Read Kuranko 2 Samuwɛli 14 Bible Online

2 Samuwɛli 14 - Kuranko bible

2 Samuwɛli 14

¹Yohabu ya a lɔn serr, ko Abasalɔm yen-sɔgɛ ara Mansa Dawuda bira kosɛbɛ!

²Musu-hɛnkilimɛ min siginɛ Tekoya soe burɔ, a ya kilayɛ lata wo do ma. Musi wo nanɛ, ale Yohabu ya a fɔ a ye ko, “I nyɛrɛ ma saya-di-kɛlɛ la. I kunyɛ fosokore to i kuma. I ni bɛgi-gbɛ don i kan na. A ma iko i wara mɛ diyi kɛla dɔgɔma-ma-de!

³N bi i labilala min na, i ye tala wo le fɔla mansɛ ye.” Wo kɔma, Yohabu ya musi wo labila.

⁴Musi wo tara mansɛ wara. A ya a madu a kɔrɔ ka a gbiliya. A ya a fɔ a ye ko, “N tigi, i yandi, n dɛnbɛ.”

⁵Mansɛ ya a fɔ a ye ko, “Nfen mara i la?” A ya a fɔ mansɛ ye ko, “Nna kei ara faga, ado kɛɛ-musu bolo-kolɔn le nde la.

⁶N fa, den-kei fila le n bolo nun. Wonu denu kɛlɛta sɛnɛ rɔ mɔgɔ sa kan min ka anu fara. Doi ya a ta-nyɔgɛ faga.

⁷N na-kelen-nyɔgɛ bɛɛsi ara n magboya. Anu ko nna dan min ya a na-kelen-nyɔgɛ faga wo la, n ni wo don anu bolo alako anu ni ale fanan faga a na-kelen-nyɔgɛla sayɛla ko la. Ni anu ya wo ma, den mumɛ sa n bolo worɔ tun, ado ni wo mara, n yigi ara tɛgɛ. Nna kei sugi la ara to fanan.”

⁸Mansa Dawuda ya a fɔ a ye ko, “Ta i yiyɛ la. N si ila kɔndɔfili kɛ nyinya i ma.”

⁹Musi wo ya a fɔ a ye ko, “N tigi, ni i ya ko-wo-ko ladan, mabɛ n kebilɛ le gba, wolebɛ i kebilɛ ma de!”

¹⁰Mansɛ ya a fɔ a ye ko, “Ni mɔgɔ-wo-mɔgɔ ya i niyi ragbɛrɛn i ma, na wo tigi la n bara. Wo ti wo nyɔgɔn ma tun.”

¹¹A ya a fɔ mansɛ ye tun ko, “N tigi, i yandi, ita Mari Alla madiya n ye alako n na-kelen-nyɔgɛ min bi nna dan doi tayili-sara-koe rɔ a na-kelen-nyɔgɛ la ka a faga, wo kana bɔnɛ lakoloya ka tenbi a fɔlɔtɛ la.” Mansa Dawuda ya a fɔ a ye ko, “A ye mabɛ Alla tɛma, yanba-gbalɛ ti yalan ila dan wo ma muk!”

¹²Ale musi ya a fɔ mansɛ ye tun ko, “N tigi, i yandi, kuma kelen pe ye n bolo, a to n ni wo fɔ.” Mansa Dawuda ko, “Tana ma wo la.”

¹³A ya a fɔ mansɛ ye ko, “Nfenna i wara ko-yogoma-su kɛ ma Allata mɔgɛnu na? I wara i nyɛrɛ yiliki bawo kebi i ya ila dan kɔn, i ma sɔn a makele-koe ma, ado i bɔ-san nta dan wara-koe fɔla n ye kaka.

¹⁴Kɔnɔ a mara nya-wo-nya, fɔ ma dama wa faga le. Ma mani de iko yi ra wa wuya dugi ma. Mɔgɔ ti ke wo madɛnna tun. Hali Alla, niyi-bɔɛ ma di a ye. Kɔnɔ Alla si fɛrɛ nyini ka mɔgɔ-konnɛ lasɛgi a ma tun.

¹⁵N tigi, ni i ya a yen, n bara na kɛ fɔ i ye, nna mɔgɛnu denu bara n takilan. N ya n miri, n ko ni n nara i wara n yili-latɛgɛnɛ le, n ko ni n ya i madiya fenfen na, i si wo ma le.

¹⁶N ya a lɔn fanan serr, ko fɔ i wa i wɔlɔ matɔlɔ n na ka n tanka mɔgɛnu masibɛ ma min bi mabɛ nna dan wo faga-koe rɔ. Ni wo don mara, Alla ya nyamanɛ min di male Isirɛla mɔgɛnu ma, anu bara n gben nyamanɛ wo rɔ.

¹⁷ N ya n miri n nyɛrɛ ma n ko hali ita kuman-kan wo si a ma, n ni kisi. Mansɛ mani de iko Allata melika bawo a ya ko-nyimɛ anubɛ ko-yogomɛ dan-nafarɛ lɔn. Mansɛ, alamɛ ita Mari Alla tora i fɛ.”

¹⁸Mansɛ ya a fɔ a ye ko, “N bi i manyinikala ko kelen ma, ado fɔ i wa wo tonyɛ fɔ n ye.” Musi ko, “N tigi, i ya i miri fenfen ma, n manyinika wo la.”

¹⁹Mansɛ ya a fɔ a ye ko, “Yohabu, wo le ya i labila kɛ la, nyɛ?” Musi wo ko, “N bara n keli iko ita mansayɛ anubɛ ila simayɛ ye nya min, ila nyinikali kɛ masangba-kunya sa. Ila kɛlɛ-den-kun-tigi Yohabu, wo le ya n nabila kɛ nya na, yɔ!

²⁰A ya a ma le alako bɛnsɛnkɔninyɛ kɛ ni ban. N tigi, i hɛnkili kolo iko Allata melika min ya koe bɛɛ lɔn.”

²¹Tɔ-a-la, mansɛ ya a fɔ Yohabu ye ko, “N bara ban a latɛgɛla iko a di i ye nya min. Ta ale keminɛ Abasalɔm bi. I ni na a la yan tɔ.”

²²Yohabu ya a laburun a ma Dawuda kɔrɔ ka a gbiliya. A duwara Dawuda ye ka a fɔ a ye ko, “N tigi, n bara a lɔn gbɛ ko n di i ye bawo i wara n kuman-kan to a gbɛ rɔ.”

²³Ale Yohabu ya a lasɔ. Mansɛ ya a fɔ a ye ko, “N kana Abasalɔm yen n yɛ la. A ni ta a halala-bɔn la.” A tara Abasalɔm bi tinɛ Kesa nyamanɛ rɔ ka na a la Yerusalɛm soe burɔ. Abasalɔm nanɛ, a tara sigi a halala-bɔn la. A ma mansɛ yen a yɛ la.

²⁵Isirɛla nyamanɛ lakofunɛ ka a sa a nyɔgɔn kuma, mɔgɔ-wo-mɔgɔ mafɛlɛn ma di Abasalɔm ko. Ka a bi a kian ma ha ka a sigi a kunyɛ la, fɛɛ-wo-fɛɛ sa a la.

²⁶A si a kunyɛ tɛgɛ min kɛ san la iko kelen, a kun-sigi si gbiri ha ka yanya a kuma. A kun-sigi madɛnnɛ wonubɛ yi kalon-talɛla gbiliyɛ rakɛn de!

²⁷A ya den-kei mɔgɔ sawa ani dunmusi kelen de sɔrɔn. Dunmusi wo tɔgɛ le Tema. Tema kɛ kin dɔgɔma-ma-de!

²⁸San fila dɛgɛdɛgɛ, Abasalɔm siginɛ Yerusalɛm kɔnɔ a yɛ la ma tii a fa Mansa Dawuda ma.

²⁹Abasalɔm ya kilayɛ lata Yohabu ma alako wo ni ta kuma mansɛ la a ye. Kɔnɔ Yohabu ma sɔn na-koe ma. Abasalɔm ya kilayɛ lata a ma tun kɔnɔ hali wo, Yohabu ma sɔn na-koe ma.

³⁰Wo le ya a ma, Abasalɔm ya a fɔ ala wɔli-kɛlɛnu ye ko, “Yohabu lela sɛnɛ tugunnɛ ntɛ la. Wo ta tɛ tugu ala sɛnɛ wo la.” Wonu tara tɛ tugu nyɔ la.

³¹Yohabu tara Abasalɔm warɛ bɔn la ka a manyinika a sɛbɛ-kuna-wɛ la. A ko, “Nfenna ila wɔli-kɛlɛnu bara tɛ tugu nna sɛnɛ la?”

³²Abasalɔm ya a fɔ a ye ko, “Bawo n bara i kele, i ma sɔn na-koe ma. A sɔgɛ ye n na, i ni ta mansɛ manyinika n ye ko nfenna n bɔra Kesa nyamanɛ rɔ ka na yan? Ni n tora nyɔ nun, wo ma fisa? A sɔgɛ ye n na, i ni a ma, n ni mansɛ yen n yɛ la. Ni yo sa n bolo, a ni n faga worɔ.”

³³Abasalɔm ya min bɛɛsi fɔ Yohabu ye, wo tara wonu takaran Mansa Dawuda ye. Ale mansɛ ya Abasalɔm kele. Abasalɔm ke mansɛ ma, a ya a laburun a ma a kɔrɔ. Mansɛ ya a sɛnibɔ ka a sunbu.