Read Kurada Yude 1 Bible Online

Yude 1 - Kurada bible

Yude 1

¹Yau Yude, Yeisu Besinana yana taupaihowa, na tahigu neta Yemesa. Teina yami leta yaleleyawa, omiu Tamada Yaubada ana vesivesinuwao, eeta ivelauwegomiu na Yeisu Besinana iꞌita avivinigomiu.

²Yaubada yana atemuyamuya yo yana nuwadaumwali yo yana velau imwalaꞌi alimiyai. Tauveꞌita oyaꞌoyamao

³Augeluwo, nuwanuwagu ada livahi vehabana yalaulelewa, na hesi nigele howahowana, wuwuna ehebo veꞌita vaga bada alimiyai imahalavaꞌo, eeta leta teina ainaena yaguguyeigomiu ta ebe havena yada abayemidi dumwaluna amtaꞌwataꞌwataei, na hesi amꞌaipate vehabana. Wuwuna tauveꞌahihiwo ita bada Yaubada abayemidiwo imohegitaꞌo.

⁴Vitai teina bada alimiyai imahalavaꞌo neta tupwadi tauyababao hiꞌoyaꞌoyamaegomiu ta ami boda ainai hiluwuꞌo, eeta Yaubada yana veꞌiꞌila alidai hiya yadi veꞌitaena himwaugwaipiledi ta pwanoli adi amwaꞌamwaha aidiyai, yo hinage yada Taubada yo yada Bada Yeisu Besinana hitaꞌwataꞌwataedi. Hiya yadi pwanoli vehabana adi loina vitaina mugai Yaubada yana buki ainai hileleyaꞌo.

⁵Yagu venuwa yawalouyowei, neta mugai amnuwamasele ainaena amnuwatuwu avivini, neta mwalona Bada yana boda ihaguidi ta himahalava tupwa Itipita ainaena, na mulitai aidiyena tupwadi imumutudine, neta hiya nigele hiyayemidi.

⁶Tausagenawasao hinage amnuwatuwu avivinidi, wuwuna yadi abamiyao hilaugabaidi ta himwauihiniuyoidi, ainaena Yaubada ipaidi ta dalava guguyou holanai imwauwidiꞌo, ta nemai himiyamiya ana higa lauvetala ana ahubena imahalava.

⁷Hiya yadi mumuga dova tupwadi dalava mugai, neta Sodoma yo Gomola yo tupwadi dalavao vahalidiyai, wuwuna pwanoli ana nuwavai mwalaꞌina ainaena hipaipaihowa awaꞌawawa na yadi taliya towatowahowo baidadiyao hipwanopwanoli, eeta Yaubada igabudi aiwa alaꞌalahi vateyaina ainai. Ta veꞌita tenem ita maudoida vehabada.

⁸Na tomowaone, bada hiluwuwaꞌo alimiyai, yadi mumuga eheꞌehebonane, wuwuna hiya yadi enoniviniviwo aidiyena veꞌita yababadi, hipaipaihowaidi, neta meheꞌayo na Yaubada yana loinao hiuvalaedi, na taumiya galewa masemaseledi hiꞌawaꞌawa yababaedi.

⁹Na hesi tausagenawasao adi taumugai Maikeli mugai iꞌawa paꞌipaꞌiꞌi Tomodulele baidana, Mosese tauna vehabana, na Maikeli nigele Tomodulele iyahinahinabodai. Na teina dova iwalo, ‘Bada ihinahinabodaigo’.

¹⁰Na tomowaone, ebe hava nigele hiyahanapuidi bada taꞌi hiꞌawa yababaedi, wuwuna hiya dova lagulagu, ta adi lautowoi iloiloinaedi, ta hiya hiꞌabiꞌabiye yababauyoidi.

¹¹Nuwayabayababadi, wuwuna Keni yana amwaha yababana ainaena hilaulau, na yadi tobwatobwa vehabana himumuga yababa dova hinage Balam mugai yana mumuga. Ainaena mata hisilahe, wuwuna Yaubada yana loina hitaꞌwataꞌwataenaꞌo, dova Kola mugai loina itaꞌwataꞌwataei.

¹²Ebe tapwalolo toyawa ainai aiꞌai ampaihowai, na tomowaone hiluwuwa, na aine hiꞌabiye yababa, wuwuna hiꞌai alaꞌalabili na hibom hinuwanuwatuwuyoidi. Nuwanuwadi hiya hiyaliyaya, ta adi oleya dova yalovi gibana yaumai ipeiyei, na nigele ꞌwesu. Hinage adi oleya dova aiwa yana hauga aino na nigele ainona, eeta lamlamna hidavai vehulu ta imwalowoi iliꞌilimani.

¹³Na hinage adi oleya dova bagodu mwalaꞌidi na gwalagwalabuhodi yadi paihowao abahinimaya. Hinage adi oleya dova utui hilowolowouhi awawauhi ta mata guguyou yana tupwa ainai himiya vateyai.

¹⁴Mugai Adam yana hauga ainai ta ilaoma Inoke ainai neta yaso maudoina 7. Inoke iwalo mahalava tomowaone vehabadi iwalo, ‘Amꞌita Bada ana tauveꞌahihiwo tausani viha baidanao hilalaoma,

¹⁵na ebe tomowa maudoidi iloinaedi na ilauvetalaedi yadi mumuga bagibagilidi na yababadi vehabana, na hinage yadi awayababa Yaubada ainai maudoina vehabadi.’

¹⁶Tomowaone tauꞌulumiyai na tauꞌawa yali, na hiya adi lautowoi ainaena hilaulau. Hinage tauwalo haehae, na ebe adi geluwo aidiyai hiwalo amꞌamna, neta tobwatobwa vehabadi. Amꞌita avivinigomiu

¹⁷Augeluwo, yada Bada Yeisu Besinana yana tauyewasao yadi walomahalava amnuwatuwu avivini haugana mwalona hiwalo,

¹⁸‘Hauga yana abaꞌovi ainai tupwadi tomowa mata mumuga dumwaluna hiꞌabi talawahiyei, wuwuna hiya adi lautowoi yababana iloiloinaedi’.

¹⁹Tomowaone mumuga baleꞌu himulimulitaei, ainaena hiya tauyemidiwo adi tauwaheiwo, ta Aluꞌaluwa nigele aidiyai.

²⁰Augeluwo, ilowoinanegomiu na yami yemidi veꞌaveꞌahihinaena amabiuyoigomiu ta amtowolo wahiyala na Aluꞌaluwa Veꞌahihi yana nuwatuwuwena amꞌawaꞌawanoi Yaubada ainai.

²¹Na hinage velaune Yaubada ainaena amꞌabi avivini, na amhaꞌwahaꞌwa maivihana abo yada Bada Yeisu Besinana yana atemuyamuyaena yawahimiu miyamiya vateyaina imohegomiu.

²²Na tupwadi ada geluwo hinuwabwaubwau amꞌatemuyamuyaedi na amhaguidi.

²³Tupwadi hinage dalava alaꞌalahina ainai himiyamiya, amtowoi ta amhaloidi. Tupwadi hinage taulauhapuliwo amꞌatemuyamuyaedi mayami meheuhi, ta yadi nuwalele yababadi dova luwuluwu biꞌibiꞌidi amtaꞌwataꞌwataedi. Walo vetuvehae

²⁴Yaubada howahowana iꞌita avivinigomiu ta havena ambeꞌubeꞌu, ana higa haugana iya mehenai ilauvaigomiu yana dalava masemaselena ainai, mayami mumuga namwanamwana, na hinage mayami yaliyaya mwalaꞌina.

²⁵Yaubada iya ibom ada Taulivahi, neta yada Bada Yeisu Besinana yana mumuga ainaena, eeta tawalo vetuvehaeyei yana wasawasa yo yana namanamalina yo yana wahiyala yo yana loina mugai ta wau yo hinage hauga hilalaoma aidiyai. Moiha.