Read Kuranko Ko-Dabirɛnu 26 Bible Online

Ko-Dabirɛnu 26 - Kuranko bible

Ko-Dabirɛnu 26

¹Iko kɔnkɔ-fitinɛ nara nyamanɛ wo rɔ Iburayimata wati rɔ nya min, kɔnkɔ-fitinɛ nara wo nya na le Isiyaka fananta wati rɔ. Isiyaka tara Filisitinuna Mansa Abimɛlɛki warɛ min siginɛ Kirari soe burɔ.

²Kɔnɔ Mari bɔra gbɛ rɔ Isiyaka ye ka a fɔ a ye ko, “I kana ta Iyipiti nyamanɛ rɔ. N si kan tinɛ do yira i la nyamanɛ kɛ rɔ, i si ta i sigi kan min.

³ To nyamanɛ kɛ rɔ bɛ min na fɔlɔn. N si to i fɛ ka nta duwɛ layigi i kuma. N si nyamanɛ kɛ bɛɛsi di wobɛ i bɔnsɔn ma. N si i bɔnsɔn lasiyaya iko san-kole lolenu ka nyamanɛ kɛ di anu ma. Duninya-mɔgɛ bɛɛ si duwɛ sɔrɔn i bɔnsɔn kɛnu fɛ kamasɔrɔn Iburayima ya n kuman-kan kɛnu namɔɛn ka nta tɔnnu bira. N ya lanyiri minnu kiri mabɛ i fa Iburayima tɛma nun, n si wonu ma.”

⁶Isiyaka ya a sigi Kirari soe burɔ.

⁷ Nyɔ-keinu ba a manyinika ala musila ko la tumɛ min, a si a fɔ anu ye le ko a tirisan-musi le. A ti sisi a fɔla ko ala musi le alako nyɔ-keinu kana a faga Rebɛkala ko la kamasɔrɔn Rebɛka kin.

⁸A mɛra nyɔ tumɛ min, Filisitinuna mansɛ ya a yɛ labɔ wundan la ka Isiyaka yen tolonna ala musi Rebɛka la.

⁹Mansɛ wo ya Isiyaka kele, a ko, “Yaga, ila musi le. Nfenna i ya a fɔ n ye ko i tirisan-musi le?” Isiyaka ya a fɔ a ye ko, “Kamasɔrɔn n ya a lɔn nun ko anu bi n fagala le ala ko la, woletɔ n ya a fɔ ko n tirisan-musi le.”

¹⁰Mansɛ wo ko, “I wara nfen ma ma la kɛ la? Ni nna keminɛ do tara a sa ila musi kɛ fɛ nun, i si i tɛgɛ sigi yon ma? Ni ma ya tɔgɔ-tinya fenfen sɔrɔn nun, i gbɛ le wo la.”

¹¹Woletɔ mansɛ wo ya ala mɔgɛ bɛɛsi makawandi ko, “Ni mɔgɔ-wo-mɔgɔ ya a bole tugu kei kɛ anubɛ ala musi la, wo tigi si faga serr!”

¹²San wo la, Isiyaka ya sɛnɛ sa nyɔ. A ya sugi min nyɔgɔn fui, Marita duwɛ yigira a kuma. A ya wo nyɔgɔn kɛmɛ sɔrɔn.

¹³Ale Isiyaka mara nɔnfulu-tigi-wɛ la. A wara-koe tora tala yarɔ.

¹⁴Wɔli-kɛlɛnu anubɛ kolo-fen siyaman taranta a bolo. Wo ya a ma, Filisitinu ya a makeliya

¹⁵ha a fala wɔli-kɛlɛnu ya kɔlɔn minnu sin wo tuma a ye a kɛndɛ la, anu ya wonu gberen.

¹⁶Mansɛ ya a fɔ Isiyaka ye ko, “I bɔ mala nyamanɛ rɔ kamasɔrɔn i sɛnbɛ kolo matɛ ko pirr.”

¹⁷Wo le ya a ma, Isiyaka bɔra Kirari soe burɔ ka ta a daga makɛ lɛɛ rɔ min bi soe wo dafɛ.

¹⁸A fa Iburayima ya kɔlɔn sin nyɔ nun kɔnɔ a faganɛ, Filisitinu ya kɔlɔn wonu gberen. Isiyaka nara sigi nyɔ tumɛ min, a ya wonu tabɔ tun. A ya anu tɔgɛ sa iko a fa ya anu tɔgɛ sa nya min nun.

¹⁹Isiyakata wɔli-kɛlɛnu ya kɔlɔn do sin Kirari lɛɛ rɔ tumɛ min, anu ya yi-hakikɛ taran nyɔ.

²⁰Saga-fɛ-biralɛ minnu bi Kirari soe burɔ anubɛ Isiyakata saga-fɛ-biralɛ wonu kɛlɛta kɔlɔn wo kuma. Saga-fɛ-biralɛ minnu bi Kirari soe burɔ, wonu ya a fɔ ko anutɛ le kɔlɔn wo la. Woletɔ Isiyaka ya kɔlɔn wo tɔgɔ sa “Sɔsɔli kɔlɔn” kamasɔrɔn anu kɛlɛta a kuma.

²¹Woletɔ Isiyakata wɔli-kɛlɛnu ya kɔlɔn wo to anu bolo. A ya ata wɔli-kɛlɛnu nata ka kɔlɔn-gbɛrɛ sin a ye tun. Nba, anu sɔsɔra wo fanan kuma. Woletɔ Isiyaka ya wo tɔgɔ sa “Kɛlɛ-nyɔgɔnya-kɔlɔn.”[36]

²²Isiyaka ya nyɔ fanan boloka ka ta kɔlɔn-gbɛrɛ sin. Anu ma sɔsɔ kɔlɔn wo kuma tun. Woletɔ a ya kɔlɔn wo tɔgɔ sa “Lafɛrɛya-kɔlɔn.”[37] A ya a fɔ ko, “Kamasɔrɔn Mari ara lafɛrɛ-tina-bɛrɛ di ma ma, kaka ma si sabati nyamanɛ kɛ rɔ.”

²³Wo kɔma, Isiyaka bɔra nyɔ ka ta Biri-Siba soe burɔ.

²⁴A ke nyɔ wo suyi rɔ, Mari bɔra a ye gbɛ rɔ. A ko, “I fa Iburayimata Alla le nde la. I kana kilan kamasɔrɔn n bi i fɛ. N si nta duwɛ layigi i kuma ka i bɔnsɔn lasiyaya nta wɔli-kɛlɛ Iburayimala ko la.”

²⁵Woletɔ a ya saraka-bɔ-tinɛ sɔ nyɔ ka Mari madiya. A ya ala fani-bɔn sɔ nyɔ. Ata wɔli-kɛlɛnu ya kɔlɔn sin nyɔ fanan.

²⁶ Filisitinuna Mansa Abimɛlɛki anubɛ ala mɔgɔ-ba Ahusati anubɛ ala kɛlɛ-kurugbɛ Fikoli bɔra Kirari soe burɔ ka ta Isiyaka taran Biri-Siba soe burɔ.

²⁷Isiyaka ya a fɔ anu ye ko, “Wo ara n gben wo fɛ koninteyɛ la. Nfen bara a to gbɛ, wo ara na n bara yan tɔ?”

²⁸Anu ya a fɔ ko, “Ma ara a lɔn serr, ko Mari ye i fɛ. Woletɔ ma ni lanyiri kiri ma nyɔgɔn tɛma ko

²⁹wo kana ko-yogoma ma ma la bawo male fanan ma ko-yogoma ma wo la. Male mara mɔgɔ-nyimɛ la wo ye. Ma ya a ma, wo bɔra ma warɛ yisi-kimɛ rɔ. Kaka, Marita duwɛ ye wo kuma.”

³⁰Woletɔ Isiyaka ya ladiyɛ ladan anu ye. Anu ya fen-dɔn-kɛ ka anu min.

³¹Sɔgɔma subaga, anu ya anu nasɔ ka lanyiri kiri ka anu nyɔgɔn nasɛ. Isiyaka ya anu kɔndɔn. Anu farata diyanayɛ rɔ.

³²Wo tele nyɛrɛ rɔ, Isiyakata wɔli-kɛlɛnu nara a fɔ a ye ko, “Ma ara yi yen mala kɔlon-sinnɛ rɔ.”

³³A ya kɔlɔn wo tɔgɔ sa Biri-Siba. Wo kɔrɛ le, “Lanyiri-Kɔlɔn.” Woletɔ ha bi, soe wo tɔgɛ le Biri-Siba.

³⁴Isiyakala dan Isɔ sɔrɔn ya san bi-nani bɔ tumɛ min, a ya Hɛtinuna dunmusu fila furu, Birila dunmusi min tɔgɛ Yuditi anubɛ Helonna dunmusi min tɔgɛ Basemati.

³⁵Dunmusi wonu ya anu benba Isiyaka anubɛ anu mama Rebɛka niyi ragbɛrɛn anu ma kati!