Read Kuranko Ko-Dabirɛnu 7 Bible Online

Ko-Dabirɛnu 7 - Kuranko bible

Ko-Dabirɛnu 7

¹A wati kera tumɛ min, Mari ya a fɔ Nowa ye ko, “Wobɛ ila denbayɛ ni don kulɔn rɔ. N bara a yen ile le kelen pe telennɛ n ya la duninya rɔ.

²I ni sogo-sɛnimɛ sufa bɛɛsi bi a keimɛnu wɔrɔnfila, a musumɛnu wɔrɔnfila. I ni sogo-haramunɛnu fanan bi fila-filanyɛ ma, a keimɛ anubɛ a musumɛ.

³I ni kona sufa bɛɛsi bi wɔrɔnfila-wɔrɔnfila, a keimɛnu anubɛ a musumɛnu alako anu sugi ni to dugu-kole kuma.

⁴A ara to tele wɔrɔnfila, n ni bandɛ lana dugu-kole kuma. Bandɛ si na su bi-nani, tele bi-nani. N ya nima-fan min bɛɛsi dan, n si wo bɛɛsi halaki ka anu bɔ dugu-kole kuma.”

⁵Nowa ya a ma iko Mari ya a fɔ a ye nya min.

⁶ Yi ye kerila dugu-kole kuma tumɛ min, Nowa-sɔrɔn ara san kɛmɛ wɔrɔ (600) bɔ. Nowa anubɛ ala musi donta kulɔn rɔ anubɛ ala den mɔgɔ sawɛ, Sɛma wo, Hama wo, anubɛ Yefɛti, anubɛ wonuna musi mɔgɔ sawɛ alako anu ni kisi yi wo ma. Tele wo nyɛrɛ rɔ, sogo-sɛnimɛnu anubɛ sogo-haramunɛnu anubɛ konanu anubɛ nima-fan bɛɛsi nara Nowa wara fila-filanyɛ ma, a keimɛnu anubɛ a musumɛnu, ka don kulɔn rɔ Nowa fɛ iko Alla ya a fɔ a ye nya min. Anu ke kulɔn rɔ, Mari ya kulɔn dɛ latogon anu ma. Anu bi kulɔn wo burɔ tele wɔrɔnfila yanni bandɛ ni na dugu-kole kuma. Nowa sɔrɔn-san kɛmɛ wɔrɔ nyɔgɛ, wo karɛ filɛ, tele tan-ni-wɔrɔnfilɛ ma, yi ya dugu punsɔgɔ ka tugu duninya kun na. San-kole ya a dɛ bɔ bandɛ kɔrɔ. Bandɛ nara dugu-kole kuma su bi-nani, tele bi-nani.

¹⁷Tele bi-nanɛ wo kɔrɔ, yi ye yɛlɛla dugu-kole kuma ka kulɔn bi dugu ma.

¹⁸Yi wo sara dugu-kole kuma ka a yamatogon. Kulɔn wo tora yi kuma.

¹⁹Yi wo tora yɛlɛla ha a ya kɔnkɔ-layan-bɛnu yamatogon.

²⁰A tora yɛlɛla ha yi min sanɛ kɔnkɔ-layan-bɛnu kuma, ka a bi kɔnkɛ wonu kuma ka yɛlɛ, wo rayanyɛ mara nunkan-nya tan-ni-loli la.

²¹Nima-fan bɛɛsi fagara dugu-kole kuma, kona wo, sogo wo, anubɛ mɔgɛnu.

²²Fenfen min si a niyi lafɛ, wo bɛɛ fagara tɛrr! Fɔ Nowa anubɛ minnu bi a fɛ kulɔn rɔ, wonu denu tora.

²⁴Yi tora dugu-kole kuma tele kɛmɛ ani tele bi-loli.