꞌawa tahiguwenaꞌo, na owa howahowana uꞌawa tahi moiha ainai, wuwuna owa yam taupaihowa, na hinage tahim yada Bada ainaena.

¹⁷Pilimoni, owa na yau bada taꞌawa tahinaꞌo, ainaena agu velau yo agu lauvai dova Onesimo ulauvaiyoi atemwai yam hevali.

¹⁸Hava mwalona yana yababa yo ana vagavaga alimwai umwauwi abo yau yayemaihadi.

¹⁹Yau Paulo nimaguwena teina yalelewa mata maudoina yayemaiha veꞌovi. Na havena am vagavaga aliguwai vehabana yawalowalo, wuwuna mwalona yau yagu paihowaena ta aluꞌaluwam ivauvauyoꞌo.

²⁰Ae taihigu, nuwanuwagu Bada vehabana Onesimo uvelauwei, neta hagu mwalaꞌina aliguwai, na Besinana yehanaena uꞌabiye yaliyayagau.

²¹Yagu nuwatuwu teina bada yaleleyawaꞌo, mayagu yemidi ebe yagu walone ubenaledi na umulitaedi, na hinage uꞌabiye mwalaꞌi.

²²Ehebo ginauli hinage nuwanuwagu, neta yagu abaꞌeno yam vadai uꞌatububuni, wuwuna yanuwanuwatuwu yami awanoi Yaubada ainai mata ainaena hauga muhamuhana vada paipaiyena hilivahigau na yalaowa alimwai.

²³Epapilasi baidagu Yeisu Besinana yana paihowa vehabana vada paipaiyai himwauwigai, na Epapilasi yana velau alimwai.

²⁴Dova hiya hinage baidaguwao apaipaihowa: Maki, Alisitako, Dimasa yo Luke, yadi velau alimwai.

²⁵Yada Bada Yeisu Besinana yana veꞌiꞌila aluꞌaluwam imiya vahali.