Read Kuranko Ko-Dabirɛnu 6 Bible Online

Ko-Dabirɛnu 6 - Kuranko bible

Ko-Dabirɛnu 6

¹ Mɔgɛnu siyayara dugu-kole kuma tumɛ min, Allata nima-fan donu[7] yɛ bɔra mɔgɛ wonuna dunmusinu na bawo anu kin. Anu yɛ bɔra minnu na, anu ya wonu bi anu nyɛrɛ ye.

³Woletɔ Mari ko, “N ti ke n munyuna hadama-dannuna sɔn-yogoyɛ kɔrɔ. Bɔnkɛ le anu na min kɛ, ka a dabira kaka ma, n si do bɔ anu siyi-tele la. Mɔgɔ-wo-mɔgɔ siyi ti tenbi san kɛmɛ ani san mogan (120) na tun.”

⁴ Nima-fan wonu ya anu sa dunmusi wonu fɛ tumɛ min, dunmusi wonu ya mɔgɔ-yan-bɛnu sɔrɔn. Dan wonu denu mara sɛnbɛ-tiginu anubɛ tɔgɔlamɛnu na.

⁵ Mari ya a yen min kɛ mɔgɛnuna ko-yogomɛ da ra ara koloya duninya rɔ, ado anu miriya bɛɛ manɛ ko-yogomɛ la tun tun,

⁶wo le ya a to, anuna mɔninyɛ donta Mari rɔ.

⁷Mari ko, “N bara mɔgɛ minnu dan duninya rɔ, anu kɛ-nya ara a ma, n bara nimisa anu dan-koe la. N si anu dama halaki dugu-kole kuma, mɔgɔ wo, sogo wo, sagan-fen wo, anubɛ konanu.”

⁸Kɔnɔ Nowa wo ya Mari hɛnɛ.

⁹ Den-kei mɔgɔ sawa ye Nowa bolo nun, Sɛma wo, Hama wo, anubɛ Yefɛti. Duninya fanɛ wunduyogoyɛ anubɛ karagbɛlɛyɛ la kɔnɔ wo wati rɔ, Nowa kelan le mɔgɔ-latelennɛ la Alla yala duninya rɔ. Nowa tora Allala kilɛ fɛ.

¹²Alla ya a yen ko ko-yogomɛ ara wara duninya rɔ kamasɔrɔn mɔgɛ bɛɛ ara don ko-yogomɛ rɔ.

¹³Alla ya a fɔ Nowa ye ko, “Mɔgɛ bɛɛ lato-wati ara ke kamasɔrɔn duninya bɛɛ fanɛ karagbɛlɛyɛ la. N si mɔgɛ bɛɛ halaki duninya rɔ anubɛ fan min bɛɛsi ye dugu-kole kuma.”

¹⁴Alla ya a fɔ Nowa ye tun ko, “Ta kɔlɔma-hakikɛ [8] donu nyini ka kulun-belebele-wɛ do ladan i nyɛrɛ ye. I ni kolota nɔrɔ kulɔn wo kɔmɛ anubɛ a burɛ ma ka konkonu nadan a burɔ.

¹⁵I ni a suma nya min, wo le kɛ la. Kulɔn wo yanyɛ ni ma nunkan-nya kɛmɛ sawa la. A kɔnɛ ni ma nunkan-nya bi-loli la. A sɔɛ ni ma nunkan-nya bi-sawa la.

¹⁶I ni kulɔn tuwa ka woenu to tala a dandan anubɛ a tuwanɛ wo tɛma. Woe wonu yanyɛ ni ma nunkan-nya kelen na. I ni kulɔn dɛ to a tɔnkɔn rɔ. I ni a ma san-bon sawa la a nyɔgɔn kuma a burɔ.”

¹⁷Alla ya a fɔ tun ko, “Nde, Alla si yi keri duninya kun na alako n si nima-fan bɛɛsi halaki nya min ka anu firan dugu-kole kuma. Nima-fan min bɛɛsi ye dugu-kole kuma, wo bɛɛ si faga.

¹⁸Kɔnɔ mabɛ ile si sarama-kan kiri ma nyɔgɔn tɛma. Wobɛ ila musi si don kulɔn rɔ anubɛ ila den mɔgɔ sawɛ anubɛ anuna musu mɔgɔ sawɛ.

¹⁹Nima-fan bɛɛ si na i wara fila-filanyɛ ma alako anu ni kisi. I ni don anu na i bolo kulɔn rɔ, a keimɛnu anubɛ a musumɛnu alako anu ni kisi i fɛ.

²¹I ni dɔn-fan sufa bɛɛ bi ka anu nadon wo ye. Wo si ma dɔn-fan la wobɛ nima-fan wonu ye.”

²² Nowa ya a ma iko Alla ya a fɔ a ye nya min.