Read Kuranko Ko-Dabirɛnu 33 Bible Online

Ko-Dabirɛnu 33 - Kuranko bible

Ko-Dabirɛnu 33

¹Yakoba ya Isɔ anubɛ kei mɔgɔ kɛmɛ nani yen nala tumɛ min, a ya ala dan bɛɛsi lata anu nanu ma, Liya anubɛ Resɛli anubɛ anuna solo-dununa filɛ, kɔni.

²A ya solo-dununɛnu anubɛ anuna dannu fɔlɔn sɔ anu yarɔ. A ya Liya anubɛ ala dannu tugu wonu na. A ya ala bara-musi Resɛli anubɛ ala den Yusufu to a laban la.

³Anu gbɛrɛn anu nyɔgɔn ma, Yakoba tenbira ala denbayɛ yarɔ. A tara a kunyɛ madula a kɔrɔ Isɔ kɔrɔ iko wɔrɔnfila ka a kɔndɔn.

⁴Kɔnɔ Isɔ burimatoe fanan tara ka a labɛn gbuturu diyanayɛ rɔ. Anu mɔgɔ filɛ dira biribiri!

⁵Isɔ ya a yɛ lata a dɔgɛ kɔma kilɛ la ka musu-nyama anubɛ den-siyamɛ kɛnu mafɛlɛn, a ko, “Yakoba, yonna mɔgɛ ye kɛ damasi la?” Yakoba ko, “Alla le ya ko-nyimɛ kɛ n ye ka dan kɛ dama di nde, ila wɔli-kɛlɛ ma.”

⁶Solo-dununɛnu anubɛ anuna dannu fɔlɔn nara ka anu nyɛnkin Isɔ kɔrɔ ka a kɔndɔn.

⁷Wo kɔma, Liya anubɛ ala dannu fanan nara ka anu nyɛnkin Isɔ kɔrɔ ka a kɔndɔn. A laban, Yusufu anubɛ a na Resɛli nara ka anu nyɛnkin Isɔ kɔrɔ ka a kɔndɔn.

⁸Isɔ ya Yakoba manyinika ko, “N bɛnta kolo-fen-siyamɛ minnu na, i ya wonu nata i yarɔ nfenna?” Yakoba ya a yabi ko, “N bara wonu nata alako n ni yisi-kimɛ sɔrɔn ile, n tigi bolo.”

⁹Isɔ ko, “N dɔgɛ, i yisi-kimɛ. Min bi n bolo, wo ara n hɛnɛ. Ita nɔnfuli ni to i bolo, yɔ!”

¹⁰Yakoba ko, “Ade, n bi i madiyala, ni n bara-koe ara i hɛnɛ, i yandi, i sanbɛnu bira n bolo wo rɔ. Ka tonyɛ fɔ, n bara i yakɔrɔ-nyimɛ yen n bara-la iko Alla kolonkɛ.

¹¹I yandi, n bi i madiyala, n nara sanbɛ minnu na i ye, i ni wonu bira n bolo. Alla ara hɛrɛ di n ma ka n makoe bɛɛ nyinya.” A tora Isɔ madiyala. A laban, Isɔ ya a sanbɛ wonu bira.

¹²Isɔ ya a fɔ a ye ko, “Ma wuli le gbɛ! Nde si sɔ i yarɔ.”

¹³Kɔnɔ Yakoba ya a fɔ a ye ko, “I ya a lɔn ko nta dennɛnu kian ra ma gbɛlɛ tagama tinɛ. Kolo-fen-denbɛnu bi n bolo fanan. Ni mɔgɔ telenta anu nagbengbenna gbɛn, kolo-fen-dan wo dama si faga.

¹⁴Min fisa, i ni ta ma yarɔ. N si to anu nagbengbenna doni-doninyɛ ma. N si i taran Idɔm nyamanɛ rɔ.”

¹⁵Isɔ ya a fɔ a ye ko, “N si nna wɔli-kɛlɛ donu to i fɛ.” Kɔnɔ Yakoba ko, “N kɔrɔ, hali i ma mɔgɔ to yan. Alako tun, ni i ya i yakɔrɔ-nyimɛ yira n na, wo di n ye.”

¹⁶Woletɔ Isɔ sɛgira Idɔm nyamanɛ rɔ.

¹⁷Kɔnɔ Yakoba tara a sigi fɔ kan tinɛ do min tɔgɛ Sukɔti ka bɔn sɔ a nyɛrɛ ye nyɔ. A ya lelenu[43] burun ala kolo-fannu ye nyɔ, woletɔ kan tinɛ wo tɔgɛ sara ko Sukɔti bawo wo kɔrɛ le, “Lele.”

¹⁸Yakoba bɔra Mɛsopotemiya nyamanɛ rɔ tumɛ min, a yisi-kimanɛ tara ha Sɛkɛm soe burɔ Kenan nyamanɛ rɔ.

¹⁹ Kei min tɔgɛ sara Sɛkɛm soe kɛ kuma, wo fa tɔgɛ le Hemori. Yakoba ya dugu-kundi san Hemori sɔrɛ ma wodi-gbɛ-gbu kɛmɛ la. A ya a daga makɛ nyɔ.

²⁰Yakoba ya saraka-mintan-tinɛ sɔ nyɔ ka a tɔgɔ sa “Isirɛlata Alla Sɛnbɛ-Bɛɛ-Tigi Le.”