Read Kuranko Ko-Dabirɛnu 48 Bible Online

Ko-Dabirɛnu 48 - Kuranko bible

Ko-Dabirɛnu 48

¹A ma mɛ kɛ kɔma, anu ya a fɔ Yusufu ye ko a fa ma kɛndɛ. A tara ala den-kei filɛ la a bolo, Ifɛrɛm anubɛ Manasa ka ta a fa Yakoba kɔndɔn tinɛ.

²Anu ya a fɔ Yakoba ye ko, “Ila den Yusufu ara na.” A ya wo lamɔɛn tumɛ min, a ya a ragbɛlɛya ka a lasɔ ka a sigi.

³Yakoba ya a fɔ ala den Yusufu ye ko, “Lunyɛ do, Alla Sɛnbɛ-Bɛɛ-Tigi bɔra gbɛ rɔ n ye Lusi soe dafɛ Kenan nyamanɛ rɔ. Ata duwɛ yigira n kuma nyɔ.

⁴ A ya a fɔ n ye ko a si a ma, n ni sabati ka n bɔnsɔn lasiyaya ka Kenan nyamanɛ wo ma mabɛ n bɔnsɔntɛ la habadan!”

⁵Yakoba ya a fɔ Yusufu ye tun ko, “Ila den filɛ Ifɛrɛm anubɛ Manasa i wara minnu sɔrɔn Iyipiti nyamanɛ rɔ kɛ la, ntɛ le wonu na iko ntɛ le i kɔrɔ Rubɛn anubɛ i kɔrɔ Simiyɔn na nya min.

⁶Ni i ya dan minnu sɔrɔn kɛnu kɔma, iletɛ le wonu na. Wonu si n kɛɛ sɔrɔn anu kɔrɔ mɔgɔ filɛ kɛnu na.

⁷ N bi kɛ mala Resɛli lela ko la. Ma bɔɛ Mɛsopotemiya nyamanɛ rɔ, n yisi tinyanta bɛrɛkɛ, bawo Resɛli fagara n bolo Ɛfarati kilɛ la Kenan nyamanɛ rɔ. N ya a togon nyɔ.” (Anu bi a fɔla Ɛfarati soe le ma kaka ko Bɛtalehɛm.)

⁸Yakoba ya Yusufula den-kei mɔgɔ filɛ wonu milomilo yen sɔni. A ya Yusufu manyinika ko, “Yon bi kɛnu na?” Nba, Yakoba ara kɔrɔya min kɛ, a yɛ mabirara. Woletɔ Yusufu ya a fɔ a fa ye ko, “Alla ara den-kei mɔgɔ filɛ minnu di n ma yan, wonu denu bi kɛnu na.” Yakoba ko, “I ni anu madon n na alako n ni duwa anu ye.” Woletɔ Yusufu ya anu madon a la. Anu benba ya anu sunbu ka anu mamɔnsɔ.

¹¹Yakoba ya a fɔ Yusufu ye ko, “N ma a lɔn nun mumɛ, ni n si i yen tun. Kɔnɔ Alla ara a ma, n bara wobɛ ila dannu yen.”

¹²Yusufu ya ala dan wonu bɔ a fa kian kuma ka a laburun a ma dugi ma a fa kin kɔrɔ.

¹³Wo kɔma, a ya Ifɛrɛm sigi a fa dafɛ a bolo-maran wara la. A ya Manasa sigi a fa dafɛ a bolo-nyimɛ wara la iko anu kina anu nyɔgɔn ko nya min.

¹⁴Hali dan-dɔgɔmɛ le Ifɛrɛm la, Yakoba ya a bole ratantan ka a bolo-nyimɛ sa wo kuma. A ya a bolo-maran sa a kinamɛ Manasa kuma.

¹⁵Yakoba duwara Yusufula dannu ye ko, “Alamɛ n fa Isiyaka anubɛ n benba Iburayimata Alla ni ata duwɛ layigi den-kei filɛ kɛnu kuma. Ka a bi n dennɛ ma ha ka a sigi kaka la, Alla min ya n kandan ka n tanka masibɛnu ma, alamɛ wota duwɛ tora anu kuma.

¹⁶Alla min nara nde ma iko melika ka n kunka ko-yogomɛ bɛɛ ma, alamɛ wota duwɛ tora ila den-keminɛ kɛnu kuma. Alamɛ tɔgɔ-nyimɛ tora den-kei filɛ kɛnu kuma iko a tora n fa Isiyaka anubɛ n benba Iburayima anubɛ nde kuma nya min. Anu bɔnsɔnnu ni siyaya dugu-kole kɛ kuma.”

¹⁷Yusufu ya a yen tumɛ min ko a fa ara a bolo-nyimɛ sa den-kei-dɔgɔmɛ kuma, wo ma diya a ye mumɛ! A ya a fa bole bɔ Ifɛrɛm kuma ka a sa Manasa kuma.

¹⁸Yusufu ya a fɔ a fa ye ko, “N fa, a sa wo nya. Den-fɔlɔtɛ le Manasa la. I bolo-nyimɛ sa wo kuma.”

¹⁹A fa ma sɔn wo ma. A ko, “Nna den, min bi a tola n bi kɛ mala, n ya wo lɔn. Manasa-kegeyɛ fanan si siyaya ka ma bɔnsɔn-malɔnnɛ la. Kɔnɔ a dɔgɛ wo si sɛnbɛ sɔrɔn ka tenbi ale la. A kegeyɛ fanan si siyaya ka ma bɔnsɔn-malɔnnɛnu na.”

²⁰ Yakoba ya anuna duwɛ makofu wulɔn ko, “Isirɛla mɔgɛnu tenbi duwala, anu si duwɛ wo sanka ila dan kɛnu denu ma ka a fɔ ko, ‘Alamɛ i mara iko Ifɛrɛm anubɛ Manasa ye nya min.’ ” Woletɔ Yakoba ya Ifɛrɛm sɔ a kɔrɔ Manasa yarɔ duwɛ fɛ.

²¹Yakoba ya a fɔ a ye ko, “Yusufu, n fagamatoe le kɛ la kɔnɔ Alla si to i fɛ ka wo lasɛgi tun fɔ wo benba anubɛ wo fata nyamanɛ rɔ.

²²N ya Sɛkɛm tɛngbɛnya-hakikɛ min bɔ Amoranu bolo nna faan anubɛ nna kalabɛn la, yanni n ni wo di i na-kelen-nyɔgɛnu ma, n bara nyɔ sa ile Yusufutɛ kuma.”