Read Kuranko Ko-Dabirɛnu 44 Bible Online

Ko-Dabirɛnu 44 - Kuranko bible

Ko-Dabirɛnu 44

¹Yusufu ya a fɔ ala wɔli-kɛlɛ-kun-tigi ye ko, “Kei kɛnuna bɔrɛnu takɛ dɔn-fan la tun iko anuna sofɛlɛnu si minnu nɔ ka anu damata wodi sa dɔn-fan wonu kuma anuna bɔrɛnu tɔ.

²I ni nta wodi-gbɛ-yi-lafɛ fanan sa anu dɔgɛta dɔn-fan kuma bɔrɛ rɔ.” Wɔli-kɛlɛ wo ya a ma iko Yusufu ya a fɔ a ye nya min.

³Wo banda kɛ subaga, kei wonu ban anuna dunɛnu kirila anuna sofɛlɛnu kɔ tɛma, anu ya anu masara.

⁴Anu tara. Yanni anu ni yanfa, Yusufu ya a fɔ ala wɔli-kɛlɛ-kun-tigi wo ye ko, “Ta kei wonu sagaranna. I wa ke anu tɔ tumɛ min, i ni anu manyinika ko nfenna anu bara wɔli-nyimɛ yɛlɛman wɔli-yogomɛ la?

⁵I ni anu manyinika ko nfenna anu ya i tigila yi-lafɛ kankan ka ta a la anu bolo? A min-kɛ-yi-lafɛ le wo la. Ata nya-nyini-fan le wo la fanan. I ni a fɔ anu ye ko anu bara ko-yogoma-belebele le ma wo la.”

⁶Wɔli-kɛlɛ-kunyɛ wo ya anu sagaran tumɛ min ka anu taran kilɛ la, a ya Yusufula kumɛ wo bɛɛ rakaran anu ye.

⁷Yusufu na-kelen-nyɔgɛ wonu ya a yabi ko, “Ma tigi ye kumɛ kɛ fɔla nfenna? Ma ti ko su kɛnu ma muk!

⁸Hali ma tɛrɛnara wodi minnu na mala bɔrɛnu tɔ ma warɛ Kenan nyamanɛ rɔ, ma nara le wonu na. Ma si na wodi anubɛ sɛnɛ kankan kama wo rɔ?

⁹Mala bɔrɛnu mafɛlɛn. Ni i ya a yen min bolo, wo ni wo tigi faga. Male si ma ila yɔɔn la.”

¹⁰Wɔli-kunyɛ ko, “N bara sɔn wo ma. Kɔnɔ a ye yenna mɔgɔ kelan min bolo wo kurun tɔ, wo si ma nna yɔɔn la. A toenu na si fɛrɛ.”

¹¹Tiriyante wo rɔ, anu ya anuna dunɛnu sigi dugi ma ka anu nafulen.

¹²Anu ya yi-lafɛ wo nyinɛ dabira anu kɔrɔ sarɛta dunɛ rɔ ha anu tara a laban anu dɔgɛ wota dunɛ ma. Yaga, anu ya yi-lafɛ wo yen Bɛnyamɛta bɔrɛ rɔ.

¹³Bɛnyamɛ kɔrɔnu ya anuna durukinu tafara anu kan na yisi-tinya bolo. Anu ya anuna dunɛ wonu bi tun ka anu kiri anuna sofɛlɛnu kɔ tɛma. Anu sɛgira anu kɔma Iyipiti nyamanɛ rɔ.

¹⁴Yuda anubɛ a na-kelen-nyɔgɛnu tara Yusufu wara bɔn la tumɛ min, anu ya anu sa dugi ma Yusufu kɔrɔ.

¹⁵Yusufu ya a fɔ anu ye ko, “Wo ara nfen ma kɛ la? Wo ma a lɔn nun ko wo mɔgɛ le nde la min si nya-nyini-kɛ ka ko sufa kɛnu gba bɔ?”

¹⁶Yuda ya a fɔ tun ko, “Kuma sa male bolo tun ma si min fɔ. Male si ke kɛ masɔsɔla kama ka a fɔ ko male gba ma. Alla ara ma sɔn-yogomɛ labɔ gbɛ rɔ. Yi-lafɛ yenta ma dɔgɛ min bolo nun, wo dɔrɔn sa mala yɔɔn la. Ma dama le mala yɔɔn la gbɛ!”

¹⁷Kɔnɔ Yusufu ko, “Ka a fɔ wo dama ni ma yɔɔn la, alamɛ nde tankara wo ma. Nta yi-lafɛ yenta min bolo, wo le dɔrɔn si ma nta yɔɔn la. Wole lafɛrɛnɛ ni ta wo fa warɛ.”

¹⁸Yuda ya a madon Yusufu la. A ya a fɔ a ye ko, “E, n tigi, i si sɔn i wɔlɔ matɔlɔla n na? N ni kuma? Hali i manɛ iko mansɛ, i kana i fonde magboya n na.

¹⁹N tigi, ile le ma ma manyinika ma fa anubɛ ma dɔgɛ kɛla ko ma nun, ba?

²⁰Ma ya a fɔ i ye ko ma fa-kɛmɔgɛ ye nyɔ. Ma ya a fɔ tun ko ma dɔgɔ-kei ye nyɔ, ma fala kɛmɔgɔ-dan, kɔni. Ma ya a fɔ i ye fanan ko ma dɔgɛ, wo kɔrɔ-keminɛ ara faga. Ale kelen pe le tonɛ gbɛ a na buyi rɔ, ado a di ma fa ye kati!

²¹“Ma tigi, ile nyɛrɛ-nyɛrɛ le ya a fɔ ma ye ko ma ni na ma dɔgɛ la ma bolo, i ni a yen i yɛ la.

²²Male ya a fɔ i ye ko ni ma dɔgɛ wo bɔra ma fa dafɛ, ma fa ti si-yan sɔrɔn.

²³I ya a fɔ ma ye tun ko ma kana na ma dɔgɛ kɔma. I ko ni ma nara ma dɔgɛ wo kɔma, ma kana i kolonkɛ yen.

²⁴Ma ke ma fa ma, ma ya ma dantɛgɛ a ye.

²⁵“Wo kɔma, ma fa ya a fɔ ma ye tun ko ma ni na dɔn-fen san tinɛ.

²⁶Ma ya a fɔ a ye ko ma ti ke nala i warɛ yan tɔ tun, ni ma ma na ma dɔgɛ wo la ma bolo.

²⁷Ma fa ya a fɔ ma ye ko ala musi Resɛli ya den-kei fila pe le sɔrɔn a ye.

²⁸A ara bɔnɔ mɔgɔ kelen tɔ. A ko a manɛ iko sogo-yogomɛ le ya a rafarafara bawo a ma a yen wo kɔma tun.

²⁹A ko ni ma ya ma dɔgɛ kɛ fanan bɔ a fɛ, ko ni na ma a la ma bolo yan, wo hɛnkili lamiri si a ma, ma fa-kɔrɔyanɛ ni faga yisi-tinya bolo.

³⁰“Nba, n tigi, ni n tara n fa wara n dɔgɛ kɛ kɔma, ni a ma ma mɔgɔ filɛ yen, a kɔrɔyanɛ si faga yisi-tinya bolo. Ma fa niyi nɔrɔnɛ ma dɔgɛ kɛ ma le. Ni a ma a yen ma fɛ, a si a nyɛrɛ faga hɛnkili-lamiri bolo bawo a ara kɔrɔya kɔbɔkɔbɔ!

³²Min sanɛ wo kuma, n bara n nyɛrɛ niyi sigi tulumɛ la n fa ma n dɔgɛ kɛ niyila ko la. N ya a fɔ ko ni n ma sɛgi ala den Bɛnyamɛ la a ma tun, wo nanparan si to nde kuma wo rɔ n siyi-tele-bɛɛ rɔ.

³³“I yandi n tigi, yanni n dɔgɛ kɛ ni to yɔɔnyɛ la yan, a ma, nde ni to n dɔgɛ kɛ gbɛ rɔ alako n dɔgɛ ni ta a kɔrɔnu fɛ a fa wara.

³⁴N si sɛgi kama n fa wara ni n dɔgɛ kɛ sa n fɛ? Nde ti ke tɔrɔya sufa wonu yenna sigila n fa la.”