Read Kuranko Ko-Dabirɛnu 46 Bible Online

Ko-Dabirɛnu 46 - Kuranko bible

Ko-Dabirɛnu 46

¹Yakoba wulita ka a bolo-fannu bi ka ta. A kera Biri-Siba soe burɔ tumɛ min, a ya sarakɛnu bɔ a fa Isiyakata Alla ye nyɔ.

²Alla ya ko-rayirɛ kɛ Yakoba ye suyi rɔ ka a rakele. Yakoba ya a labira.

³Alla ko, “Alla le nde la, i fata Alla, kɔni. I kana kilan ka ta Iyipiti nyamanɛ rɔ kamasɔrɔn n si i bɔnsɔn lasiyaya nyɔ.

⁴N si ta i fɛ Iyipiti nyamanɛ rɔ. N si na i la Kenan nyamanɛ rɔ yan tɔ tun serr! I si faga ila den Yusufu bolo tɔ.”

⁵ Yanni anu ni bɔ Biri-Siba, Yakobala dannu ya anu fa anubɛ anuna denbayɛ bɛɛ bi ka anu sigi mansɛla kirindi wonu tɔ. Anu ya anuna kolo-fannu anubɛ anu bolo-fan mumɛ bɛɛ bi anu ya minnu sɔrɔn Kenan nyamanɛ rɔ ka ta anu na Iyipiti nyamanɛ rɔ.

⁸Yakoba bɔra ala denbayɛ minnu na Kenan nyamanɛ rɔ ka ta Iyipiti nyamanɛ rɔ, wonu tɔgɛ le kɛnu na. Ala den-kei-fɔlɔtɛ tɔgɛ le Rubɛn.

⁹Rubɛn wo tara ala den-kei mɔgɔ nanɛ la a bolo, Hanoki wo, Palu wo, Hɛsirɔn wo, anubɛ Karimi.

¹⁰Yakobala den Simiyɔn wo tara ala den-kei mɔgɔ wɔrɛ la a bolo, Yɛmuwɛli wo, Yamin wo, Ohadu wo, Yakin wo, Sohari wo, anubɛ Kenan nyamanɛ musila den Sala.

¹¹Yakobala den Lifayi wo tara ala den-kei mɔgɔ sawɛ la a bolo, Kɛrisɔn wo, Kohati wo, anubɛ Mɛrari.

¹²Yakobala den Yuda wo tara ala den-kei mɔgɔ sawɛ la a bolo, Sela wo, Pɛrɛsi wo, anubɛ Sera. Kɔnɔ Pɛrɛsi wo tara ala den-kei mɔgɔ fila la a bolo, Hɛsirɔn anubɛ Hamula. Kɔnɔ Yudala den-kei mɔgɔ filɛ, Ɛra anubɛ Onan, wonu fagara Kenan nyamanɛ rɔ.

¹³Yakobala den Isakari wo tara ala den-kei mɔgɔ nanɛ la a bolo, Tola wo, Puwa wo, Iyobi wo, anubɛ Simirɔn.

¹⁴Yakobala den Sɛbulɔn wo tara ala den-kei mɔgɔ sawɛ la a bolo, Sɛrɛdi wo, Helon wo, anubɛ Yaliyɛli.

¹⁵Liya sɔrɛ le kɛnu na anubɛ Yakoba ya minnu sɔrɔn Mɛsopotemiya nyamanɛ rɔ, anubɛ ala dunmusi Daina. Liya sɔrɛ mumɛ bɛɛsi yatɛ bɛnta mɔgɔ bi-sawa ani mɔgɔ sawa (33) ma.

¹⁶Yakobala den Kadi wo tara ala den-kei mɔgɔ wɔrɔnfilɛ la a bolo, Sɛfiyon wo, Hagi wo, Suni wo, Ɛsibɔn wo, Ɛri wo, Arodi wo, anubɛ Arɛli.

¹⁷Yakobala den Asɛra wo tara ala den-kei mɔgɔ nanɛ la a bolo, Imina wo, Isifa wo, Isifi wo, Bɛriya wo, anubɛ anu tirisan-musi Sera. Bɛriya wo tara ala den-kei mɔgɔ fila la a bolo, Hibera anubɛ Makiyɛli.

¹⁸Leban ya ala yɔɔn-musi Silipa min di ala dunmusi Liya ma, wo sɔrɛ le kɛnu na anubɛ Yakoba ya minnu sɔrɔn. Silipa wo sɔrɛ yatɛ bɛnta mɔgɔ tan-ni-wɔrɔ (16) ma.

¹⁹Yakobala bara-musi Resɛli ya den-kei mɔgɔ fila pe le sɔrɔn a ye, Yusufu anubɛ Bɛnyamɛ.

²⁰ Wo tumɛ Yakobala den Yusufu ye Iyipiti, ala musi Asɛnati ya den-kei mɔgɔ fila sɔrɔn a ye, Manasa anubɛ Ifɛrɛm. Pɔtifɛra min bi saraka-masɔ-wɔli kɛla Iyipiti bɛsɛnu ye Hɛliyapɔlisi soe burɔ, wola den-sɔrɔnnɛ le Asɛnati wo la.

²¹Yakobala den Bɛnyamɛ, wo tara ala den-kei mɔgɔ tan la a bolo Iyipiti nyamanɛ rɔ, Bela wo, Bika wo, Asiba wo, Kɛra wo, Neyaman wo, Ehi wo, Rɔsi wo, Mupim wo, Hupim wo, anubɛ Arada.

²²Resɛli anubɛ Yakoba sɔrɛ mumɛ bɛɛsi yatɛ bɛnta mɔgɔ tan-ni-nani (14) ma.

²³Yakobala dan min tɔgɛ Dan, wo tara ala den-kei kelan la a bolo, Husim.

²⁴Yakobala den Nafatali, wo tara ala den-kei mɔgɔ nanɛ la a bolo, Yasila wo, Kuni wo, Yesa wo, anubɛ Silɛm.

²⁵Leban ya yɔɔn-musi Biliha min di ala dunmusu Resɛli ma, wo sɔrɛ le kɛnu na anubɛ Yakoba ya minnu sɔrɔn. Biliha wo sɔrɛ yatɛ bɛnta mɔgɔ wɔrɔnfila (7) ma.

²⁶Yakoba bɔra ala denbayɛ minnu na Kenan ka ta Iyipiti nyamanɛ rɔ, wonu mumɛ bɛɛsi yatɛ bɛnta mɔgɔ bi-wɔrɔ ani mɔgɔ wɔrɔ (66) ma. Ala den-keinuna musinu bɔnɛ anu na.

²⁷ Yusufu ya den-kei fila sɔrɔn Iyipiti nyamanɛ rɔ. Yakoba bɔnsɔn min bɛɛ taranta Iyipiti nyamanɛ rɔ, wo yatɛ bɛnta mɔgɔ bi-wɔrɔnfila (70) ma.[52]

²⁸Yakoba ya Yuda lata anu yarɔ Yusufu wara alako Yusufu ni na anu nabɛn Kosɛn sigisɔn rɔ. Yakobanu ke Kosɛn,

²⁹a ma mɛ, Yusufu ya ata kirindi bi ka ta a fa labɛn tinɛ Kosɛn sigisɔn rɔ. A ya a fa taran Kosɛn. Anubɛ a fa ya anu nyɔgɔn bira gbuturu! Yusufu donta diyi-kɛ rɔ. A mɛra dila.

³⁰Yakoba ya a fɔ Yusufu ye ko, “Hali n fagara gbɛ, tana ma wo la bawo n bara i kɛndɛ yen n yɛ la.”

³¹Yusufu ya a fɔ anu ye ko, “N si ta ka wola sundanyɛ dantɛgɛ mansɛ ma ka a fɔ a ye ko n fa anubɛ ala denbayɛnu bara na ka bɔ Kenan nyamanɛ rɔ.

³²N si a fɔ a ye ko kolo-fen-makandannɛ le wole la. Woletɔ wo nara wola sagɛnu na anubɛ ninkinu anubɛ wo bolo-fan bɛɛsi la.

³³Ni mansɛ ya wo kele tumɛ min ka wo manyinika wola wɔlɛla ko ma,

³⁴wo ni a fɔ a ye ko ka a bi wo benbanu ma ha ka a sigi kaka la, kolo-fen-makandannɛ le wole la. Woletɔ mansɛ si sɔn wo sigi-koe ma Kosɛn sigisɔn rɔ kamasɔrɔn kolo-fen-makandannɛnu ma di Iyipiti kɛnu ye mumɛ!”