Read Kuranko Ko-Dabirɛnu 39 Bible Online

Ko-Dabirɛnu 39 - Kuranko bible

Ko-Dabirɛnu 39

¹Yilanu tara Yusufu la Iyipiti nyamanɛ rɔ tumɛ min, anu ya a mayira Iyipiti mansa-makandanna-kun-tigi ma min tɔgɛ Pɔtifa.

² Mari tora Yusufu fɛ ka ata duwɛ layigi a kuma. A wara-koe tora tala yarɔ. A tora sigini a tigi Pɔtifa warɛ bɔn la Iyipiti nyamanɛ rɔ.

³A tigi wo ya a yen ko Mari ye Yusufu fɛ koe bɛɛ rɔ bawo Yusufu wa a bole don fenfen tɔ, Mari si wo lasabati.

⁴Yusufu wara-koe ya Pɔtifa hɛnɛ woletɔ a ya a ma ala wɔli-kɛla-kun-tigi la. Pɔtifa ya a bolo-fan bɛɛsi latenbi a ma fanan.

⁵Pɔtifa banta Yusufu mala kun-tigi la ala wɔli-kɛlɛ anubɛ a bolo-fannu kun na tumɛ min, Marita duwɛ tora Pɔtifa kuma ka a bolo-fan bɛɛsi lasabati Yusufula ko la. Pɔtifa bolo ma taran fenfen na, fɔ a ye min dɔnna dɔrɔn! Yusufu so-gban anubɛ a yakɔrɛ kin.

⁷Wati do, Pɔtifala musi yɛ bɔra Yusufu la. A ya a fɔ Yusufu ye ko, “Na, ma ni ma sa.”

⁸Kɔnɔ a ya a ban a tigila musi bolo ka a fɔ a ye ko, “Ila kei ara a bolo-fan bɛɛsi latenbi n ma. Ala ko-wo-ko sa a bolo-fannu bara-koe rɔ. A ara wo lanayɛ di n ma.

⁹Ila kei ara a ma, ma ra ara kɛnya bɔn kɛ la. A ma fenfen namara a nyɛrɛ ye, fɔ ile. Nde si nfen ko-yogomɛ ma n tigi wola musi la? Ni nde ya wo ma, n bara bila Alla la.”

¹⁰Hali wo, tele-wo-tele, musi wo tora Yusufu madiyala sɔn-yogoya kɛ-koe la. Kɔnɔ Yusufu ma sɔn a bolo mumɛ!

¹¹Lunyɛ do, Yusufu tanɛ bɔn la ata wɔli-kɛ-tinɛ, a ma wɔli-kɛlɛ fenfen taran nyɔ.

¹²Pɔtifala musi wo ya ala duruki bira a ma warata! A ko, “Na, i sa n fɛ.” Yusufu ya ala duruki to a bole la. A burimatoe bɔra a kuma bɔn la.

¹³Musi ya a yen min kɛ, a ara ala duruki to a bole la, a burimatoe ara bɔ,

¹⁴a worondora ka wɔli-kɛlɛnu takele. Wɔli-kɛlɛ wonu nanɛ, a ya a fɔ wonu ye ko, “Wo ni duruki kɛ mafɛlɛn. Nna kei ara na Hiburu keminɛ min na kɛ la, wo le wara na n nafɛya tinɛ kɛ la. A ara don n kuma. A ko a ni digin nde ma. Woletɔ n fanan gbele-gbelenta ha wo ara na.

¹⁵N gbele-gbelenta wati min, a burimatoe bɔra ka ala duruki to n bole la.”

¹⁶Musi wo ya Yusufula duruki wo lamara ala kei Pɔtifa yarɔ.

¹⁷Ala kei nanɛ, koe min bɛɛ tenbira anubɛ Yusufu tɛma, a ya wo dantɛgɛlɛ sa ala kei ye ko, “I nara Hiburu yɔɔn-keminɛ min na, wo le donta n kuma ka n nafɛya.

¹⁸Kɔnɔ n gbele-gbelenta tumɛ min, a ya ala duruki to n dafɛ. A burimatoe bɔra luyi ma.”

¹⁹Yusufu tigi Pɔtifa ya kumɛ wo lamɔɛn ala musi la tumɛ min, a yisi bɔra dɔgɔma-ma-de!

²⁰Pɔtifa ya Yusufu bi ka a ladon yele la, mansɛta yelela-mɔgɛnu bi kan min.

²¹ Kɔnɔ hali Yusufu ye yele wo la, Mari ye a fɛ. Mari ya a ma, yele-kandanna-kun-tigi min bi nyɔ, a diyara wo ye koikoi!

²²Wɔlɛ min bɛɛsi ye kɛla yele la, anubɛ yelela-mɔgɛnu, yele-kandanna-kun-tigi wo ya Yusufu ma wonu kunyɛ la.

²³Kun-tigi wo ma hɔn fenfen na tun. A ya yelela-koe bɛɛsi to Yusufu bolo kamasɔrɔn a ara a lɔn ko Mari ye Yusufu fɛ. Yusufu ya min bɛɛ kɛ, Mari ya wo lasabati.