Read Kuranko Ko-Dabirɛnu 47 Bible Online

Ko-Dabirɛnu 47 - Kuranko bible

Ko-Dabirɛnu 47

¹Yusufu ya a na-kelen-nyɔgɛ wonu mɔgɔ loli bi ka ta wonu yira mansɛ la. Yusufu ya a fɔ mansɛ ye ko, “N tigi, n fa anubɛ ala denbayɛnu bara na ka bɔ Kenan nyamanɛ rɔ. Anu nara anuna kolo-fan mumɛ bɛɛsi la anu bolo anubɛ anu bolo-fannu. Anu bara ke Kosɛn sigisɔn rɔ.”

³Mansɛ wo ya Yusufu na-kelen-nyɔgɛ wonu manyinika ko, “Wole ye nfen wɔlɛ kɛla?” Anu ya a fɔ mansɛ ye ko, “Kolo-fen-makandannɛ le male la iko ma benbanu bi nya min nun.

⁴Ma nara le ka ma sigi ila nyamanɛ kɛ rɔ bawo kɔnkɛ ara gbɛlɛya ma kuma Kenan nyamanɛ rɔ. Kolo-fen de-nyini tina sa nyɔ tun. Woletɔ i yandi, i ni sɔn ma ni ma sigi Kosɛn sigisɔn rɔ yan.”

⁵Mansɛ ya a fɔ Yusufu ye ko, “I fa anubɛ ala denbayɛnu bara na i wara nkɛkuna,

⁶wo warɛ le Iyipiti nyamanɛ kɛ la. Wo ta wo sigi Kosɛn sigisɔn rɔ. Dugu-nyimɛ le nyɔ la. Ni mɔgɛ do ye wo tɛma min kusan kolo-fannu fɛ-birala, n ni nta kolo-fannu kerifa wo tigi la.”

⁷Yusufu wulita ka ta a fa Yakoba bi ka na a yira ale mansɛ la. Yakoba ya mansɛ kɔndɔn ka a wɔlɔbɔ. Yakoba ban mansɛ kɔndɔnna,

⁸mansɛ wo ya a yen min kɛ ko Yakoba ara kɔrɔya, a ya Yakoba manyinika, a ko, “N fa, ile wara san yili bɔ?”

⁹Yakoba ya a fɔ mansɛ ye ko, “N bara san kɛmɛ ani san bi-sawa (130) bɔ kɔnɔ hali wo, n ma kɔrɔya wɛ iko n benbanu. Kɔnɔ san kɛ mumɛ bɛɛ mara n tɔrɔya-san le la.”

¹⁰Yakoba ya a masara mansɛ la. A tara.

¹¹Yusufu ya sigi-tina-hakikɛ di a fa anubɛ ala denbayɛnu ma Kosɛn sigisɔn rɔ, Ramɛsisi soe dafɛ Iyipiti nyamanɛ rɔ iko mansɛ ya a fɔ nya min.

¹²Yusufu tora dɔntɛ labɔla a fa anubɛ ala denbayɛnu ye iko anu siya anu nyɔgɔn ko nya min.

¹³Kɔnkɔ-fitinɛ tora gbɛlɛyala nyamanɛ wo rɔ bɛrɛkɛ, woletɔ dɔn-fen ma taran nyamanɛ wo rɔ nun hali! Iyipiti nyamanɛ anubɛ Kenan nyamanɛ kasarata kɔnkɔ-fitinɛ wo bolo.

¹⁴Nyamani filɛ wo mɔgɛnu banta anuna wodinu sanna dɔn-fan la Yusufu ma. Yusufu tara nyamani filɛ wodi wonu dantɛgɛ mansɛ ma.

¹⁵Wodi bɛɛ banta Iyipiti nyamanɛ anubɛ Kenan nyamanɛ rɔ tumɛ min, Iyipiti mɔgɛnu nara Yusufu wara. Anu ya a fɔ a ye ko, “Dɔn-fan di ma ma gbɛ! Ma kana na faga. Mala wodinu bara ban. Ma dɛnbɛ, ma ni dɔn-fan sɔrɔn.”

¹⁶Yusufu ya anu yabi ko, “Bawo wola wodinu bara ban, nba, wo na wola kolo-fannu na ka anu felen dɔn-fannu na n ma.”

¹⁷San kelan wo kɔrɔ, mɔgɛnu bi nala Yusufu wara anuna kolo-fannu na, saga wo, baa wo, ninki wo, sofɛlɛ wo, anubɛ anuna soeenu fanan ka anu felen dɔn-fannu na.

¹⁸San wo tenbinɛ, anu nara Yusufu wara tun ka a fɔ a ye ko, “Ile nyɛrɛ ya a lɔn serr, mala wodinu bara ban, mala kolo-fen bɛɛsi ara ma itɛ la. Fenfen ma to ma bolo, fɔ male anubɛ mala duginu.

¹⁹Ma tigi, i yandi, ma dɛnbɛ. Ma kana na faga i ya la. Yanni ma ni faga kɔnkɛ bolo, wo ni mabɛ mala duginu san dɔn-fan la. Male si to yɔɔnyɛ rɔ mansɛ bolo. Mala duginu si to mansɛ bolo. Nba woletɔ, i yandi, sugi di ma ma alako mala duginu makolɔn kana to.”

²⁰Kɔnkɛ tora gbɛlɛyala Iyipiti mɔgɛnu kuma ha Yusufu banta anuna duginu sanna anu ma mansɛ ye. Woletɔ anuna dugi wonu mara mansɛtɛ la.

²¹Ka a fɔlɔ Iyipiti nyamanɛ-dan doi ma ha ka ta a sigi a dan doi la, Yusufu ya a mɔgɛ bɛɛ ma yɔɔn la,

²²fɔ minnu bi saraka-masɔ-wɔli kɛla Iyipiti bɛsɛnu ye. A ma wonu denuna duginu san bawo mansɛ le wonu de-nyini tinɛ.

²³Wo kɔma, Yusufu ya a fɔ mɔgɛnu ye ko, “N bara wobɛ wola duginu san mansɛ ye. Wo ni wola suginu bi ka ta anu fui wola sɛnɛnu ma.

²⁴Wo wa ban anu tɛgɛla tumɛ min, wo wa fenfen sɔrɔn wola sɛnɛnu tɔ, wo ni wo dan nani, a loli nyɔgɔn, mansatɛ le wo la. A toe min bi tola, wo si wo ma wola sugi anubɛ wola dɔn-fan la.”

²⁵Anu ko, “I wara ma niyi lakisi. I wara ma bira a kilɛ fɛ. Ka a bi wati kɛ ma, ma si to yɔɔnyɛ rɔ mansɛ kɔrɔ.”

²⁶Min bɛɛ ya fen-sɔrɔn-kɛ anuna sɛnɛnu tɔ, anu ya wonu dan nani, a loli nyɔgɛ mara mansɛtɛ la. Ha bi,[53] wo tɔn ye Iyipiti nyamanɛ rɔ nyɔ. Fɔ saraka-masɔlɛ minnu bi sarakɛnu bɔla bɛsɛnu ye nyɔ, wonu denu dɔrɔnna dugi ma ma mansɛtɛ la.

²⁷Yakobala denbayɛ, Isirɛla mɔgɛnu, kɔni, wonu sigira Kosɛn sigisɔn rɔ Iyipiti nyamanɛ rɔ tumɛ min, anu ya nɔnfuli sɔrɔn ka yiri bɛrɛkɛ!

²⁸Yakoba ya san tan-ni-wɔrɔnfila le bɔ Iyipiti nyamanɛ rɔ. A sɔrɔn-san ya san kɛmɛ ani san bi-nani ani san wɔrɔnfila (147) le bɔ.

²⁹ Yanni a ni faga tumɛ min, a ya ala den Yusufu kele ka a fɔ a ye ko, “I ni i bole ladon n woro filɛ tɛma[54] ka i keli n ye ko n ba faga tumɛ min, ni i si n togon Iyipiti nyamanɛ kɛ rɔ yan.

³⁰Kɔnɔ ni n fagara Iyipiti nyamanɛ rɔ tumɛ min, i ni n furi bi ka ta a la Kenan nyamanɛ rɔ. I ni n togon n benbanuna dugi rɔ.” Yusufu ko, “N si a ma iko i wara a fɔ nya min.”

³¹A fa Yakoba ko, “Ni i ya a lɔn a ti tinya, na i keli n ye bɛrɛbɛrɛkɛ!” Yusufu ya a keli. Nba, Yakoba ya baraka bira Alla ye ala sa-fan kuma.