Read Kurada Yemesa 2 Bible Online

Yemesa 2 - Kurada bible

Yemesa 2

¹Tahiguwao, omiu yada Bada Yeisu Besinana namwanamwana ana tauyemidiwo havena yami vesinuwa ammwaumwauwi tauwasawasao aidiyai.

²Eeta ebe tomowa bwau hiluwu yami vada tapwalolo holanai, ehebo iya tauwasawasa ana aleꞌo namwanamwana na hinage ana pasa namwanamwadi, na bwaunane wewelohena ana aleꞌo biꞌibiꞌidi.

³Ta ebe bwauwone amiꞌitadi mata tauwasawasane amveꞌahihiyei na ainai amwalo, ‘Abamiya teina namwanamwanane ainai umiya’, na wewelohewa mata ainai amwalo, ‘Netai utowolo’ o ‘Umiya hevalai’.

⁴Na ebe yami vesinuwa teina dova, ana ita nigele namwanamwana, wuwuna nuwatuwunane nigele iyadumwalu.

⁵Tahiguwao, yagu walo teina ambenaledi, neta ebeha Yaubada tauwewelohe baleꞌuwai ivesinuwaedi ta ebe yemidi ainaena hivewasawasa wuwuna Yaubada yana Abaloinane iwalo yemidiyenaꞌo ta ainai himahalava, ebe ibom hiyemidiyei.

⁶Na hesi tauwewelohewone nigele amyaveꞌahihiyedi. Na amnuwatuwui tauwasawasa yadi laulau, hiya hauga maudoina loina vitavitaina adiyena hiyemoyemodegomiu na lauvetala haugadi aidiyai hiveꞌewaigomiu.

⁷Amnuwatuwui hinage ebeha yada Bada yehana imohegita na hiya hesi yehanane hiꞌawaꞌawa yababaei.

⁸Na yada Bada yana loina mwalaꞌina Buki Veꞌahihi ainai iwalo, ‘Am geluwo uvelauwedi dova ubom amvelaune’. Teina mumuga namwanamwana.

⁹Na ebe tupwadi tomowa amveꞌahihiyedi na tupwadi tomowa nigele, neta bada loinanane amloꞌeyaꞌo na ambom yami mumuga amꞌabiye yababayaꞌo.

¹⁰Ta ebe yaiya loina ehebo iloꞌe neta bada loina maudoina hinage iloꞌediꞌo.

¹¹Wuwuna loina maudoina adi taumohe ehebo mohimohili taꞌi na iwalo, ‘Havena meheganawali’, na hinage iwalo, ‘Havena lauwunu’. Na ebe nigele amyameheganawali, na hesi amlauwunu neta bada yana loina amloꞌeyaꞌo.

¹²Ainaena yami walo yo yami paihowa amꞌita avivinidi, wuwuna Yaubada howola abo ivesinuwa yana loinaena, na yana loinane neta tomowa yawahida ada livahi vehabana.

¹³Ebe yaiya ana gelu nigele iyaꞌatemuyamuyaei, Yaubada hinage towahonane mata nigele iyaꞌatemuyamuyaei. Eena ebe yaiya tauꞌatemuyamuya Yaubada yana lauvetala mata nigele iyameheuhei. Yemidi paihowa baidana

¹⁴Tahiguwao, hava ana namwanamwa ebe yaiya iwalo, ‘Yau yayemidiꞌo’, na nigele iyavehaguhagu, yana yemidine mata iveginauli awaꞌawawa na mata nigele hagu iyalobai.

¹⁵Na ebe tanuwatuwui tahidao yo nuhudao vehabadi, hiya nigele adi aleꞌo yo hinage nigele adi,

¹⁶na aidiyai tawalo velau tawalo, ‘Yauwedo ammiya namwanamwa na amꞌai iliꞌilimani’, na ebe nigele hagu tayamohemohedi, hava yada walone ana namwanamwa?

¹⁷Teina dova yemidine ebe yemidi aꞌavana, na nigele paihowa baidana, yemidinane yemidi mwalomwalowoina.

¹⁸Na ebe tupwadi tomowa hiwalo, ‘Owa mayam yemidi na yau mayagu paihowa’. Yau yagu maiha yawalo, ‘Yam yemidine nigele paihowa baidana? Na yau teina yagu paihowaena yagu yemidi yaveꞌitaei na owa mata vedova yam yemidine ana oleya uveꞌitaeine.’.

¹⁹Owa uyemidi ebeha Yaubada ehebo, awa? Ehe neta ausala, eena unuwatuwu avivini ebeha Tomodulele maꞌana geluwo hiya hinage yadi yemidi dova, na hinage mayadi meheuhi.

²⁰Owa yauyaulem, Teina abaꞌita yamohego ebeha yemidi aꞌavana, na nigele paihowa, neta ginauli awaꞌawawa.

²¹Abaꞌita ehebo teina, tubudawa Abelaham yana paihowa ainaena Yaubada iꞌawa namwanamwaei. Yana paihowane neta natuna Aisake italamwei ta ebeha ipwaoliyei Yaubada ainai.

²²Teina ainaena tahanapui ebeha Abelaham yana yemidi yo yana paihowa hipaipaihowa toyatoyawa, ainaena yana paihowaena yana yemidi moiha iꞌabiye mahalavaei.

²³Eeta Buki Veꞌahihi yana walowa imahalava iliꞌilimani iwalo, ‘Abelaham Yaubada iyemidiyei, eeta yana yemidiwa vehabana Yaubada iꞌawa dumwadumwaluwei’, yo iꞌawa augeluweine.

²⁴Ainaena tahanapui ebeha Yaubada iꞌawa dumwaluwegita yada paihowaena na nigele ebeha yada yemidi aꞌava ainaena.

²⁵Abaꞌita bwauna teina! Lehabi ibom mehemeheganawalina na yana paihowa namwanamwana ainaena Yaubada iꞌawa dumwaluwei, wuwuna Yosuwa yana tauyewasao hitau bwau ihaguidi, eeta vali amwahaena hilalaune.

²⁶Dova taꞌi ebe tauda nigele Aluꞌaluwana neta bada mwalomwalowoina, na ebe yemidi nigele paihowa baidana, yemidinane mwalomwalowoina.