Read Kuranko Ko-Dabirɛnu 11 Bible Online

Ko-Dabirɛnu 11 - Kuranko bible

Ko-Dabirɛnu 11

¹Fɔlɔfɔlɔ nun, mɔgɛ bɛɛsi ye kan kelen de fɔla nun.

²Anu tara tele-bɔɛ wara la ka anu sigi lɛɛ do rɔ Babilɔn nyamanɛ rɔ.

³Anu ya a fɔ anu nyɔgɔn ye ko, “Wo na, ma ni bulɔku gbesi ka a mintan a kin na!” Anu ya bulɔku-mintannɛ wonu sigi iko mɔgɛ si kuri sigi nya min bɔn sɔ tinɛ. Anu ya kolota[12] borolamɛ bi ka wo ma bulɔku wonu sigi-fan la.

⁴Anu ya a fɔ anu nyɔgɔn ye tun ko, “Wo na, ma ni so-karantan sɔ. Wo kɔma, ma ni san-bon-nayan-bɛ sɔ min si tugu san-kole la. Woletɔ ma tɔgɛ si bɔ. Ni ma ma wo ma, ma ra si nyɛnsɛn dugu-kole bɛɛ kuma.”

⁵Mari yigira ka soe anubɛ san-bon-nayan-bɛ wo mafɛlɛn hadama-dannu bi min sɔla.

⁶Mari ko, “Wo ni anu mafɛlɛn, ba? Mɔgɔ kelen de kɛnu na min bi kan kelen fɔla. Anuna wɔli-dabirɛ le kɛ la. Ni anu ya anu kɔnkɔn min ma, fɔ anu ba wo ma.

⁷Wo na, ma ni yigi anu bara ka anu kan yabasan alako anu kana anu nyɔgɔn kan lamɔɛn.”

⁸Woletɔ Mari ya anu tanyɛnsɛn dugu-kole bɛɛ kuma. Wo le ya anuna soe wo sɔ-koe tinya.

⁹Nyɔ-tɔgɛ sara Yabasanya[13] kamasɔrɔn Mari ya duninya-mɔgɛ bɛɛ kuman-kan yabasan nyɔ le ka anu tanyɛnsɛn dugu-kole bɛɛ kuma.

¹⁰Sɛma bɔnsɔn le kɛnu na. Yita-kasarɛ san filɛ kɔma, Sɛma sɔrɔn-san kɛmɛ ma, ale Sɛma ya Arafakasada sɔrɔn.

¹¹Arafakasada sɔrɔn kɔma, a ya san kɛmɛ loli bɔ tun. San kɛmɛ loli (500) kɛ kɔrɔ, a ya dan donu sɔrɔn, a nara to fagala.

¹²Arafakasada sɔrɔn-san bi-sawa ani loli ma, a ya Sela sɔrɔn.

¹³Sela sɔrɔn kɔma, Arafakasada ya dan donu sɔrɔn a nyɔgɔn san kɛmɛ nani ani san sawa (403) kɔrɔ, a nara to fagala.

¹⁴Sela sɔrɔn-san bi-sawɛ ma, a ya Iburu sɔrɔn.

¹⁵Iburu sɔrɔn kɔma, Sela ya dan donu sɔrɔn a nyɔgɔn san kɛmɛ nani ani san sawa (403) kɔrɔ, a nara to fagala.

¹⁶Iburu sɔrɔn-san bi-sawa ani san nanɛ ma, a ya Fara[14] sɔrɔn.

¹⁷Fara sɔrɔn kɔma, Iburu ya dan donu sɔrɔn a nyɔgɔn san kɛmɛ nani ani san bi-sawa (430) kɔrɔ, a nara to fagala.

¹⁸Fara sɔrɔn-san bi-sawɛ ma, a ya Riyu sɔrɔn.

¹⁹Riyu sɔrɔn kɔma, Fara ya dan donu sɔrɔn a nyɔgɔn san kɛmɛ fila ani san kɔnɔntɔ (209) kɔrɔ, a nara to fagala.

²⁰Riyu sɔrɔn-san bi-sawa ani san filɛ ma, a ya Sɛrugi sɔrɔn.

²¹Sɛrugi sɔrɔn kɔma, Riyu ya dan donu sɔrɔn a nyɔgɔn san kɛmɛ fila ani san wɔrɔnfila (207) kɔrɔ, a nara to fagala.

²²Sɛrugi sɔrɔn-san bi-sawɛ ma, a ya Nehori sɔrɔn.

²³Nehori sɔrɔn kɔma, Sɛrugi ya dan donu sɔrɔn a nyɔgɔn san kɛmɛ fila (200) kɔrɔ, a nara to fagala.

²⁴Nehori sɔrɔn-san mogan-ni-kɔnɔntɛ ma, a ya Tɛra sɔrɔn.

²⁵Tɛra sɔrɔn kɔma, Nehori ya dan donu sɔrɔn a nyɔgɔn san kɛmɛ ani san tan-ni-kɔnɔntɔ (119) kɔrɔ, a nara to fagala.

²⁶Tɛra wo sɔrɔn-san bi-wɔrɔnfilɛ ma, a ya den-kei mɔgɔ sawa sɔrɔn, Burama wo, Nehori wo, anubɛ Hɛran.

²⁷Tɛra bɔnsɔn le kɛnu na. Tɛra ya Burama anubɛ Nehori anubɛ Hɛran sɔrɔn. Hɛran wo ya Lɔti sɔrɔn.

²⁸Hɛran fagara a fa Tɛra yala Yuri soe burɔ min bi Babilɔn nyamanɛ rɔ a sɔrɔnta kan min.

²⁹Hɛran ya dunmusi fila sɔrɔn, Milaka anubɛ Isika. Hɛran kɔrɔ Nehori wo ya Milaka furu, Hɛranna dunmusi, kɔni. Burama fanan ya dunmusi do furu min tɔgɛ Sirayi.

³⁰Kɔnɔ Sirayi, gbandɛ le nun. Den sa a bolo.

³¹Tɛra ya ala dan Burama anubɛ wola musi Sirayi bi. A ya a mamanɛ, Hɛranna dan Lɔti fanan bi. Anu wulita Yuri soe burɔ Babilɔn nyamanɛ rɔ ka Kenan nyamanita-kilɛ bira. Kɔnɔ anu kera Hɛran soe burɔ tumɛ min, anu ya anu daga makɛ nyɔ.

³²Tɛra siyi-tele bɛnta san kɛmɛ fila ani san loli (205) ma, a nara to fagala Hɛran soe burɔ.