Read Kuranko Ko-Dabirɛnu 27 Bible Online

Ko-Dabirɛnu 27 - Kuranko bible

Ko-Dabirɛnu 27

¹Isiyaka kɔrɔyara tumɛ min, a yɛ mabirara. A ya ala fɛrɛn-kinamɛ kele, Isɔ kɔni. A ya a fɔ a ye ko, “Nna den.” Isɔ ko, “O-o.”

²Isiyaka ya a fɔ ko, “I ya a lɔn ko n bara kɔrɔya kɔbɔkɔbɔ! N bi fagala tuma-wo-tuma, n ma wo lɔn

³kɔnɔ yanni n ni faga, ila kalabɛn bi ka soge do faga n ye firɛ rɔ. I ni a te iko a di n ye nya min ka na a la n ma. N ba ban a dɔnna, n si nna duwa-laban kɛ i ye.”

⁵Isiyaka ye kumala ala dan Isɔ ye tumɛ min, wo ya a taran, Rebɛka tole masɔnɛ anu na. Wo kɔma, Isɔ tara firɛ rɔ sogo faga tinɛ a fa ye.

⁶Rebɛka ya a fɔ ala dan Yakoba ye ko, “N ya i fa kuman-kan lamɔɛn, a ye a fɔla i kɔrɔ Isɔ ye

⁷ko yanni a ni faga, i kɔrɔ Isɔ ni na soge la a ye. A wa ban wo dɔnna, a ni ata duwa laban kɛ a ye Mari yala.

⁸Woletɔ nna den, n kuman-kan bira kaka iko n bi nala a fɔla i ye nya min.

⁹Ta baa-wɔrɛ rɔ kaka ka baa-bulun-hakika fila bira. I ni na wonu na ka anu don n bolo. N ni wonu te a kila-bɛrɛbɛrɛ fɛ iko a di i fa ye nya min.

¹⁰I ni ta a la i fa ye alako a ni a dɔn. Woletɔ a wa ban wo dɔnna, a si ata duwa-laban wo kɛ ile ye yanni a ni faga.”

¹¹Yakoba ya a fɔ a na ye ko, “Kɔnɔ n kɔrɔ-kei Isɔ, a fɛrɛma-siyi siya a ma. Mɔgɔ-manunkunɛ le nde la.

¹²Tumado, n fa si a bole tugu n na kɔrɛ. A si a miri ko n bi yanfanteyɛ le la. N si dankɛ lana n nyɛrɛ kuma. N ti ata duwɛ sɔrɔn.”

¹³A na ya a fɔ a ye ko, “Nna den, i fala dankɛ wo ni to nde kuma. Alako dɔrɔn i ni ndeta kumɛ wo bira tun! Ta baa wonu bi. I ni na anu na n ma.”

¹⁴Woletɔ a tara ka baa filɛ wonu bira ka na anu don a na bolo. A na ya kɛkɛ wonu te iko a di ala kei ye nya min.

¹⁵Rebɛka ya Isɔta duruku-hakikɛ bi a kɔma kilɛ la ka wo bila Yakoba kan na.

¹⁶A ya baa-bulan wonu gbole bi ka wonu kiri Yakoba bole anubɛ a kan ma.

¹⁷A na ya kɛkɛ-hakikɛ wonu fila biredi bi ka wonu don ala den Yakoba bolo.

¹⁸Woletɔ Yakoba tara wonu na a fa wara. A donta a fa kuma bɔn la, a ko, “N fa.” A fa ya a labira. A fa ko, “Nna dan yon bi kɛ la?”

¹⁹Yakoba ya a fɔ a fa ye ko, “Isɔ le nde la, ila den-kei-sarɛ, kɔni. I ya a fɔ n ye nya min, n bara a ma wo nya na le. N fa, i lakɔɛnma. I ni i mayigi ka kɛkɛ do dɔn alako i ni duwa n ye.”

²⁰Kɔnɔ a fa ya a fɔ a ye ko, “Nna den, i wara soge kɛ faga kama kaka?” Ala dan wo ko, “Ita Mari Alla, wo le ya hɛrɛ di n ma.” Isiyaka ya a fɔ Yakoba ye ko,

²¹“Nna den, i gbɛrɛn n ma. N ni n bole tugu i la. N ni i lakɔrɔsi ni nna dan Isɔ le ile la wa fɔsɔkɔrɛ, wo ma ile la.”

²²Yakoba ya a madon a fa Isiyaka la. A fa ya a bole tugu a la, a ko, “I kuman-kan manɛ iko Yakobatɛ kɔnɔ i bole wo mani de iko Isɔtɛ.”

²³A ma anu dan-nafarɛ lɔn bawo a bolo-kalama-siyi ye a ma iko Isɔtɛ. Yanni a ni duwa a ye,

²⁴a ya a manyinika tun ko, “I lara a la ko Isɔ le ile la?” Yakoba ko, “Nde le, yɔ!”

²⁵Isiyaka ko, “I nara mɛya-fan min na, a madon n na. N ni a dɔn ka nta duwa-laban kɛ i ye.” Yakoba ya mɛya-fan anubɛ nɔnbɔ-gbɔ-yi madon a la. A ya a dɔn.

²⁶A fa Isiyaka ya a fɔ a ye ko, “Nna den, i madon n na ka n sunbu.”

²⁷ Yakoba ya a madon a fa la ka a sunbu. A na ya a kɔrɔla duruki min don a kan na, a fa ya wo sumɛ lamɔɛn ka a fɔ a ye ko, “Nna dan sumɛ manɛ iko Mari wa mɔgɔ-harayɛgɛ fulen donsoya-firɛ rɔ.” A fa duwara ale Yakoba ye ko,

²⁸“I wa ila sɛnɛ sa kan-bo-kan, alamɛ duri tora yigila a kuma ka a sabati. Alamɛ Alla ya ila fui-fannu anubɛ ila nɔnbɔ-gbɔɛnu nasabati.

²⁹ Alamɛ bɔnsɔn siyaman wɔlita i ye. Mɔgɛnu ni anu famayigi i kɔrɔ. Alamɛ i mara kun-tigi la i na-kelen-nyɔgɛnu kuma. Anu ni anu famayigi i kɔrɔ. Ni min ya i danka, wo si dankɛ sɔrɔn. Ni min duwara i ye, wo si duwɛ sɔrɔn.”

³⁰Isiyaka banta duwala Yakoba ye tumɛ min, Yakoba bɔra a fa kuma. A ma mɛ, a kɔrɔ Isɔ nara ka bɔ donsoya-firɛ rɔ.

³¹Ale fanan ya kɛkɛ te a kin na ka ta a la a fa ye. A ya a fɔ a fa ye ko, “N fa, i lakɔɛnma. I ni i mayigi. N bara na ka bɔ firɛ rɔ. I ni kɛkɛ do dɔn ka duwa n ye.”

³²A fa Isiyaka ya a fɔ a ye ko, “Yon bi kɛ la?” Isɔ ko, “Ila den-kei fɔlɔtɛ le nde la, Isɔ, kɔni.”

³³A fa yɛrɛyɛrɛnta, a ko, “Mɔgɔ yon ya soge nyini ka na a la n ye? N bara ban wota soge dɔnna, ado n bara ban duwala wo ye fanan. Ila duwɛ wo ara to wo bolo habadan!”

³⁴Isɔ ya a fa kuman-kan kɛ lamɔɛn tumɛ min, a dira biribiri! A ya a fɔ a fa ye ko, “E, n fa, i yandi, duwa nde fanan ye.”

³⁵A fa ko, “I dɔgɛ ara na n yanfa. A ara ta ila duwɛ la a bolo pon!”

³⁶ Isɔ ya a fɔ ko, “Ado nfan, n yanfa fila nyɔgɛ le kɛ la gbɛ! Ka a fɔ Yakoba, n ma tɛrɛna wo la bawo a tɔgɛ wo kɔrɛ le, ‘Yanfante.’ A ara nta sɔ tinɛ bi yanfɛ la. A ara nna duwɛ fanan bi yanfɛ la.” A ya a fɔ a fa ye tun ko, “I ma duwɛ do lamara nde ye, wa?”

³⁷A fa ya a fɔ a ye ko, “N bara ban a mala kun-tigi la ile kuma. N bara a na-kelen-nyɔgɛnu ma wɔli-kɛlɛnu na ale kɔrɔ. N bara duwa ala fui-fan anubɛ ala nɔnbɔ-gbɔɛnu ye. Nna den, fenfen sa n bolo tun n si min di i ma.”

³⁸ Isɔ tora a fa madiyala ko, “N fa, i yandi, ni duwa kelen bi i bolo, wo di n ma. E, n fa, duwa nde fanan ye.” Isɔ dira.

³⁹ A fa ya a fɔ a ye ko, “I ti dugu-hakikɛ sɔrɔn i si i sigi kan min. Duri-wo duri ti yigi ila sɛnɛnu tɔ min si anu sabati.

⁴⁰ Ni i ma kɛlɛ kɛ, i ti fen sɔrɔn kɔnɔ hali wo, fɔ i wa wɔli i dɔgɛ kɔrɔ. Kɔnɔ a wa a lagbɛlɛya i kuma tumɛ min, i si bɔ ata sɛnbɛ kɔrɔ.”

⁴¹Isɔ ya Yakobala koninteyɛ sigi a burɔ ka a tɛgɛ duwɛ wola ko ma a fa ya min kɛ a dɔgɛ ye. Isɔ ya a miri a ma a yisi rɔ ka a fɔ mɔgɛnu ya la ko, “N fa sa mɛla sayɛ la tun. Ni n fa sara, fɔ n ba n dɔgɛ kɛ faga.”

⁴²Rebɛka ya kumɛ wo lamɔɛn tumɛ min, a ya kilayɛ lata Yakoba ma ka a fɔ a ye ko, “A sɔgɛ ye i kɔrɔ Isɔ la ka a tayili sara i la ka i faga.

⁴³Woletɔ nna den, i tole masɔ n na ka n kuman-kan bira. I lasɔ ka i buri ka ta n tirisan-kei Leban warɛ Hɛran soe burɔ.

⁴⁴I ni to i berin fɛ ha i kɔrɔ yisi ni kimɛ,

⁴⁵a la ni nyina. A la wa nyina tumɛ min, n si i kele wo rɔ. I ni na alako n kana foo wo mɔgɔ filɛ la tele kelen kɔrɔ.”

⁴⁶Rebɛka ya a fɔ Isiyaka ye ko, “Isɔ ya Hɛti dunmusi minnu furu nun, n bara bandan wonu kɔrɔ. Ni Yakoba fanan ya Hɛti musi do furu min si ma iko kɛnu, wo si a ma, n niyi ra ni gbɛrɛn n ma n siyi-tele-bɛɛ kɔrɔ.”