Read Kuranko 2 Samuwɛli 21 Bible Online

2 Samuwɛli 21 - Kuranko bible

2 Samuwɛli 21

¹Mansa Dawudata wati rɔ, kɔnkɔ-fitinɛ donta nyamanɛ wo rɔ. San sawa dɛgɛdɛgɛ, kɔnkɛ ye nyɔ. Mansa Dawuda ya Mari manyinika wola ko la. Mari ya a fɔ a ye ko, “Wo mara bawo Mansa Sɔli anubɛ a kebila-mɔgɛnu bara Kibiyon mɔgɛ donu faga.”

² (Isirɛla mɔgɔ ma Kibiyon kɛ kɛnu na. Amora le anu na Isirɛla mɔgɛnu ya lanyiri kiri minnu ye anu niyi-lakisi-koe la. Kɔnɔ Mansa Sɔli ya mɔgɔ siyaman faga anu tɔ Isirɛla anubɛ Yuda nyamanɛnuna ko la.)

³Mansa Dawuda ya kilayɛ lata Kibiyon kɛnu ma ka anu kele. Wonu ke, a ya a fɔ anu ye ko, “A sɔgɛ ye wo la, n ni nfen ma wo ye? Ko-yogomɛ min sigira wo la, a sɔgɛ ye n na, nde ni wo fɛ-bira. Wo si a ma, wo ni duwa Marita mɔgɛnu ye.”

⁴Kɔnɔ Kibiyon kɛ wonu ko, “Sɛnɛ anubɛ wodi-gbɛ ti kɛlɛ-nyɔgɔnyɛ kɛ ban male anubɛ Sɔlila denbayɛnu tɛma, ado Isirɛla mɔgɔ-gbɛrɛkɛ faga-sɔgɔ sa ma la.” Mansa Dawuda ya a fɔ anu ye ko, “N ni nfen ma wo ye worɔ?”

⁵Kibiyon kɛ wonu ya a fɔ ko, “Sɔli ye ma lato-koe le tɔ nun. A sɔgɔ sa a la, male fenfen ni to ma niyi la Isirɛla nyamanɛ rɔ.

⁶Woletɔ wo ni kei mɔgɔ wɔrɔnfila bira, a kegeyɛnu, kɔni, ka wonu don ma bolo. Ma si anu faga ka anu dun kɔlɔma ma Kibiya soe burɔ Mari yala. Mari ya ale Sɔli min yabɔ ka a ma mansɛ la, a sɔrɔn-soe le Kibiya soe wo la.” Mansa Dawuda ko, “N si anu don wo bolo iko wo ara a fɔ nya min.”

⁷ Kɔnɔ Mansa Dawuda ma sɔn Mansa Sɔli mamanɛ Mɛfibasɛti donna anu bolo ka a tɛgɛ anubɛ Yonatan ya lanyiri min kiri anu nyɔgɔn tɛma Mari yala.

⁸ Kei min tɔgɛ Aya, wola dunmusi Risipa ya den-kei fila le sɔrɔn Mansa Sɔli ma. Den kei filɛ wonu tɔgɛ le Arimoni anubɛ Mɛfibasɛti. Mansa Sɔlila dunmusi Mɛrabu ya den-kei mɔgɔ loli sɔrɔn Basilayila den Ediriyɛli ye, Mɛhola kɛ, kɔni.

⁹Mansɛ ya mɔgɔ wɔrɔnfilɛ wonu don Kibiyon kɛnu bolo. Anu ya wonu faga ka wonu dun kɔlɔma ma Mari yala kɔnkɛ kuma. Mɔgɔ wɔrɔnfilɛ wonu damasi fagara nya kun kelen. Kɛ mara fui-fen-kun-fɔlɔ-tɛgɛ-wati le tɔ.

¹⁰Mansa Sɔli fɛ-sigi-musi Risipa wo ya kasa-kurɛ rasa farɛ kuma furi wonu dafɛ kɔnkɛ kuma nyɔ. Ka a bi dɔn-fen-kun-fɔlɔ-tɛgɛ-wati wo ma ha ka a sigi banda-yi kun-fɔlɛ la, a ye furi wonu kandanna. Tele rɔ, a si konanu gben furi wonu ma. Suyi rɔ fanan, a ni sogenu gben anu ma.

¹¹Risipa ye wo min mala, Mansa Dawuda ya wo lamɔɛn min kɛ,

¹² a tara Mansa Sɔli anubɛ Yonatan kole bi tinɛ Yebɛsi kɛnu bolo Kaliyadi nyamanɛ rɔ. (Yaga, Filisitinu ya Mansa Sɔli anubɛ ala den Yonatan faga Kilabowa kɔnkɛ kuma tele min tɔ, anu tara anu furi dun Bɛti-San soe tɛma tele wo le nyɛrɛ rɔ. Yebɛsi kɛnu tara Mansa Sɔli anubɛ ala den Yonatan furi kankan Filisitinu ma ka na anu na anu barɛ.)

¹³Mansa Dawuda tara Mansa Sɔli anubɛ Yonatan kole wonu bi anubɛ mɔgɔ wɔrɔnfilɛ wonu kole Kibiyon kɛnu ya minnu faga, kɔni.

¹⁴Anu tara Mansa Sɔli anubɛ Yonatan kole wonu togon ale Sɔli fa Kisata kaburu-soe la Sila soe dafɛ Bɛnyamɛ nyamanɛ rɔ. Iko Mansa Dawuda ya a fɔ anu ye nya min, anu ban a mala wo nya, Alla ya anuna madiyali-kan lamɔɛn ka duwɛ lana anuna nyamanɛ rɔ tun.

¹⁵Kɛlɛ gbɛrɛ donta Filisitinu anubɛ Isirɛla mɔgɛnu tɛma tun. Mansa Dawuda anubɛ ala kɛlɛ-dannu tara Filisitinu kɛlɛ tinɛ. Lun kelen, Mansa Dawuda ya kɛlɛ kɛ furr, ha a bandanta.

¹⁶Filisiti kɛ do ye nyɔ, a yan, ado a kunba. A tɔgɔ le Isibi-Bɛnabi. Ale le si ta sila-tanbɛ la a bolo. Wola gbiliyɛ anubɛ yi kalon-talɛ rakɛn de! Faan-kurɛ ye a bolo fanan. Ale ya a lɔn ko a si Mansa Dawuda faga le.

¹⁷ Kɔnɔ Sɛruya Abisayi wo nara Mansa Dawuda dɛnbɛ ka Filisiti wo faga. Wo kɔma, kɛlɛ-dannu ya tɔn sigi Mansa Dawuda ma, anu ko, “I kana ta ma fɛ kɛlɛ rɔ tun alako i kunyɛ la kana to kɛlɛ rɔ bawo ni wo mara, ma ara to pinpi rɔ.”

¹⁸Lunyɛ do, anu tara Filisitinu kɛlɛ kan tinɛ do rɔ min tɔgɛ Kɔbu. Wati wo rɔ, Husayi kɛ Sibɛkayi ya Filisiti-yan-bɛ do faga min tɔgɛ Safi.

¹⁹Anu ya kɛlɛ do kɛ Kɔbu soe dafɛ nyɔ tun. Wo wati rɔ, Yeyala den Ɛlihenan min bɔra Bɛtalehɛm soe burɔ, wo ya Kolati na-kelen-nyɔgɛ faga nyɔ rɔ min tɔgɛ Lami, Kati kɛ, kɔni. Lami wola tanbɛ wo donnɛ kɔlɔma min na, wola kunbayɛ anubɛ yese-dan-kɔn rakɛn de!

²⁰Anu tara ka Kati kɛnu kɛlɛ tun. Mɔgɔ-yan-bɛ do ye nyɔ, a bolo-kɔlɔni wɔrɔ, a kin-kɔlɔni wɔrɔ.

²¹Wo tara a kɔgɔ raka Isirɛla mɔgɛnu telen tɔ. Dawuda kɔrɔ Simɛya, wola den Yonatan, wo ya wo faga.

²²Mɔgɔ nanɛ minnu faganɛ kɛ la, mɔgɔ-sɛnbɛlama-wɛ minnu bi Kati soe burɔ, wonu kegeyɛ le kɛnu na. Dawuda anubɛ ala kɛlɛ-dannu denu ya wonu faga.