Read Kurada Yemesa 4 Bible Online

Yemesa 4 - Kurada bible

Yemesa 4

¹Hava vehabana aleha yo awapaꞌipaiꞌi himahamahalavane alimiyai? Nuwana ana wuwu teina, ehebo ehebo amnuwanuwalele dawani.

²Tupwana hauga nuwanuwamiu na ami geluwo yadi tobwatobwa amvaidi, na nigele howahowamiu, eeta amꞌoiyemwalowoidi na ginaulidine amhaloidi. Tomowa nigele howahowana yadi tobwatobwa amvaidi ainaena manini amvetuwuni. Na ginaulidine nigele amyalobalobaidi wuwuna nigele Yaubada ainai amyaꞌawaꞌawanoi vehabadi.

³Na ebe amꞌawaꞌawanoi vehabadi na nigele adi maiha amyalobaidi yami awanoine nigele namwanamwana, wuwuna ginaulidine vehabadi amꞌawaꞌawanoine neta ambom yami yaliyaya vehabana.

⁴Omiu tauyemidi oyaꞌoyamao amhanapui ebe baleꞌu mumugana amvelauwei, Yaubada bada amꞌabiye ꞌwaunihanihayaꞌo, wuwuna ebe yaiya inuwalele baleꞌu mumugana ainai iya neta Yaubada ana aleha.

⁵Ainaena havena Buki Veꞌahihi yana walomahalava amwalowalo dobidobiyei hauganane iwalo:‘Aluꞌaluwa Yaubada imwamwauwiwa alidai nuwanuwana mwalaꞌina ita.’

⁶Ainaena Yaubada yana hagu alidai imwalaꞌi iꞌalili, wuwuna Buki Veꞌahihi ainai iwalo mahalava iwalo:‘Yaubada taugagasa aidiyai iꞌauhi na hesi taunuwayababa aidiyai italam na ihaguidi.’

⁷Eeta Yaubada ainai amtalamwegomi na Tomodulele amsosomanaei, eena idena gabaegomiu.

⁸Na amlaoma Yaubada vahalinai ta ebe iya ilaowa vahalimiyai na omiu tauyababao nimamiu amꞌuwadi yo omiu taunuwatuwu bwaubwau atemiu amꞌabiye maseledi.

⁹Na yami mumuga yababadi vehabadi amdou taꞌetaꞌe mayami nuwayababa na yami maluwone amyemiya buidi ta amdou, yo hinage yami yaliyaya amyemiya buidi ta amnuwayababa.

¹⁰Na amnuwadobi yada Bada mehenai eeta ibom iꞌabihinigomiu. Vetalapili vehabana

¹¹Tahiguwao, havena ami geluwo amvetavetalapiliyedi, wuwuna ebe yaiya, iya tahina ivetalapiliyei, nuwana iloinaei, iya nigele Yaubada yana loina iyamulitaei. Hinage ebe yaiya loinaone iwalo dobidobiyei neta towahone iya tauꞌawa paꞌipaꞌiꞌi na nigele tauꞌawa abi.

¹²Na amhanapui ebeha Yaubada ibom loina ana taumohe, na hinage tauloina, ibom howahowana ilivahigo yo iyemwalowoigo. Ainaena omiu havena ami geluwo amꞌawaꞌawa yababaedi. Havena amwalowalo haehae

¹³Ambenali iliꞌilimani, ebe yaiyadiwo omiu amwalowalo gagasa na amwalo, ‘Mata bo iꞌahubena alau vali tupwa dalava mwalaꞌidi aidiyai na nemai bolimai ehebo amiyamiya, na abom yama paihowa apaihowaidi, na ebe ayemala wasawasa’.

¹⁴Na hesi nigele amyahanapui yawahimiu yana lau iꞌahubena vehabana, wuwuna ita tomowa dova malagau, imahalava hauga habuluna, na hinage isawaliuyo.

¹⁵Na hesi ilowoinanegita ebe teina dova amwalo, ‘Ebe yada Bada italam, neta amiyamiya na ginaulidine nuwanuwamai apaihowaidi’.

¹⁶Na teina mayami gagasa amwalowalo haehae, na amnuwatuwui ebeha walo haehae ginauli yababana.

¹⁷Ainaena ebe yaiya ginauli namwanamwadi ihanapuidi na nigele iyapaihowaidi neta yana pwanoli.