Read Kuranko Ko-Dabirɛnu 19 Bible Online

Ko-Dabirɛnu 19 - Kuranko bible

Ko-Dabirɛnu 19

¹Melika filɛ wonu ke Sɔdɔm soe burɔ wurala-tumɛ le la, anu ya Lɔti siginɛ taran Sɔdɔm tarɛ dɛ la.[22] Lɔti ya anu yen tumɛ min, a ya a lasɔ ka anu nabɛn. A ya a laburun a ma dugi ma anu kɔrɔ.

²Lɔti ya a fɔ anu ye ko, “N tiginu, n bi wo madiyala. Wo yandi, wo ni yiya n barɛ bi. Wo si wo kian maku ka ki nyɔ. Wo wa wo lasɔ sɔgɔma, ni wo ye tala kan min, wo si ta nyɔ.” Anu ko, “Ade, ma si ki luyi tɛma barɛ rɔ.”

³Kɔnɔ Lɔti kirita anu ma kati! Woletɔ anu yiyara a kuma. Lɔti ya anu gbiliya ka anu fanda biredi anubɛ dɔn-fen-hakikɛ la.

⁴Kɔnɔ yanni anu ni anu sa, kemini-mɛsɛ anubɛ kɛmɔgɛnu nara kurɔn mini bɔn wo ma.

⁵ Anu ya Lɔti kele ka a fɔ a ye ko, “Kei minnu nara i warɛ wurɛ kɛ la, wonu bi mi? Anu nabɔ ma ye alako ma ni ma sa anu fɛ.”

⁶Lɔti bɔmatoe mɔgɛnu bara, a ya dɛ latogon melika wonu ma.

⁷A ya a fɔ nyama wo ye ko, “Nba, n bɔnu, wo yandi, n bi wo madiyala, wo kana ko-yogoma-su kɛ ma nna sundan kɛnu na.

⁸Yanni wo ni wo ma sundan kɛnu na, wo ma nna dunmusu filɛ kɛnu yen bɔn la? Wonu ma kei-ko lɔn fɔlɔn. N si wonu nabɔ wo ye. Ni min di wo ye, wo si wo ma wonu na. Kɔnɔ wo kana ko-wo-ko ma sundan kɛnu na kamasɔrɔn nna sundan le kɛnu na.”

⁹Nyama wonu nyɛɛra ale Lɔti ma ko, “I masɛgi. Ile sundan, i bɔ ma yarɔ, ile min bara i nyɛrɛ ma kiti-tɛgɛlɛ la ma tɛma kaka!” Anu ya a fɔ a ma tun ko, “Ni i kan le wo la, ma si ile tɔrɔ ka tenbi ila sundan kɛnu na.” Anu ya Lɔti latuntun kankan ma alako anu ni dɛ keri ka don.

¹⁰Kɔnɔ melika wonu ya anu bole labɔ kankan fɛ sɛɛ, ka Lɔti sagan ka a ladon bɔn la. Anu ya dɛ latogon.

¹¹ Melika wonu ya fan do latenbi nyama wonu yakɔrɔ bilili! Anu fiyonyara kelenna! Dɛ tora-a-rɔ anu ma.

¹²Melika wonu ya a fɔ Lɔti ye ko, “Ila dan wo, i biran wo, i na-kelen-nyɔgɛnu wo, ni wo donu bi soe kɛ burɔ yan, a fɔ anu ye ko anu ni anu bɔ yan

¹³kamasɔrɔn ma si Sɔdɔm soe kɛ halaki bawo anuna ko-yogomɛ ara wara Mari yala. Mari ya ma sɔ alako ma ni na soe kɛ lato dogbe!”

¹⁴Lɔti bɔra ka ta a fɔ a birannu ye minnu bara ala dunmusu filɛ mabira nun ko, “Wo ni wo bɔ yan soe kɛ burɔ kamasɔrɔn Mari si soe kɛ halaki.” Anu ya a lɔn nun ko a ye yokaliyɛ le la.

¹⁵Banda-ka-dɛ ma, melika wonu ya a fɔ Lɔti ye ko, “I lasɔ, wobɛ ila musi anubɛ ila dunmusu filɛ. Wo ni wo bɔ yan alako wo kana halaki mɔgɛ kɛnuna hakɛla ko la.”

¹⁶ Kɔnɔ Lɔti ya a kun kimaya min kɛ, woletɔ melika wonu ya anubɛ ala denbayɛnu bolo bira ka anu nabɔ soe kɔma bawo Mari ara kinikini anu ma.

¹⁷Melika wonu tara anu nabɔ soe kɔma tumɛ min, melika doi ya a fɔ anu ye ko, “Wo ni wo buri yɛlɛla kɔnkɛ kuma alako wo ni kisi. Kɔnɔ wo kana wo yɛ lasɛgi wo kɔma ka mɛ lɛɛ rɔ.”

¹⁸Lɔti ya a fɔ anu ye ko, “I yandi n tiginu, wo kana ma lata wula-yan la.

¹⁹Hala a dan, i wara n niyi lakisi nya min, wo fɔlɔn ya ko bɔ. Kɔnɔ n ti ke n burila ha kɔnkɛ wo kuma. Kɔnkɛ wo fɛ-yan. Yanni n ni ke nyɔ tumɛ min, n ti halaki, wa?”

²⁰A ko, “I ma so-nɛ do yen pan tɔ, ado wo ma fɛ-yan n na. N si ke n burila le ka ta nyɔ. N tiginu, wo si sɔn n ni ta so-nɛ wo rɔ alako n ni kisi?”

²¹Melika wo kelen ya a fɔ ale Lɔti ye ko, “N si a ma iko i wara a fɔ n ye nya min. N ti so-ni kelan wo halaki.

²²I lakaliya tala ka i dogon nyɔ kamasɔrɔn n ti Sɔdɔm kɛ tinya fɔ i wa ke nyɔ.” Bawo Lɔti ya a fɔ soe wo ma, a ko, “So-nɛ,” woletɔ tɔgɛ wo tora so-nɛ wo kuma ko, “Sowa,” min kɔrɛ ko a dɔgɔ.

²³Lɔti kera so-nɛ wo ma sun-tele-wati ma,

²⁴ Mari ya munku-gbɛ anubɛ tɛ layigi iko bandɛ ka bɔ san-kole rɔ Sɔdɔm anubɛ Kɔmɔra kuma.

²⁵A ya soe wonubɛ a mɔgɛnu anubɛ anuna ki-fannu anubɛ anuna ba-lɛɛ damasi mintan gburr!

²⁶ Kɔnɔ Lɔtila musi ya a yɛ lasɛgi a kɔma kilɛ la. Woletɔ a yɛlɛmanta kɔgɔ-gbu-gbilɔn-bɛ la.

²⁷Wo wulun sɔgɔma subaga, Iburayima ya a latiriya tala a sɔla kan tinɛ wo rɔ anubɛ Mari kumara anu nyɔgɔn na kan min nun.

²⁸A ya a yɛ lata Sɔdɔm anubɛ Kɔmɔra wara la anubɛ anuna ba-lɛɛ. A ya ta-sisi yen yɛlɛla iko sulubondɔn[23] ta-sisi.

²⁹Soe minnu bi ba-lɛɛ rɔ Lɔti ye kan min, Alla ye wonu halakila tumɛ min, a ya a miri Iburayima ma ka Lɔti kisi.

³⁰Lɔti anubɛ ala dunmusu filɛ wonu bɔra so-nɛ wo rɔ ka ta anu sigi anu dan na faran la kɔnkɛ kuma kamasɔrɔn anu kilannɛ ka sigi so-nɛ wo rɔ.

³¹Ala dunmusu fɔlɔtɛ ya a fɔ a dɔgɛ ye ko, “Ma fa ara kɔrɔya. Ma furu-nyɔgɔn sa nyɔ tun ma si dan sɔrɔn minnu ma.

³²Ma si gbɛɛ di ma fa ma ha a ni a bira woletɔ ma si a masɔrɔn ka ki a wara. A ni a sa ma fɛ alako ma ni dan sɔrɔn a ma.”

³³Anu ya anu fa lamin gbɛɛ la suyi wo rɔ kosɛbɛ! Lɔtila dunmusu fɔlɔtɛ donta ka a rasagan a fa fɛ. Lɔti ya a sa a fɛ kɔnɔ a ma dunmusi wo sa-tuma lɔn, a ma a lasɔ-tuma lɔn.

³⁴Wo banda kɛ, ala den fɔlɔtɛ ya a fɔ a dɔgɔ-musi ye ko, “N ya n tasagan n fa fɛ kunu suyi rɔ. A ya a sa n fɛ. Ma ni ma fa lamin gbɛɛ la bi suyi rɔ fanan. Ile fanan ni don ka i rasagan a fɛ alako ma fa sugi la kana to.”

³⁵Dunmusu-dɔgɔmɛ ya a ma a fa la iko a kɔrɔ ya a ma nya min suyi wo fanan tɔ. Lɔti ya a sa wo fanan fɛ kɔnɔ a ma a sa-tuma lɔn, a ma a lasɔ-tuma lɔn.

³⁶Lɔtila dunmusu filɛ bɛɛsi ya buyi bi a ma wo nya le.

³⁷Ala den fɔlɔtɛ ya den-kei sɔrɔn. A ya a tɔgɔ sa Mohabu.[24] Mohabu mɔgɛnu benba le wo la.

³⁸A dɔgɔmɛ fanan ya den-kei sɔrɔn. A ya a tɔgɔ sa Bɛn-Ami.[25] Amonnu benba le wo la.