Read Kuranko Ko-Dabirɛnu 37 Bible Online

Ko-Dabirɛnu 37 - Kuranko bible

Ko-Dabirɛnu 37

¹Yakoba sigira Kenan nyamanɛ rɔ a fa sigira kan min nun.

²Yakoba anubɛ ala dannu wara-koe le kɛ la. Yusufu-sɔrɔn ya san tan-ni-wɔrɔnfila bɔ tumɛ min, a tora tala a kɔrɔnu fɛ minnu bi anu fala kolo-fannu kandanna. Biliha anubɛ Silipa, a fala musinuna solo-dununɛnu denu bi wonu nanu na nun. Yusufu taranta a kɔrɔnuna damayɛ kɛla anu fa ye.

³Yakoba ya Yusufu keni ka tenbi ala dan bɛɛ la kamasɔrɔn ala kɛmɔgɔya-dan le. Yakoba ya duruki bon a kila-bɛrɛbɛrɛ fɛ ka duruku-bonni-hakikɛ wo don ala den Yusufu kan na.

⁴A na-kelen-nyɔgɛnu ya a yen tumɛ min ko anu fa ara ale keni ka tenbi anu dama la, anu ya a makeliya ka a magboya. Anu ma anu ya-nyimɛ yira a la tun.

⁵Lunyɛ do, Yusufu kiyora. A ya ala kiyo wo rakaran a na-kelen-nyɔgɛnu ye ko, “Wo ni wo tole masɔ nna kiyo la a kin na!” A ko, “N kiyora le bi suyi rɔ. Ma ye fui-fen-tɛgɛnɛ lakirila sɛnɛ rɔ. N ya a yen ko nta fui-fen-nakiri ara a lasɔ ka a latelen tede! Wota fui-fen-nakirinɛnu nara kinki nta fui-fen-nakiri wo la. Anu madunɛ ntɛ kɔrɔ.” A na-kelen-nyɔgɛnu ya a fɔ a ye ko, “Mansaya-sɔgɛ le ile la male kuma, wa?” Ka a tɛgɛ ala kiyo wo ma, a sɔgɔ labɔra a na-kelen-nyɔgɛnu na lass, ka tenbi a fɔlɔtɛ la.

⁹Yusufu ya kiyo-dogbɛrɛ sa tun. A ya wo rakaran a na-kelen-nyɔgɛnu ye ko, “N kiyora le bi-suyi rɔ. Tele wo, karɛ wo, anubɛ lolo tan-ni-kelen, wonu bara anu nyɛnkin n kɔrɔ.”

¹⁰A ya kiyo wo rakaran a fa anubɛ a na-kelen-nyɔgɛnu ye. A fa ya a makuma ka a fɔ a ye ko, “Ila kiyo kɛ kɔrɛ ye kama? Ile mirinɛ ko nde wo, i na wo, anubɛ i na-kelen-nyɔgɛnu si na ka ma nyɛnkin i kɔrɔ, wa?”

¹¹ A na-kelen-nyɔgɛnu ya a kɔn kɔnɔ a fa ya a hɛnkili to ala kiyo wo ko.

¹²Lunyɛ do, Yusufu kɔrɔnu tara anu fala kolo-fannu de-nyini tinɛ Sɛkɛm soe dafɛ.

¹³Yakoba ya a fɔ Yusufu ye ko, “I kɔrɔnu bi kolo-fannu de-nyinina Sɛkɛm dafɛ. A sɔgɛ ye n na, n ni i sɔ anu bara.” Yusufu ya a fɔ a fa ye ko, “Awa, ale le wo la. N si ta.”

¹⁴Woletɔ a fa ya a fɔ a ye ko, “Ta i kɔrɔnu anubɛ kolo-fannu mafɛlɛn. Ni a yogoma sa nyɔ, i ni na wo fɔ n ye.” Woletɔ Yusufu bɔra Hiburɔn lɛɛ rɔ ka ta a kɔrɔnu nyini ha Sɛkɛm soe dafɛ.

¹⁵Kei do ya a taran tagama-tagamana wulɛ rɔ nyɔ. Wo ya a manyinika ko, “Ile ye nfen nyinina yan?”

¹⁶Yusufu ko, “N bi n kɔrɔnu denu nyini tinɛ. Ni i ya a lɔn anu bi kolo-fannu fɛ kan min, i ni nyɔ yira n na.”

¹⁷Kei wo ko, “Anu bi bɔla yan, n ya a lamɔɛn anu na ko anu bi tala Dotan soe wara la.” Woletɔ Yusufu tara a kɔrɔnu fɛ. A ya anu taran Dotan.

¹⁸A kɔrɔnu ya Yusufu namatoe yen wula-yan la tumɛ min, anu ya yanfɛ rabɛn a ma a faga-koe la.

¹⁹Anu ya a fɔ anu nyɔgɔn ye ko, “Wo ma ale kiyo-salɛ yen nala?

²⁰Wo na, ma ni a faga ka a lakɛ kɔlon-tagbalanɛ do rɔ. Ma ni a fɔ ko sogo-yogomɛ do ara a faga. Ma si a lɔn wo rɔ ni ko si bɔ ata kiyo wonu tɔ.”

²¹Kɔnɔ anu kɔrɔ sarɛ Rubɛn, wo suira wo ma tumɛ min, a ya a raya ka Yusufu niyi lakisi. A ko, “Ma kana a niyi bɔ.”

²²Rubɛn ya a fɔ anu ye ko, “Wo kana ko-wo-ko ma a la. Wo ni a lakɛ kɔlɔn rɔ wulɛ rɔ yan.” Rubɛn ya kɛ fɔ alako a si fɛrɛ sɔrɔn nya min ka Yusufu bɔ anu bolo ka a lakisi ka a lasɛgi a fa ma.

²³Yusufu kera a kɔrɔnu ma tumɛ min, a kɔrɔnu ya ala duruku-bonni-hakikɛ bɔ a kan na.

²⁴Anu ya Yusufu bi ka a lakɛ kɔlɔn rɔ yi sa min tɔ.

²⁵Anu bi fen dɔnla tumɛ min, Sumanyila kegeyɛ minnu siginɛ Midiyan nyamanɛ rɔ, anu ya wonu yen nala wula-yan la ka bɔ Kaliyadi nyamanɛ rɔ. Anu nara kɛnɛ anubɛ se-tuli anubɛ isɛnti dunɛnu na. Wonu kirinɛ anuna nyomɛnu kɔ tɛma. Anu bi tala Iyipiti nyamanɛ rɔ.

²⁶Yuda ya a fɔ a na-kelen-nyɔgɛnu ye ko, “Ni ma ya ma dɔgɔ kei faga ka a yele dogon, ma si nfen tɔnɛ sɔrɔn wo rɔ?

²⁷Wo na, ma ni a mayira Sumanyila kegeyɛnu ma. Ma kana ko-yogoma ma a la kamasɔrɔn ma na-kelen-nyɔgɔ-bɛrɛbɛrɛ le ale la.” Anu ya a kuman-kan wo bira.

²⁸ Midiyan yila wonu tenbimatoe, Yusufu kɔrɔnu ya a layɛlɛ ka a labɔ kɔlɔn rɔ. Anu ya a mayira Sumanyila kegeyɛ wonu ma wodi-gbɛ-gbu mogan na. Wonu tara Yusufu la anu bolo Iyipiti nyamanɛ rɔ.

²⁹Anu kɔrɔ sarɛ Rubɛn nara kɔlɔn dɛ la anu kɔma tumɛ min, a ma Yusufu taran kɔlɔn wo rɔ tun. Ala duruki min bi a kan na, a ya wo rafara mɔninyɛ bolo.

³⁰A tara a dɔgɛnu bara ka anu manyinika ko, “N ma Yusufu taran kɔlɔn rɔ. Nde si nfen ma kɛ rɔ?”

³¹Yusufu kɔrɔnu ya baa-dan faga ka ala duruku-hakikɛ wo bi ka wo sa baa-dan yele wo rɔ.

³²Anu tara duruki wo la anu fa wara ka a fɔ a ye ko, “Ma ara duruki do yen. A mafɛlɛn ni ila den Yusufula duruki le.”

³³Yakoba ya duruki wo yen a yɛ la tumɛ min, a ya a lɔn yati, ko ala den Yusufula duruku-hakikɛ le. A ko, “Nna den-bɛrɛbɛrɛla duruki le kɛ la, yɔ! Sogo-yogomɛ le wara a rafarafara kɛ la ka a dɔn saa!”

³⁴Yakoba ya ala duruki rafara a kan na mɔninyɛ bolo ka kasa-kurɛ don a kan na. A mɛra ala dan dila.

³⁵Yakobala dannu ya anu taya ka anu fa madiya kɔnɔ a ma sɔn a rade-koe ma. A ko, “Nde si to nna dan kɛ dila ha n ni a taran lakira.” A tora dila ala dan Yusufula ko la wo nya le.

³⁶Midiyan yila wonu kera Iyipiti tumɛ min, anu ya Yusufu mayira Iyipiti mansa-makandanna-kun-tigi wo ma min tɔgɛ Pɔtifa.