Read Kuranko 2 Samuwɛli 13 Bible Online

2 Samuwɛli 13 - Kuranko bible

2 Samuwɛli 13

¹Mansa Dawudala den Abasalɔm, wo tirisan-musu-kinyanɛ do ye nyɔ nun. A tɔgɛ le Tema. Mansɛla dan do ye nyɔ tun, wo fanan tɔgɛ le Aminɔ. Kɔnɔ Tema kɛ di Aminɔ ye dɔgɔma-ma-de!

²A yɛ bɔra dunmusi wo la. Bawo a ti ke a lasɔrɔnna min kɛ, a tora mɔɛn! Sunkurun-nasɔlɔnɛ le. A ma ta wɛ kei-wara-sigi rɔ.

³Ale Aminɔ diyana-mɔgɛ do ye nyɔ, wo kɛwu de! Wo tɔgɛ le Yonadabu. Mansa Dawuda kɔrɔ Simɛyala dan le ale Yonadabu la.

⁴Yonadabu ya a fɔ Aminɔ ye ko, “Mansa-dan le ile la, ado tuma-wo-tuma, n bi a yenna i yisi magboyanɛ. Nfen mara?” Aminɔ wo ya a fɔ a ye ko, “N na-kelen-nyɔgɛ Abasalɔm, wo tirisan-musi di n ye kosɛbɛ!”

⁵A fa-kinamala den Yonadabu ya a fɔ a ye ko, “I si min ma, ta i sa, i ni i nyɛrɛ lakiraya. I fa wa na i mafɛlɛn tinɛ, i ni a fɔ wo ye ko i dɔgɛ Tema ni na dɔn-fan te i ye yan tɔ. Ale Tema nyɛrɛ-nyɛrɛ ni i de-nyini.”

⁶Wo le ya a ma, Aminɔ tara a sa yiri, ka a nyɛrɛ lakiraya. A fa Mansa Dawuda tara a mafɛlɛn tinɛ tumɛ min, ale Aminɔ ya a fɔ a fa ye ko, “I yandi, a ma, n dɔgɔ Tema ni na ka dɛgɛ yilan n ye yan tɔ. Ale nyɛrɛ ni to a dila n ma.”

⁷Mansa Dawuda ya kilayɛ lata Tema ma ko a ni ta a kɔrɔ Aminɔ warɛ. A ni to a de-nyinina.

⁸Tema ya a taran, a kɔrɔ Aminɔ sanɛ. A ya dɛgɛ-munke laboro ka a yilan nyɔ.

⁹A ya dɛgɛ-yilannɛ wonu wuya miran do rɔ ka a di a ma kɔnɔ a ma sɔn a la. A ya a fɔ Tema ye ko a ni mɔgɛ bɛɛsi labɔ luyi ma. Tema ban mɔgɛ wonu nabɔla luyi ma,

¹⁰Aminɔ ya a fɔ ale Tema ye ko, “Na dɛgɛ-yilannɛ don n da rɔ.” A ya dɛgɛ-yilannɛ wonu bi ka a madon a la.

¹¹A ko a ni dɛgɛ wo do ladon Aminɔ da rɔ, Aminɔ ya a bira. A ya a fɔ a ye ko, “Ma ma sa.”

¹²A dɔgɔ-musu Tema wo ya a fɔ a ye ko, “I kana n fɔrɔsɛ ko-yogoma-su kɛ ma min ma daga[7] Isirɛla mɔgɛnu tɛma.

¹³Wo ti ma kun-nayigi-koe la n bolo Isirɛla mɔgɛnu tɛma? Wo si ma yarabi-koe la ile fanan bolo. I ti kuma mansɛ la, a ni n di i ma? A ti a ban wo ma.”

¹⁴Kɔnɔ Aminɔ ma sɔn a tole masɔla a dɔgɛ kɛ la. A ragbɛlɛ dunmusi wo ko min kɛ, wo le ya a ma, a diginta a ma.

¹⁵Aminɔ ban a sala a dɔgɔ-musi wo fɛ, a sɔgɔ labɔra a la lass! A sɔgɔ labɔra a la ka tenbi ala keninteyɛ la min bi a burɔ nun. A nyɛɛra a ma, a ko, “I lawuli. Bɔ yan!”

¹⁶Kɔnɔ a dɔgɔ Tema ya a fɔ a ye ko, “I ye n gbenna yan min kɛ kɛ la, wo yogo ka tenbi ko-yogoma fɔlɔtɛ la.” Kɔnɔ Aminɔ ma sɔn a tole masɔla wo do-wo-do la.

¹⁷A ya a fɔ ala wɔli-kɛlɛ ye ko, “Musi kɛ labɔ yan. I ni a lakɛ luyi ma. I ni dɛ rasɔgɔ a kɔma!”

¹⁸Wɔli-kɛlɛ wo ya Tema labɔ luyi ma ka dɛ rasɔgɔ! Kɔnɔ wo ya a taran, duruku-daga-rayan do donnɛ Tema kan na nun iko mansɛla dunmusu-lasɔlɔnɛ ni min don a kan na.

¹⁹A ya ta-gbangban kɛ a kunyɛ rɔ ka ala duruki wo rafara a kan na. A ya a bolo filɛ burun a yɛ la. A dimatoe tara.

²⁰A kɔrɔ Abasalɔm ya a dimatoe yen min kɛ, a ya a fɔ a ye ko, “Aminɔ le wara i layarabi, wa?” A dɔgɔ-musi ya a fɔ a ye ko, “Ɔn.” A ya a fɔ a dɔgɔ-musi wo ye ko, “Hali i yisi ma tinya ka a dan-natenbi. I kana kɛ fɔ mɔgɔ-wo-mɔgɔ ye bawo i kɔrɔ le.” Tema yisi-magboyanɛ siginɛ tora a kɔrɔ Abasalɔm warɛ bɔn la.

²¹Mansa Dawuda ya kumɛ wo lamɔɛn nkɛkuna, a diminyara dɔgɔma-ma-de!

²²Aminɔ sɔgɔ labɔra Abasalɔm na lass, bawo a ara ko-yogoma-su wo ma a tirisan-musi la. A ma sɔn a da sɔla a ma.

²³San fila kɛ kɔma, Abasalɔm wuli ala saga-siyi matɛgɛla[8] Beyali-Hesɔ soe burɔ min bi Ifɛrɛm nyamanɛ dafɛ. A ya mansɛla dan bɛɛsi kele ladiyɛ kɛ kuma.

²⁴A tara a fa Dawuda wara ka a fɔ a ye ko, “N fa, n bi tala nna sagɛnu siyi matɛgɛla. A di n ye wobɛ ila mɔgɔ-banu ni bɛn wo ladiyɛ rɔ.”

²⁵A fa ya a fɔ a ye ko, “Ni ma dama tara, wo si ma dunɛ la i bolo.” Kɔnɔ hali wo, Abasalɔm nɔrɔta a ma ta-koe rɔ kɔnɔ mansɛ ma sɔn mumɛ! Kɔnɔ hali wo, a duwara a ye.

²⁶Wo kɔma, Abasalɔm ya a fɔ a ye ko, “Nba, n fa, ni ile ma ta, i ti a ma, ila den Aminɔ ni bila ma fɛ?” A fa ya a fɔ a ye ko, “Nfenna ale ye tala?”

²⁷Kɔnɔ hali wo, Abasalɔm nɔrɔta a fa ma Aminɔla ta-koe la. Tɔ-a-la, Dawuda sɔnta ala dan doinu ta-koe ma Abasalɔm anubɛ Aminɔ fɛ. Abasalɔm ya dɔn-fen-siyaman tabɛn anu ye.

²⁸Ale Abasalɔm ya a fɔ ala wɔli-kɛlɛnu ye ko, “Wo ni wo yɛ bɛn Aminɔ ma. Gbɛɛ wa a bira tumɛ min, n ba a fɔ wo ye, wo ni a faga. Hali wo ma kilan. Dunu sa wole kuma. Dunɛ ye nde le kuma. Wo ni wo kerinteya, hali wo ma sika.”

²⁹Wɔli-kɛlɛ wonu ya Aminɔ faga iko Abasalɔm ya a fɔ anu ye nya min. Mansa Dawudala den-toenu sigira anuna sofɛli-kinamɛnu na ka anu buri.

³⁰Yanni anu denu ni ke Yerusalɛm, mɔgɛ do tara a fɔ Dawuda ye ko, “Abasalɔm ara ila den-kei bɛɛsi faga tɛrr! Hali mɔgɔ-den-kelen ma to anu tɔ.”

³¹Mansɛ ya wo lamɔɛn nkɛkuna, a ya a lakɔɛnma ka ala duruki rafara yisi-tinya bolo. Wo kɔma, ale mansɛ ya a rasagan dugi ma ferengben! Ala wɔli-kɛlɛ minnu bi a fɛ, wonu fanan ya anuna durukinu tafara.

³²Kɔnɔ ale Mansa Dawuda kɔrɔ Simɛyala den Yonadabu ya a fɔ a ye ko, “N fa, anu ma ila den-kei damasi faga. Fɔ Aminɔ kelan, wo le fagara, ado kebi Aminɔ diginta Tema ma, wo diminyɛ ma bɔ Abasalɔm burɔ tun. Hali i wa Abasalɔm gbu mafɛlɛn, i si a lɔn a yakɔrɛ ma ko Aminɔ faga-sɔgɛ le ye a la nun.

³³Ka a fɔ ila dan damasi fagara le, i kana la wo la. Aminɔ kelen pe le fagara.”

³⁴Wati kelan wo rɔ, Abasalɔm ya a buri. Kɛlɛ-dan min bi soe makandanna, wo tara a fɔ mansɛ ye ko, “N bara nyama yen nala Hɔrɔnayim soe kilɛ wara la. Anu bi kɔnkɛ yigila.”

³⁵Yonadabu ya a fɔ Dawuda ye tun ko, “Ila dannu denu bi na tinɛ wo la iko n ya a fɔ i ye nya min sisa.”

³⁶A ma a kuli wo laban defan, Dawudala dan wonu ya anu kunyɛ ladon bɔn la. Anu dama donta di kɛ rɔ. Dawuda anubɛ ala mɔgɔ-banu fanan donta di kɛ rɔ.

³⁷ Abasalɔm ya a buri. A tara a sigi Amihudila den Mansa Talamayi warɛ min bi Kesa nyamanɛ kun na. San sawa a ye nyɔ. Mansa Dawuda mɛra ala den Aminɔ dila.

³⁹Kɔnɔ saya-koe wo makimanɛ, ala den Abasalɔm min bara a buri wo la, wo sɔgɛ ya Mansa Dawuda bira tun.