Read Kuranko Ko-Dabirɛnu 45 Bible Online

Ko-Dabirɛnu 45 - Kuranko bible

Ko-Dabirɛnu 45

¹ Nba, Yuda ban kɛ fɔla, Yusufu ya a yen ko a ti ke a birala-a-rɔ tun ala wɔli-kɛlɛnu yala. A nyɛɛra ala wɔli-kɛlɛ wonu ma ko, “Wo ni wo bɔ yan.” Yusufu ye a nyɛrɛ rakala a kɔrɔnu na tumɛ min, mɔgɔ-gbɛrɛkɛ sa anu kurun tɔ fɔ anu gbansan!

²Yusufu dira ha Iyipiti kɛ minnu bi bɔn wola foolɛ rɔ, wonu ya a di-kɛ-kan wo lamɔɛn. Anu tora a fɔla ha mansɛla mɔgɛnu ya a lamɔɛn.

³Yusufu ya a fɔ a na-kelen-nyɔgɛnu ye ko, “Wo na-kelen-nyɔgɛ Yusufu le nde la. Ha bi, n fa ye a kɛndɛ la?” A na-kelen-nyɔgɛnu ma ke a yabila kamasɔrɔn anu kun ma ara tɛgɛ. Anu ma a lɔn nun ni Yusufu le.

⁴Yusufu ya a fɔ anu ye ko, “Wo yandi, wo ni wo gbɛrɛn n ma.” Anu ya anu madon a la. A ko, “Yusufu le nde la wo ya min mayira Iyipiti talɛnu ma.

⁵Wo kana wo nyɛrɛ ta-a-la hali ka kilan bawo wo ya n mayira kamasɔrɔn wole gba ma. Alla le ya n nana wo yarɔ yan alako n ni wo niyi lakisi.

⁶Kɔnkɔ-fitinɛ wo san fila nyɔgɛ le kɛ la mala nyamanɛ kɛ rɔ. A ara to a nyɔgɔn san loli tun kɔnkɔ-fitinɛ ye mala nyamanɛ kɛ rɔ. Sɛnɛ ti sa gbɛlɛyɛ bolo. Dɔn-fen-mumɛ ti taran mɔgɛ si min tɛgɛ.

⁷Alla le ya n nana wo yarɔ yan ka n ma wobɛ wola denbayɛnu anubɛ wo kegeyɛnu kisilɛ la.

⁸“Woletɔ wole ma n nana yan fɔ Alla. A ya n ma kun-tigi la Iyipiti nyamanɛ bɛɛ kun na ka n ma Iyipiti mansɛla kandɛ la. Iyipiti mumɛ bɛɛ ye nde le bolo.

⁹ “Wo ni wo lakaliya tala n fa wara. Wo ni a fɔ a ye ko Alla ara ala den Yusufu ma kun-tigi-belebele la Iyipiti nyamanɛ rɔ. A ni na n bara. A kana mɛ.

¹⁰Kɔnɔ a tenbi nala, a ni na ala denbayɛnu na anubɛ ala kolo-fannu anubɛ a bolo-fan mumɛ bɛɛsi ka na anu sigi n dafɛ Kosɛn sigisɔn rɔ yan.

¹¹Ni wo ye yan, n si ke le wo dɛnbɛna bawo kɔnkɔ-fitinɛ kɛ ara to gbɛ san loli. A ma di n ye wo ni tɔrɔya.”

¹²Wo kɔma, ale Yusufu ko, “Wo ni n mafɛlɛn bɛrɛbɛrɛkɛ katarala ile Bɛnyamɛ ma. Wo na-kelen-nyɔgɛ Yusufu, wo le nde la.

¹³Wo ni ta wo dantɛgɛ ma fa ye n bi fanka min tɔ yan Iyipiti nyamanɛ kɛ rɔ. Wo ara koe min bɛɛsi rayen yan tɔ, wo ni ta wo bɛɛsi rakaran a ye. Wo ni a fɔ a ye ko a ni a lakaliya nala.”

¹⁴Yusufu anubɛ a dɔgɔ Bɛnyamɛ ya anu nyɔgɔn bira gbuturu! Anu donta diyi-kɛ rɔ.

¹⁵Yusufu ye diyi-kɛ wo kun na, a ye a na-kelen-nyɔgɛnu kɔndɔnna ka anu sunbu. Wo kɔma, sikɛ bɔra a kɔrɔ wonu tɔ. Wo le ya a ma, anu kera kumala Yusufu la.

¹⁶Mɔgɛnu ya kɛ sura-kumɛ lamɔɛn mansɛ wola bɔn la ko Yusufu na-kelen-nyɔgɛnu bara na, wo diyara mansɛ anubɛ ala mɔgɔ-banu ye.

¹⁷Mansɛ ya a fɔ Yusufu ye ko, “A fɔ i na-kelen-nyɔgɛnu ye ko anu ni anuna dunɛnu takɛ ka anu kiri anuna sofɛlɛnu kɔ tɛma

¹⁸ka ta wo fa-kɛmɔgɔ-bi-tinɛ Kenan nyamanɛ rɔ. Anu ni na anuna denbayɛnu na yan tɔ. N si dugu-hakikɛ di anu ma yan anu si anu sigi kan min. N si a ma, anu ni dɔn-fen siyaman sɔrɔn.

¹⁹“Anu ni kirindi donu bi alako anu si ta anu fa anubɛ anuna dennɛnu anubɛ anuna musinu bi nya min ka na anu na yan tɔ.

²⁰Ni anu bolo-fan minnu tora anu kɔma, anu kana hami wo fenfen na kamasɔrɔn ni anu kera yan, fen-hakikɛ min bi Iyipiti nyamanɛ rɔ yan, anutɛ le wonu na.”

²¹Yakobala dan wonu ya a ma iko Yusufu anubɛ mansɛ wo ya a fɔ anu ye nya min. Yusufu ya kirindinu don anu bolo anubɛ anuna kila-fandɛ.

²²A ya fɛrɛya-bɔɛ di anu ma, anu si anu mayɛlɛma min tɔ. Kɔnɔ a ya wodi-gbɛ-gbu kɛmɛ sawa anubɛ kura loli di a dɔgɛ Bɛnyamɛ ma.

²³A ya sofɛlɛ mogan lata a fa ma. Sofɛli-keima tan, wonu ma ta fenfen na fɔ Iyipiti nyamanɛ fen-nyimɛ donu. Sofɛli-musuma tan, wonu ma ta fenfen na fɔ a fa de-nyini fannu.

²⁴Yusufu ya a na-kelen-nyɔgɛnu masara. A ya a fɔ anu ye ko, “Wo ni a ma wo fɛrɛma. Wo kana kɛlɛ kilɛ la de!”

²⁵Anu bɔra Iyipiti nyamanɛ rɔ ka sɛgi anu fa Yakoba warɛ Kenan nyamanɛ rɔ.

²⁶Anu ke anu fa ma, anu ya a fɔ a ye ko, “Yusufu ye a kɛndɛ la, yo! Ado nfan, ale le kun-tigiyɛ la Iyipiti nyamanɛ bɛɛ kun na.” Yakoba siginɛ tora tantulan! A ma la anu na hali!

²⁷Yusufu ya a sara anu na kumɛ min bɛɛ la, anu ya wo dantɛgɛlɛ sa anu fa-kɛmɔgɛ ye. Yakoba ya kirindi wonu yen a yɛ la tumɛ min, Yusufu ya minnu nata a bi tinɛ, anu fa niyi bilara a rɔ tun.

²⁸Yakoba ko, “Sobore, nna den Yusufu ye a kɛndɛ la. N ni ta a yen yanni n ni faga.”