Read Kuranko 2 Samuwɛli 11 Bible Online

2 Samuwɛli 11 - Kuranko bible

2 Samuwɛli 11

¹ Mansɛnuna kɛlɛ-kɛ-wati kenɛ, Mansa Dawuda ya Yohabu anubɛ ala mɔgɔ-banu anubɛ ala kɛlɛ-dan bɛɛsi lata. Anu ya Amonnu nɔ ha ka ta anuna so-karantan Raba soe lafoo ka ta bui anu ma. Kɔnɔ Mansa Dawuda tora Yerusalɛm soe burɔ.

²Lunyɛ do wura dɛ fɛ, Mansa Dawuda ya a lasɔ kinɔgɔ rɔ. A tara sɔ ala san-bɔn kuma. A ye nyɔ tumɛ min, a ya musi do yen, a ye a kula. Musi wo kin dɔgɔma-ma-de!

³A ya kilayɛ lata alako a ni musi wo wara-koe lɔn. Kɔnɔ tɔ-a-la, a ya a lɔn ko Ɛliyamula dunmusi le wo la. A tɔgɛ le Batasiba. Ala kei tɔgɛ le Yuraya min bɔra Hita nyamanɛ rɔ.

⁴Mansa Dawuda ya mɔgɛ do sɔ Batasiba wo kele tinɛ. Musi wo nanɛ, Mansa Dawuda ya a sa wo fɛ. (Kɔnɔ wo ya a taran, musi wo bɔ-san le ala wati rɔ ka a nyɛrɛ sɛninya iko tɔn ya a fɔ nya min.) Anu ban, musi wo tara a warɛ bɔn la.

⁵Wati-tenbinɛ, musi wo ya a lɔn ko a buyi ye a la. A ya kilayɛ lata Mansa Dawuda ma ka wo fɔ a ye.

⁶Mansa Dawuda ya kilayɛ lata Yohabu ma kɛlɛ-kɛ-tinɛ alako a ni Yuraya lana a ma. Yohabu ya Yuraya lana ale mansɛ ma.

⁷Yuraya ke Mansa Dawuda ma Yerusalɛm soe burɔ, a ya a manyinika Yohabu anubɛ kɛlɛ-den-toenuna ko ma. A ya a manyinika kɛlɛ fanan bara-koe ma.

⁸A ya a fɔ Yuraya ye ko a ni ta a niyi madɛn a warɛ bɔn la tele fila kɔrɔ. Yuraya ya a bɔ mansɛ dafɛ nyɔ rɔ. Mansɛ ya a fandɛ lata a warɛ bɔn la.

⁹Kɔnɔ yaga, Yuraya ma ta a halala bɔn la. A kira mansɛla bolɔn-don-dɛ la anubɛ mansa-makandannɛnu.

¹⁰Mansa Dawuda ya a lamɔɛn min kɛ ko Yuraya ma ki a halala bɔn wo la, a ya a kele ka a manyinika. A ko, “I bɔnɛ wula-yan le la, nfenna i ma sɔn tala kila i warɛ bɔn la?”

¹¹Yuraya ya a fɔ ale Dawuda ye ko, “N ta-nyɔgɛ Isirɛla anubɛ Yuda kɛlɛ-dan damasi ye kɛlɛ kɛla kaka, ado Marita tɔn-kenkirɛ ye anu fɛ nyɔ. Nna kɛlɛ-kun-tigi Yohabu wonubɛ ata mɔgɔ-banu bi kila gbɛkole le ma. Nfenna wo rɔ, nde si ta n nyɛrɛ ladiya n barɛ bɔn la ka n sa n fanbolo ka n nasɔ n fanbolo, mabɛ nna musi? N bara n keli iko ita mansayɛ anubɛ ila simayɛ ye nya min, n ti ko sufa wo ma.”

¹²Mansa Dawuda ya a fɔ a ye ko, “Ki yan bi kelan, sina sɔgɔma n si i lata i gbɛ rɔ.” Yuraya tora Yerusalɛm soe burɔ nyɔ ha wo wulun sɔgɔma.

¹³Mansa Dawuda ya a kele fen dɔn tinɛ. Wo kɔma, wulɔn suyi nyɛrɛ rɔ, a ya a lamin kɔlikɔli! Kɔnɔ hali wo, Yuraya ma ta a warɛ bɔn la. A tara ki a gbɛ rɔ mansa-makandannɛnu bara nyandan rɔ.

¹⁴Banda-kanɛ, Mansa Dawuda ya kɛdi sɛbɛ Yohabu ma ka a don Yuraya bolo.

¹⁵A ya min sɛbɛ kɛdi wo rɔ, a ko Yohabu ni Yuraya lata kɛlɛ kunaya tinɛ. A ko a wa ban wo mala, anu ni anu bɔ a dafɛ alako a kunyɛ ni to kɛlɛ rɔ. Yuraya tara kɛdi wo don Yohabu bolo.

¹⁶Yohabu ye kɛlɛ kɛla Raba soela foolɛ rɔ tumɛ min, kɛlɛ sɛnbɛ ye a la kan bara la, a ya ale Yuraya latuntun anu yogenu ma nyɔ.

¹⁷Anu yogenu bɔra Raba soe burɔ ka na Yohabu kɛlɛ tinɛ. Anu ya Yuraya anubɛ Mansa Dawudala kɛlɛ-den-kun-tigi donu faga.

¹⁸Koe minnu tenbira kɛlɛ rɔ, Yohabu ya wo sarakanɛ lata mansɛ ma.

¹⁹A ya a fɔ kilayɛ wo ye ko, “I wa ban kɛlɛ wara-koe rakaranna ale mansɛ ye,

²⁰tumado a si diminya i ma ka nyinikalɛ siyaman digin i rɔ. A si a fɔ ko, ‘Nfenna wo ya wo gbɛrɛn soe ma kɛlɛ-kɛ-tinɛ? Wo ma a lɔn ko anu si sɔ le anuna tarɛ kuma ka kalabɛn lakɛ wo ma?

²¹ Kidiyɔnla den Abimɛlɛki fagara nya min, wo ma wo miri wo ma nun, ba? Wonu tanɛ Tebɛsi so-burɔ-mɔgɛnu kɛlɛ tinɛ tumɛ min, musi do ya kuri-belebele do labɔ san ma ka a labui Abimɛlɛki kunyɛ rɔ ka a faga. Nfenna wo ya wo gbɛrɛn tarɛ ma wo nya na?’ Ni mansɛ ya i manyinika kɛ nya na, i si a fɔ a ye ko ala kɛlɛ-den-kun-tigi min tɔgɛ Yuraya, wo ara faga.”

²²Mɔgɛ wo tara Yohabula kilayɛ lake Mansa Dawuda ma.

²³A ya a fɔ a ye ko, “Ma yogenu tagbɛlɛ ma ko. Anu bɔra tarɛ burɔ ka kɛ ma ma gbɛkole ma. Kɔnɔ hali wo, ma ya anu gben. Anu burimatoe donta anuna tarɛ burɔ tun.

²⁴Anu yɛlɛta tarɛ kuma ka kalabɛn lakɛ ma ma, wo le ya a ma, mala kun-tigi donu fagara. Ila kɛlɛ-den Yuraya kunyɛ tora kɛlɛ rɔ le fanan.”

²⁵Mansa Dawuda ya a fɔ kilayɛ wo ye ko, “Ta a fɔ Yohabu ye ko a ma-kunya sa, hali a yisi ma tinya bawo mɔgɔ ti a lɔn ni min kunyɛ ye tola kɛlɛ rɔ. A fɔ anu ye ko anu ni anu sɛbɛ don ha anu ni nɔ-ko sɔrɔn soe wo ma.”

²⁶Batasiba ya ala kei saya-koe lamɔɛn tumɛ min, a ya ala kei di.

²⁷Ala kei saya-koe makimanɛ, Mansa Dawuda ya musi wo bi ka na a la ata bɔn la. A mara ala musi la. Musi wo muira den-kei. Kɔnɔ Mansa Dawuda ara min ma wo la, Mari ma sewa wola ko la.