Read Kuranko Ko-Dabirɛnu 1 Bible Online

Ko-Dabirɛnu 1 - Kuranko bible

Ko-Dabirɛnu 1

¹Alla ya duninya-dan dabira tumɛ min,

²dugi rakolɔn le nun, a pindi-pandi. Yi min sanɛ dugi wo kuma, pinpi burunnɛ wo kuma nun bɛfu! Kɔnɔ Allata Sɛnbɛ ye firifirila yi wo kuma. Duninya Dan-Koe Tele Fɔlɔtɛ

³ Nba Alla ko, “Waan ra ni ka.” Waan rakara.

⁴Wan-takanɛ wo ya Alla hɛnɛ. A ya waan anubɛ pinpi fara anu nyɔgɔn na.

⁵Alla ya wan-takanɛ wo tɔgɔ sa tele. A ya pinpi wo fanan tɔgɔ sa suyi. Suyi kera, bandɛ kara. Wo mara a tele fɔlɛ la. Duninya Dan-Koe Tele Fila Nyɔgɛ

⁶ Wo kɔma Alla ko, “Yi ni fara anu nyɔgɔn na. Do ni to san ma, do ni to dugu ma alako gbɛ ni taran yinu tɛma.” Yi farata anu nyɔgɔn na. Do tora san ma, do tora dugu ma. Gbɛ taranta yi wonu tɛma iko a ya a fɔ nya min.

⁸Alla ya gbɛ wo tɔgɔ sa san-kole. Suyi kera, bandɛ kara. Wo mara a tele fila nyɔgɛ la. Duninya Dan-Koe Tele Sawa Nyɔgɛ

⁹Wo kɔma Alla ko, “Yi min bi dugu ma, wo la ni dɛn kan-tina-kelen. Dugu-kole ni bɔ yi wo tɛma.” Wo mara iko a ya a fɔ nya min.

¹⁰Alla ya dugi wo tɔgɔ sa dugu-kole. A ya yi ladɛnnɛ wo tɔgɔ sa kɔgɔ-yi. Alla ya dugu-kole anubɛ kɔgɔ-yi mafɛlɛn. Wo ya a hɛnɛ.

¹¹Wo kɔma Alla ko, “Fui-fen wo, ki-fen wo, wo bɛɛ ni fɛrɛn dugu-kole wo kuma ka gbɔ iko anu sunu bi nya min.” A mara iko a ya a fɔ nya min.

¹²Fan bɛɛ fɛrɛnta dugu-kole wo kuma ka gbɔ iko anu sunu bi nya min. Alla ya wonu mafɛlɛn. Wo ya a hɛnɛ.

¹³Suyi kera, bandɛ kara. Wo mara a tele sawa nyɔgɛ la. Duninya Dan-Koe Tele Nani Nyɔgɛ

¹⁴Wo kɔma Alla ko, “Fan donu ni taran san-kole rɔ minnu si waan raka alako ka suyi anubɛ tele dan-natɛgɛ lɔn wonu fɛ, anubɛ ka watinu dan-nafarɛ lɔn fanan.

¹⁵Fan wonu ni waan raka san-kole anubɛ dugu-kole kuma.” A mara iko a ya a fɔ nya min.

¹⁶Alla ya wan-belebele fila dan, tele anubɛ karɛ, kɔni. Wan-kinamɛ ni mansayɛ kɛ tele rɔ. Wan-dɔgɔmɛ ni mansayɛ kɛ suyi rɔ. Wo kɔma, a ya lolenu dan.

¹⁷Tele wo, karɛ wo, lole wo, Alla ya wonu sigi san-kole rɔ alako anu ni waan raka dugu-kole kuma

¹⁸ka mansayɛ kɛ suyi anubɛ tele kuma ka waan anubɛ pinpi fara. Alla ya wonu mafɛlɛn. Wo ya a hɛnɛ.

¹⁹Suyi kera, bandɛ kara. Wo mara a tele nani nyɔgɛ la. Duninya Dan-Koe Tele Loli Nyɔgɛ

²⁰Wo kɔma Alla ko, “Nima-fannu ni taran yi rɔ. Konanu ni taran san ma.”

²¹Woletɔ Alla ya nima-fen-kinama-wɛ donu dan yi rɔ anubɛ nima-fen sufa siyamɛ donu. Alla ya kona-su-siyaman dan. Alla ya wonu mafɛlɛn. Wo ya a hɛnɛ.

²²Alla ya ala duwɛ layigi anu kuma, a ko, “Wole yirɔ-fannu, wo ni to yirila ka yinu nafa. Wole konanu, wo fanan ni to siyayala.”

²³Suyi kera, bandɛ kara. Wo mara a tele loli nyɔgɛ la. Duninya Dan-Koe Tele Wɔrɔ Nyɔgɛ

²⁴Wo kɔma Alla ko, “Nima-fen-su bɛɛsi ni taran dugu-kole kuma, a bintɔ-sogo wo, a so-tɛma-sogo wo, a dɔgɔma wo, a kinama wo.” Wo mara iko a ya a fɔ nya min.

²⁵Alla ya nima-fan wonu dan. A ya wonu mafɛlɛn. Wo ya a hɛnɛ.

²⁶ Wo kɔma Alla ko, “Ma ni mɔgɔni-gbuyi dan ma nyɛrɛta muninyɛ rɔ minnu si ma iko male. Woletɔ anu si mansayɛ kɛ duninya rɔ anubɛ nima-fan min bɛɛsi ye duninya rɔ, a yɛgɛ wo, a kona wo, a bintɔ-sogo wo, a so-tɛma-sogo wo.”

²⁷ Woletɔ Alla ya mɔgɔni-gbuyi dan a nyɛrɛta muninyɛ rɔ. A ya kei anubɛ musi dan.

²⁸A ya ata duwɛ layigi anu kuma ko, “Wo ni yiri ka duninya lafa. Fan min bɛɛsi ye duninya rɔ, wonu ni to wola sɛnbɛ kɔrɔ. Wo ni mansayɛ kɛ nima-fan bɛɛsi kuma duninya rɔ, a yɛgɛ wo, a kona wo, a sogo wo.”

²⁹Wo kɔma Alla ko, “Wo ni wo tole masɔ n na. Fui-fan anubɛ ki-fan min bɛɛ si gbɔ dugu-kole kuma, n bara wonu di wo ma ka anu ma wo beli-fan la.

³⁰N bara binyɛ anubɛ yanba-kunyɛ di sogenu anubɛ konanu ma.” Wo mara iko a ya a fɔ nya min.

³¹Alla ya fan min bɛɛsi dan duninya rɔ, a ya wonu mafɛlɛn. Wo ya a hɛnɛ feu! Suyi kera, bandɛ kara. Wo mara a tele wɔrɔ nyɔgɛ la.