Read Kuranko Ko-Dabirɛnu 40 Bible Online

Ko-Dabirɛnu 40 - Kuranko bible

Ko-Dabirɛnu 40

¹Wati tenbinɛ, Iyipiti mansɛla baan-bɔlɛ anubɛ ala biredi-mintannɛ, wonu ya mansɛla tɔn do tinya.

²Mansɛ wo diminyara mɔgɔ-ba filɛ wonu ma.

³A ya anu nadon yele la Pɔtifala bɔn dafɛ Yusufu ye kun-tigiyɛ la kan min.

⁴Pɔtifa wo ya Yusufu ma wɔli-kɛlɛ la mɔgɔ filɛ wonu ye. Anu ya wati-siyaman bɔ yele la.

⁵Lunyɛ do, mɔgɔ filɛ wonu kiyora suyi rɔ. Anuna kiyonu, kelen ma anu na. Anuna kiyonu kɔrɛ, kelen ma anu na.

⁶Sɔgɔma, Yusufu donta anu kuma, a ya anu taran, anu yisi magboyanɛ.

⁷A ya anu manyinika ko, “Wo yisi tinyanɛ nfen na?”

⁸Anu ya a fɔ a ye ko, “Ma ara kiyo sa su-tenbinɛ kɔnɔ mɔgɔ sa yan min si mala kiyo wonu kɔrɛ fɔ ma ye.” Yusufu ya a fɔ anu ye ko, “Alla le si kiyo kɔrɔ-takaran-hɛnkili di mɔgɛ ma. Wo kiyora nfen na?”

⁹Mansɛla baan-bɔlɛ ya ata kiyo rakaran Yusufu ye ko, “N kiyora nɔnbɔ-kuri le la bi,

¹⁰a bolon sawa sɔnɛ a ma. A bolɔn wonu matiinɛ. Anu fereta. Anu gbɔra nɔnbɔ monɛnu na.

¹¹Mansɛla yi-lafɛ ye n bolo. N ya nɔnbɔ-gbɔɛ wo do keri ka a burun mansɛla yi-lafɛ wo rɔ ka wo don mansɛ bolo.”

¹²Yusufu ya a fɔ a ye ko, “Ila kiyo kɔrɛ le kɛ la. Bolon sawɛ wo, tele sawa le wo la.

¹³Tele sawa wa tenbi, mansɛ si ila sɔ tinɛ lasɛgi i ma. I si baan bɔ mansɛ ye tun iko i duruta a mala nya min nun.

¹⁴I wa bɔ yele kɛ la tumɛ min, i yandi, i ni i hɛnkili to n ko ka ko-nyimɛ kɛ n ye. I ni n masigima-koe fɔ mansɛ ye alako nde, Yusufu ni bɔ yele kɛ la yan.

¹⁵Anu ya n kankan de ka bɔ n barɛ Hiburu nyamanɛ rɔ. Hali yan fanan, n ma ko-wo-ko ma mɔgɔ la. Anu bara n bira ka n nadon yele la pinpi-bɔn kɛ la.”

¹⁶Mansɛla biredi-mintannɛ ya a yen tumɛ min ko a ta-nyɔgɛ wota kiyo kɔrɛ kin, ale fanan ya a fɔ Yusufu ye ko, “Nde fanan ya kiyo sa. N ya biredinu yen digi[51] sawa rɔ. Wonu siginɛ n kuma.

¹⁷Digi-laban min siginɛ digi doinu kuma, mansɛla biredinu bi digi wo rɔ. N ya a yen, konanu bi wonu dɔnna digi wo rɔ n kuma.”

¹⁸Yusufu ya wo fananta kiyo kɔrɛ rakaran a ye ko, “Digi sawɛ wo, tele sawa le wo la.

¹⁹Ile ye tele sawa pe le bɔla. Wo kɔma, mansɛ si i kunyɛ tɛgɛ a dagɛ rɔ ka i don kɔlɔma ma. Konanu si i tɛgɛ kon!”

²⁰Tele sawa wo kɔma, mansɛ wo ya a sɔrɔn-tele-ladiyɛ kɛ ala mɔgɔ-banu ye. A ya ala baan-bɔlɛ anubɛ ala biredi-mintannɛ labɔ yele la ka anu sɔ ala mɔgɔ-banu yakɔrɔ.

²¹A ya ala baan-bɔlɛ lasɛgi a gbɛ rɔ tun wɔli-kɛ-tinɛ.

²²Kɔnɔ a ya ala biredi-mintannɛ wo don kɔlɔma ma iko Yusufu ya anuta kiyonu kɔrɛ fɔ anu ye nya min nun.

²³Hali wo, mansɛla baan-bɔlɛ wo nyinara Yusufu ko. A ma a hɛnkili lamiri a ma.