Read Kurada Yemesa 1 Bible Online

Yemesa 1 - Kurada bible

Yemesa 1

¹Aꞌawa yauwedo omiu Yaubada yana tomowao huhu 12 aidiyena amlolouhagwaline na amlau ammiya taumana tupwa maudoina aidiyai. Teina yami leta yaleleyawa. Yau Yemesa, Yaubada yo yada Bada Yeisu Besinana yadi taupaihowa. Yemidi yo hanapu

²Tahiguwao, vitaidi amlobaidi vehabadi amyaliyaya,

³wuwuna tahanapui ebeha teina abatowoine yemidiyena tatowolo wahiyala.

⁴Hauga maudoina amtowolo wahiyala na ana higa amhuna iliꞌilimani ta Yaubada yana paihowa maudoina howahowamiu.

⁵Na ebe yaiyadiwo omiu Yaubada ana hanapu moiha nigele alimiyai, Yaubada ainai amꞌawanoi ta alimiyai iꞌaiyauya. Wuwuna iya Tautalam na Tauꞌaiyauya moiha.

⁶Na amꞌawanoi mayami yemidi moiha na havena yami nuwatuwu bwau, wuwuna hiya mayadi nuwatuwubwau hiya dova bagodu hilasalasa niꞌu awawai, na yaumai ihivehiveyedi.

⁷Taunuwatuwu bwaubwau mata nigele mumuga teya hiyalobai yada Bada ainaena.

⁸Wuwuna yadi mumuga maudoina iveꞌitaei ebeha hiya taulauyabayababa. Tauwasawasao na tauwewelohewo

⁹Ebe ada gelu ehebo iwewelohe iyaliyaya wuwuna Yaubada bada iꞌabihiniyaꞌo.

¹⁰Na hinage tauwasawasa ilowoinanedi yo hiyaliyaya ebe Yaubada imwauꞌaituluwedi, ta tomowa iveꞌitaei yana wasawasao dova awahi tayadi mata hisawali.

¹¹Wuwuna ebe mahana ihinali aidiyai mata yana wahiyalaena tayadine hiꞌwelai na hibeꞌu na hinage adi ita namwanamwadiwa isawali. Dova taꞌi tauwasawasaone howola mata yadi wasawasaone vehabadi hipaipaihowa na yadi mwalowoi nigele iyabweda. Abatowoiwo

¹²Ebe yaiya owa abatowoiwo aidiyai utowolo tamomohi, uyaliyaya vehabana, wuwuna mata ammaiha namwanamwana Yaubada ainaena ulobai. Neta yawahi miyamiyavateyaina. Teina Yaubada yana waloyemidi maudoida alidai, ebe tavelauwei.

¹³Na yaiya ebe owa abatowoiwone ulobaidi, havena unuwanuwatuwu pwano, na uwalo ebeha ‘Yaubada itowotowoigau’. Nigele howahowana na Yaubada tomowa itowoi wuwuna paihowa yababadi Yaubada nigele iyaꞌawa namwanamwaei,

¹⁴na hesi tabom yada nuwatuwu dawani aidiyena nuwatuwu yababadi iniuniuligita.

¹⁵Na yada nuwatuwu dawaniwone aidiyena paihowa yababadi himahamahalava, na mulitai mwalowoi imahalava.

¹⁶Yauwedowo tahiguwao, havena yami nuwatuwu ammwaumwau pwanolidi.

¹⁷Eeta amnuwatuwu avivini ebeha velau namwanamwagaugauna yo hinage velau namwanamwadi moiha galewaena hiꞌaiꞌaituluma Yaubada ainaena, ibom taꞌi masele adi Tauꞌabiye mahalava na hinage nigele howahowana imwaugwaipiledi, dova abaꞌailogulogu hibuibuidi.

¹⁸Na yana nuwatuwu ibom ainaena, na hinage yana walomoiha ainaena, iyemasele mugaiyegita ta ita yana yemaselewo maudoidi aidiyena tahae alili. Walo ana benali na ana paihowa

¹⁹Tahiguwao, howahowana na walo ambenalei iliꞌilimani, na havena waloveuyo yo modiꞌini aidiyai amwahiwahiyala.

²⁰Wuwuna tomowa yadi modiꞌini Yaubada yana amwaha dumwadumwaluna nigele iyalowoinanei.

²¹Eeta yami mumuga yo yami paihowa yababadi amtauvehuludi, na amtalamwegomiu Yaubada ainai, na hinage Yaubada walowa atemiyai iꞌuꞌumaiwa amyemidiyei, na amꞌawa abiyei ta ebe ainaena livahi amlobai.

²²Na havena ambenabenali mohili, neta amꞌoꞌoyamaegomiu, na hesi ampaihowai hinage.

²³Wuwuna ebe benali aꞌavana na nigele ana paihowa neta dova towaho ehebo gelasi ainai manina iꞌitaꞌita,

²⁴na mulitai ilau, na hauga ahuꞌahubalina ainai maninawa ana itawa bada inuwapwanopwanowenaꞌo.

²⁵Na Yaubada yana loina dumwadumwaluna ainaena yada yababao aidiyena ilivahigita. Eeta ebe yaiya loinanane vehabana inuwanuwatuwui na ipaipaihowai, na nigele iyanuwanuwapwanopwanowei, iya towahonane yana paihowa maudoina yaliyaya aꞌava.

²⁶Na ebe teya towaho inuwahaehae ebeha iya tautapwalolo moiha, na nigele yana walo iyaꞌita avivini, yana tapwalolone ginauli awaꞌawawa.

²⁷Na hesi tapwalolo masemaselena yo dumwadumwaluna Yaubada Tamada mehenai teina ebeha hiya sinasinagehedi yo hiwahiwapewo yadi miya vitai ainai tahaguidi, na hinage havena mumuga baleꞌu ainaena taꞌabiꞌabiye biꞌidi.