Read Kuranko Ko-Dabirɛnu 42 Bible Online

Ko-Dabirɛnu 42 - Kuranko bible

Ko-Dabirɛnu 42

¹Yusufu fa Yakoba ya a lɔn tumɛ min ko dɔn-fan ye Iyipiti nyamanɛ rɔ, a ya a fɔ ala dannu ye ko, “Nfenna wo yɛ sɔnɛ wo nyɔgɔn na? Wo sa dɔn-fan nyinina!

² N bara a lamɔɛn ko dɔn-fan ye Iyipiti nyamanɛ rɔ. Wo ta dɔn-fen san tinɛ nyɔ alako ma kana na faga kɔnkɛ bolo.”

³Yusufu-kɔrɔ-keminɛ mɔgɔ tan tara Iyipiti nyamanɛ rɔ dɔn-fen san tinɛ.

⁴Kɔnɔ Yakoba ma Yusufu na-kelen-dɔgɛ Bɛnyamɛ bila a kɔrɔnu fɛ kamasɔrɔn a kilannɛ a kuma alako ko-yogomɛ kana na ma a la.

⁵Mɔgɔ-siyaman bɔra nyamani-gbɛrɛnu tɔ ka ta dɔn-fen san tinɛ, ado Yakobala dannu taranta anu tɛma kamasɔrɔn kɔnkɔ-fitinɛ ye anu barɛ Kenan nyamanɛ rɔ.

⁶Wo wati rɔ, Yusufu le kandayɛ la Iyipiti nyamanɛ rɔ. Ale le ye dɔn-fan mayirala mɔgɛnu ma. Yusufu-kɔrɔnu tara ka anu naburun a ma dugi ma a kɔrɔ.

⁷Yusufu ya a kɔrɔnu yen tumɛ min, a ya a lɔn tiriya ko a kɔrɔnu denu. A ya a nyɛrɛ ma iko a ma anu lɔn defan! A ya anu tagbɛrɛn ka a fɔ anu ye ko, “Wo bɔra mi?” Anu ko, “Male bɔra Kenan nyamanɛ le tɔ ka na dɔn-fen san tinɛ yan tɔ.”

⁸Yusufu ya a kɔrɔnu lɔn kɔnɔ anu ma ale lɔn.

⁹ Yusufu ya kiyo minnu sa anuna ko la, a ya a hɛnkili lamiri wonu ma. A ya a fɔ a kɔrɔnu ye ko, “Wole ma na dɔn-fen san tina. Wole nara ko-lakɔrɔsi tinɛ le. Wole nara alako wo ni mala nyamanɛ da masa tinɛ lɔn.”

¹⁰Anu ya a fɔ a ye ko, “Ade, ma tigi, ila yɔɔn le male la. Ma nara dɔn-fen san tinɛ le dɔrɔn!

¹¹Kei-kelen-dan le male la. Mɔgɔ-latelennɛ le male la. Nyamani-lakɔrɔsila ma ma la feu!”

¹²Yusufu ya a fɔ anu ye ko, “Wo ye foninyɛ le la. Wole nara le ka mala nyamanɛ kɛ da masa tinɛ lɔn, yɔ!”

¹³Anu ko, “Ma siginɛ Kenan nyamanɛ le tɔ. Ma den mɔgɔ tan-ni-filɛ le nun. Mɔgɔ kelen bara faga ma rɔ. Ma ara ma dɔgɛ to ma fa fɛ nyɔ.”

¹⁴Yusufu ya a fɔ anu ye ko, “Iko n bara a fɔ nya min, wo nara ko-lakɔrɔsi-tinɛ le, yɔ!

¹⁵N bi wo kɔrɔbɔla ka le. Wo ni la a la serr, wole ti bɔ yan tɔ muk, fɔ wo kelen ba ta wo dɔgɛ wo bi ka na a la. Wo le si to biralɛ rɔ yan tɔ ha n ni ban wo wara-koe fɛsɛfɛsɛla. Ni wo ma na wo dɔgɛ la, tamayi mumɛ sa a rɔ, n bara a lɔn wo rɔ ko wole nara ko lakɔrɔsi tinɛ le.”

¹⁷A ya anu dama sa yele la. Tele fila anu bi nyɔ.

¹⁸A tele sawa nyɔgɛ ma, Yusufu ya a fɔ anu ye ko, “Nde kilannɛ Alla la min kɛ, wo ni ko kelen ma min si a ma, wo ni kisi.

¹⁹Ni mɔgɔ-telennɛ le wole la, wo ni mɔgɔ kelen to yele la yan. A toenu ni ta dɔn-fannu na anuna denbayɛnu ye kɔnkɛ ara minnu mɔlɔkɔn.

²⁰Wo ni na wo dɔgɛ la n ma. Ni wo ya wo ma, wo si a yira n na ko tonya-fɔlɛ le wole la. N ti wo faga wo rɔ.” Anu sɔnta wo ma.

²¹Anu ya a fɔ anu nyɔgɔn ye ko, “Ni i ya a yen ma ye tɔrɔla ka, ma ya ko-yogomɛ min ma ma dɔgɛ Yusufu la, wo le dankɛ bilanɛ ma fɛ kɛ la. Ma ya a yakɔrɔ-mamɔnɛ yen tumɛ min wo tumɛ a ye ma madiyala ko ma kana a faga. Kɔnɔ ma ma ma tole masɔ a la woletɔ ma ye tɔrɔyɛ kɛnu sɔrɔnna.”

²² Anu kɔrɔ sarɛ Rubɛn ko, “N ma a fɔ wo ye nun ko ma kana ko-yogoma ma a la? Kɔnɔ wo ma wo tole masɔ n na. Kaka, male fanan bi nala matɛ sɔrɔnna ka a tɛgɛ ma dɔgɔ-kei wo faga-koe ma.”

²³Hali kan-natenbilɛ ye anu tɛma nun kɔnɔ anu ma a lɔn ko anu bi min fɔla, Yusufu ara wonu namɔɛn.

²⁴Yusufu ya a bɔ anu dafɛ. A tara di a dan na. A ban a radela di-kɛ ma, a nara anu bara tun. A ya a kɔrɔ Simiyɔn bɔ anu yala. A ya a fɔ ala kɛlɛ-dan donu ye ko, “Wo ni a kiri anu yala.”

²⁵Yusufu ya a fɔ ala wɔli-kɛlɛnu ye ko anu ni a kɔrɔnuna bɔrɛnu nafa dɔn-fannu na. Anu ni anuna wodinu sa anuna dɔn-fannu kuma anuna bɔrɛnu tɔ ka dɔn-fan do di anu ma fanan anu si min ma anu kila-fandɛ la. Wonu ya a ma iko Yusufu ya a fɔ anu ye nya min.

²⁶A kɔrɔ wonu ya anuna dɔn-fen-dunɛ wonu kiri anuna sofɛlɛnu kɔ tɛma. Anu ya kilɛ bira ka ta.

²⁷Anu kira kan min, mɔgɔ kelen ya ala bɔrɛ lafulen. A sɔgɛ ye a la ka ala sofɛlɛ de-nyini. Wo ya ala bɔrɛ lafulen tumɛ min, a ya ata wodi yen dɔn-fan kuma ala bɔrɛ wo rɔ.

²⁸A ya a fɔ a na-kelen-nyɔgɛnu ye ko, “Anu ya nta wodi lasɛgi nna bɔrɛ rɔ. Wo na a mafɛlɛn ba.” Anu yisi gbalata ka kilan. Anu ko, “Alla ara nfen ma ma la kɛ la?”

²⁹Anu nara anu fa Yakoba wara Kenan nyamanɛ rɔ tumɛ min, koe min bɛɛsi mara anu na anuna tagama wo rɔ, anu ya anu dantɛgɛ anu fa Yakoba ye.

³⁰Anu ya a fɔ a ye ko, “Ma ya mansɛla kandɛ min taran Iyipiti, wo kumara ma ma dɔgɔma-ma-de! A ko ma tara nyamanɛ wo lakɔrɔsi tinɛ le.

³¹Ma ya a fɔ a ye ko, ‘Mɔgɔ-latelennɛ le male la. Ma ma ta nyamanɛ wo lakɔrɔsi tina.’

³²Ma ya a fɔ a ye ko, ‘Ma den mɔgɔ tan-ni-filɛ le nun.’ Ma ya a fɔ ko, ‘Kei-kelen-dan le male la.’ Ma ya a fɔ a ye tun ko, ‘Mɔgɔ kelen bara faga ma rɔ. Ma dɔgɛ tora ma fa fɛ Kenan nyamanɛ rɔ.’ ”

³³Anu ya a fɔ anu fa ye ko, “Mansɛla kandɛ wo ya a fɔ ma ye ko a si a lɔn kɛ rɔ, ni mɔgɔ-latelennɛ le male la. A ko ma ni ma na-kelen-nyɔgɛ to a bolo nyɔ. A ko male ni na mala dɔn-fannu na mala denbayɛnu ye.

³⁴A ko ma ya ma dɔgɛ min to i dafɛ yan, ma ni ta wo la. A ko ni ma tara ma dɔgɛ la ma bolo, a si a lɔn wo rɔ ko ko-lakɔrɔsila ma male la, mɔgɔ-latelennɛ le male la. Wo kɔma, a ko ni ma ya wo ma, a si ma na-kelen-nyɔgɛ Simiyɔn boloka. A ko ma si feri-kɛ nyamanɛ wo rɔ.”

³⁵Anu ya anuna bɔrɛnu nafulen anu fa yakɔrɔ tumɛ min, anu dama ya anuta wodi taran anuna bɔrɛnu tɔ. Anu ya wodi wo yen min kɛ, anu dama kilanta.

³⁶Anu fa ya a fɔ anu ye ko, “A sɔgɛ ye wole la, n ni foo nna dan dama la, wa? Yusufu sa tun, Simiyɔn sa tun. A sɔgɛ ye wole la, wo ni ta Bɛnyamɛ fanan na? Tɔrɔyɛ kɛ damasi ara sigi nde le la.”

³⁷Rubɛn ya a fɔ a fa ye ko, “Ni n ma sɛgi a la i wara yan tɔ tun, i ni nna den filɛ faga. A don nde bolo. Nde si na a la, yɔ!”

³⁸Kɔnɔ Yakoba ko, “Ndeta dan kɛ, wo ti ta wo fɛ mumɛ! A na ya anu mɔgɔ fila pe le sɔrɔn. A kɔrɔ ara sa. A kelen pe le tonɛ gbɛ! Ni ko mara a la wola tagama rɔ, wo si a ma, n kɔrɔyanɛ ni faga yisi-tinya bolo.”